【任噏乐评】《流行经典50年》定《劲歌金曲》?　其实大家睇紧乜

日前TVB播出的《流行经典50年》比起过往18集，内容算是相当别开生面，邀请了难得在TVB露面的容祖儿亮相，还要一口气唱足8首歌，天后规格的确不同凡响。容祖儿上TVB节目唱足咁多首大热作品，观众及乐迷固然睇得开心，不过抽离返少少，除咗容祖儿，我寻晚到底仲睇咗啲咩？

《流行经典50年》自未改名仍然叫《流行经典50强》开始，卖点都系一班好耐无喺乐坛出现嘅歌手。最初喺节目当中见返黄翊、张立基、黎瑞恩、刘锡明呢一班80、90年代嘅歌手，𠮶种惊喜都咪话唔震撼。当然，为咗支持吓新一代歌手，每集嘅《流行经典》都会揾一两个年青歌手上去翻唱经典作品，顺便帮歌手做吓宣传都系无可厚非。不过自从节目改名做《流行经典50年》之后，我觉得佢反而愈嚟愈似《劲歌金曲》。就好似寻晚咁，焦点当然喺容祖儿身上，顺手仲帮祖儿庆祝入行18周年，呢个包装的确唔错，但大家唔好唔记得，呢个节目明明叫《流行经典50年》，因乜解究除咗祖儿之外，就只有区海伦、许靖韵同陈明憙？后两者点计都说不上“流行经典”啦？如果要帮祖儿庆祝，又点解唔摆去另一个长寿音乐节目《劲歌金曲》，又或者索性做一个《容祖儿入行18周年庆祝特辑》？

经过早几星期嘅节目后，你可能会发现，现时《流行经典50年》每集邀请的经典歌手和新世代歌手愈来愈倾向“五五波”，而且嘉宾的名单亦开始重复又重复，就以上星期陈晓东、王馨平为例，其实都上过节目几次，陈晓东之前喺4月同5月已经上过节目，而王馨平喺7月上过一次、上星期又上一次、嚟紧下星期节目又再亮相，可见其实嘉宾名单已经开始“冇货”，唯有不停打友情牌兼靠年青歌手顶住。不过《流行经典》要做埋《劲歌金曲》𠮶份都可以理解嘅，因为《流行经典50年》自首播已来，收视好就不在话下，连网上嘅传播度都相当高，成为唔少网民嘅讨论焦点，讲真一句，你系节目组同TVB嘅话，又点会舍得比呢个节目草草完结？梗系继续煲尽佢啦！

相反睇睇另一边厢嘅《劲歌金曲》，首先问大家一个问题，你记唔记得《劲歌金曲》而家系星期几同几点做？深信唔少观众都要特登上TVB.com先知原来系星期六嘅下午3点55分播映，仲要系只得5分钟嘅浓缩版，只提《劲歌金榜》十大位置，要睇完整版？麻烦去隔篱J2收睇。老实讲，其实而家《劲歌金曲》做紧啲乜，我谂都应该唔系太多人知，睇返过去几集节目嘅嘉宾阵容，小肥、王浩信、钟舒漫、Michael Learns To Rock，谂谂下都几熟口面，原来最近都系喺《流行经典50年》亮相，难得请到歌手嚟一厂献唱当然就要用尽佢啦！呢个做法都说得上系“一鸡两味”嘅极致。

讲开又讲，《流行经典50年》原来都只系剩返3集，而《劲歌金曲》除咗每年大家仲会笑下个颁奖典礼外都应该无乜人会留意，反而就似乎永远都唔会有完结一日，虽然《劲歌金曲》都说得上系唔少人嘅童年回忆，但系除咗卖个名之外，《劲歌金曲》到底仲有咩卖点？既然《流行经典》咁多人讨论，而且仲可以摆黄金档期，不如《劲歌金曲》索性接埋佢，同《流行经典》合并做《流行劲歌金曲50年》啦！