婚礼拣歌有学问　播错呢7首随时令新娘嬲你一世

今日（31日）系乔妹宋慧乔同Oppa宋仲基结婚嘅大喜日子，相信今日不少fans都会戥佢哋开心。话晒婚姻系一生人一次嘅大事，当然每样嘢都要做足100分留个美好回忆啦，就连播歌都唔可以马虎，唔通真系学网民咁唱《阿牛》咩。其实好多歌睇落好Sweet，细看之下实质意头唔好，大家记得婚礼上面唔好播以下几首歌免得中伏喇。

真系唔好喺婚礼上面播以下呢7首歌喇！(按图放大)(MV截图)

1.《爱是永恒》

歌神张学友1997年嘅作品《爱是永恒》，只睇歌名当然美好啦，一生一世至死不渝嘅爱情相信系好多人嘅憧憬。不过正所谓“魔鬼在细节”，睇埋歌词你就明。

两手虽似空　其实抱著你
其实你没有别离　在我心湖中
每掠过　也似风撩动　令这湖上　无尽爱浪涌

相信睇完上面几句大家应该都会明，歌词所讲嘅并唔系happy ending。歌词中主角幻想抱住另一半，实质两手空空，爱人已离自己而去，剩下对爱人的思念留在脑海中，而且每次回想起以往的情景都会牵动思绪。如果套用喺公公婆婆，老伴离去仍然爱着对方都称得上浪漫，但系用喺新婚大喜日子上就真系大吉利是喇！

2.《婚纱背后》

小凤姐徐小凤1986年嘅作品《婚纱背后》，相信好多人都知道歌词系讲紧“爱人结婚了，新娘不是我”嘅故事，但系点解都入选呢？原因系好多人不求甚解，见到有“婚纱”两个字就觉得啱数。真系拜托各位搞手睇清楚歌词先啦：

我让旧情伴婚纱远去 一切又从头面对
爱若是如梦终必破碎 亦继续不息地求取

爱最终如梦破碎，你仲要歇斯底里去苛索，大佬呀你唔好咁痴线啦，我明人系有追求爱情嘅自由，但系你喺人哋新婚日子播呢首歌，如果我系新郎哥真系会请你好好放低。

3.《婚礼的祝福》

继续不求甚解系列，Eason陈奕迅1999年作品《婚礼的祝福》睇个名当然好啱数，不过麻烦大家细阅歌词：

我的请帖是你的喜帖 你要的一切如今都变成我的心碎
你总是太清醒我始终喝不醉 连祝福你还逼我给

斋睇上面几句大家都感受到歌词中嘅主角有几惨啦，睇住自己心爱嘅人结婚，仲要被逼出席婚宴，仲企图灌醉自己，又要夹硬祝福对方，惨绝人寰呀大佬，大家记得唔好喺人哋婚礼播呀。

4.《My Destiny》

今日系“宋宋”大日子，所以要揾首韩文歌应下景，《来自星星的你》主题曲《My Destiny》唱到街知巷闻，就连唔识韩文嘅朋友都会识唱“You are My Destiny”，不过呢首都系惨情歌嚟㗎。

나 다시 허락한다면
如果我能再次被你接受

그댈 다시 볼 수 있다면
如果我能再次见到你

내 지난 기억 속에서
在我过去的记忆里

그 아픔 속에서 그댈 불러
在那伤痛里 呼喊著你

You`re my destiny
 

睇完咁直白嘅歌词翻译，相知唔使多讲大家都明《My Destiny》系咩一回事，歌词中嘅主角哀求对方再次接受自己，希望再续前缘，但如今只能在回忆与痛苦之中呼喊对方，即系搞咁多嘢都系得个吉。所以大家唔好俾韩流同埋优美嘅旋律蒙蔽，要花啲心机口文嚼字呀。

5.《I Will Always Love You》

香港作为一个华洋共处嘅地方，点可以唔提外语经典金曲呢。《I Will Always Love You》又系一首可列入不求甚解系列嘅歌，其实呢首歌名同听落好冧嘅歌系讲分手㗎，睇完歌词你就明：

Bitter sweet memories.
That is all I'm taking with me.
So goodbye,please don't cry.

We both know I'm not what you need.
And I will always love you !
I will always love you !

苦乐参半的回忆是我唯一可以带走的东西，道别时请你不要落泪，彼此都明白我不是你想要的人，但我会永远爱着你。讲到咁白，大家明啦，系你明知自己唔系对方真命天子，分咗手仲要大大声话“我永远都咁爱你”嘅歌呀，简直就系自虐！唔想令一对新人同你反面，记得唔好播呀。

6.《童话》

光良2005年作品《童话》一曲歌词虽然都几sweet，讲男主角希望变成天使保护自己心爱嘅人，并希望对方相信将来会有一个美满的结局，但可惜个MV意头唔好呢。

MV中嘅女主角身患重病，光良一直陪伴在侧不离不弃，可惜最后女主角要靠机器维持呼吸，虚弱地听完光良送上嘅最后一段录音，眼角带泪离世，从此二人阴阳永隔。

试想像，如果喺你嘅婚礼上播呢首歌，你会有咩反应先？

7.《不许你注定一人》

乐队Dear Jane 2013年作品《不许你注定一人》当年一推出势头强劲，需然有网民嫌MV女主角把声系咁讲“快啲！快啲！”好烦胶，不过首歌又真系几甜蜜嘅，YouTube点击率更接近2千万，成绩非常好唱到人人都识。

不过，《不许你注定一人》同《童话》一样MV意头唔好，男主角走到坟前送花讲“Good Night”，一个大男人返到屋企崩溃地嚎哭，加埋回忆走马灯loop一次以往甜蜜片段，ip都唔使check就知又系一个阴阳相隔嘅故事。婚礼上面播真系好“唔老黎”。