【专访】C AllStar未开骚先尝单飞苦头　成员自嘲唔识唱歌

成军8年，C AllStar 4位成员由廿岁出头的后生仔，瞬间变了一代年轻人的偶像。时日如飞，曾为80后唱出时代曲4人，将举行他们的最后一个演唱会。10月于红馆举行的两场《生于C AllStar演唱会》，谢幕时亦将为C AllStar 4子的Last Day划上完美句号。但比起不舍，四人似乎更期待独立发展后的各人能在不同舞台上更发光发亮。他们的惺惺相惜，正好造就出最适时的告别。
摄影：杨晴
发型：Zanki@iHair
服装：Harvey Nichols
化妆：Nana Wong
Styling：Will Yu
场地提供：J plus hotel by yoo

由出道至现时，C AllStar亦是不停试新嘢，明明现在他们出歌已可说是稳阵有收听率，但他们仍是决定单飞，到底是否宁愿冒一下险，也不愿固步自封行稳阵路线？思量一会，Jase表示：“其实又冇得咁分嘅，唔可以话自己系非主流所以我就唔做主流嘅嘢，又或者我自认主流，就放弃做非主流嘅嘢。音乐本身就好应该百花齐放，但系啲人而家好钟意音乐上嘅分化，即系我撑非主流，我就唔听主流。但喺音乐嘅世界上，呢个系好错嘅概念。主流有分好嘅K歌、唔好嘅K歌，就算indie（地下乐手）都一样可以有废嘅indie。”对于香港嘅音乐文化，Jase再补充：“而家已经唔系80年代Cantopop嘅年代，净系做日本翻唱情歌就搞得掂，大家睇吓成个世界嘅音乐已经唔系咁样运行，例如EDM（电音） ，可能喺香港唔系好流行，不过系全世界已经取代咗Hip Hop同R&B成为最大嘅音乐市场，系音乐界嘅新宠。不过Hip Hop同R&B喺全世界都被取缔紧嘅时候，香港有冇人做呢两样嘢呢？一样系无嘅，所以我觉得香港嘅音乐市场系应该有更加多嘅音乐类型，广东话亦值得有更多嘅音乐可以放落去。当然K歌亦唔代表干塘，始终我哋香港人就系听住呢啲音乐大，我哋呢啲流行歌手，更加要将呢种文化做得更好。所以你问我哋系咪唔行稳阵路线，我哋唔系唔行，而系做就要做好嘅K歌。”

早前推出大碟《LoveaHolic》Vol.1及Vol.2，4子提早尝试单飞做歌滋味，他们也表示真的要习惯没有其他兄弟依赖的日子。On仔更大爆：“今次自己做歌，我揾咗Adrian Chan嚟帮手编曲同监制，其实由《天梯》开始已经识佢，亦一直好想揾佢合作。佢做录音嘅方式同其他人好唔同，有一次佢同我讲‘On仔，我好怕你去洗手间，因为你个集中力好快会甩呀，你去完洗手间𠮶两take通常都唔得。’我听完佢咁讲就小小都唔敢放松，佢系一个好了解我身体状况嘅人，连尿频情况系点都知呀。所以𠮶次录音系比平时快嘅，大概三个钟就录起大部分，𠮶下会觉得，原来自己都识唱歌㖞。”

而钊峰初尝单飞滋味，似乎也有所领悟：“当我知道要自己做一首歌，一收到份词𠮶下，我脑海入面就弹咗3个监制嘅名出嚟，咁我同其他兄弟一样都系抱住向外闯一闯嘅心态，于是我将呢3个名交咗俾我哋嘅监制阿简。佢同我讲：‘好…不过由于有啲现实嘅情况呢，你有两位兄弟已经闯一闯啦，budget上未系好做到你嘅要求住。’我当下就觉得，音乐都真系一样讲求现实嘅事情，无乜所谓啦，其实又好似返到去最初做歌手嘅心态，又可以同阿简、赖映彤呢两位一直扶持我哋成长嘅人合作，我觉得佢地真系我生命中嘅灵魂伴侣。同埋今次冇咗3位兄弟去傍住，其实我真系开始摸索返，到底自己系咪识唱歌呢？”

除了演唱会主题曲《此刻无价》，C AllStar在演唱会前准备了不少新歌，包括《灵魂进化》。提起此曲，特别在歌曲班底比起以往赖映彤包办作曲编曲，今次On仔及阿King也发挥自己所长，由On仔亲自作曲、阿King与赖映彤共同编曲。在之前作曲中，不少乐迷也应该知道On仔作曲有一手，不过今次最大的惊喜在于阿King的电音编曲，他们表示：“阿King好钟意电音，佢差唔多浸淫咗喺呢个世界年几两年，成日都唔瞓觉埋头苦干。今次就好好机会啦，演唱会前要出新歌，佢又更加有借口唔瞓觉啦，俾佢愉快失眠。”On仔表示：“电音可能我地听得比较多英文、韩文、日文，我地一直都谂紧点样摆落广东话度，而系唔MK嘅。因为广东话好多发音比较倔，所以录音嘅时候，我地嘅唱法都要就一就。”而热爱电音的阿King亦少有主动发言：“传统广东歌要将人声推到好前，乐器就会喺后面。不过EDM就唔得，通常个比例都系五五比，喺电音嘅概念入面，人声都系乐器嘅一部分。”

C AllStar在2013年曾推出一只大碟《Cantopopsibility》，内容是主打广东话歌的“实验”，把不同曲风和元素放进广东话，看看可能性有多大。事隔4年，C AllStar认为自己做音乐的初衷仍未改变：“好似头先讲开电音咁，都识讲英文唱可能会舒服啲，咁点解我哋仲要用广东话呢？其实又唔系因为咩捍卫广东话咁伟大嘅，不过都系想尝试吓啰，因为广东歌嘅电音市场唔系大，做嘅人唔多，咁阿King就好想实验吓个效果出嚟会系点。可能用英文国语会容易啲做嘅，不过点都唔系我哋母语嘛。”