【任噏乐评】Gin Lee新碟造型超似阿娇　未听过佢玩EDM咪乱认fans

早几日有个朋友讲：“喂！阿娇（钟欣潼）单飞出新碟㖞！”听到我当堂吓一跳，明明Twins早几日先喺IFPI攞咗几个销量奖，无啦啦又点会单飞呢？为咗验证下咩事，唯有去CD舖走一转。

一行入CD舖问个店员：“唔该我想问下有冇阿娇只新碟呀？”个店员都搲晒头话：“冇㖞先生，你系咪讲Twins呀…”冇理由嘅！明明你舖头都贴埋张poster出嚟，正当我想指住佢身后张poster大大声话“你后面𠮶个㖞！”望真啲先发觉原来个签名系Gin Lee嚟，即刻红都面晒，细细声同店员讲：“Sorry呀…我想要只Gin Lee新碟呀…唔该…”

捞乱Gin Lee做阿娇真系好尴尬，俾完钱就梗系九秒九走人啦，我仲心虚到跌咗只碟落地，好彩只碟完好无缺冇事咋，吓到个心都离一离。

Gin Lee新碟入面一啲头发遮面嘅造型真系有啲似阿娇，你又觉唔觉？(接图放大)

今次Gin Lee新碟名为《Live in the Moment》，收录8首新歌，Deluxe版更附送10月演唱会换票证同相册。讲到新歌，《空姐》同《和每天讲再见》相信大家喺电台都会听过，其他作品都听得出系心机之作，而且听到不同面向嘅Gin Lee。

以往Gin Lee为人熟悉嘅歌曲都系偏向慢板嘅情歌，突显出佢细腻嘅声线；而今次Gin Lee新碟可以说一个突破，加入EDM、Band Sound、R&B、Jazz等等元素，非常抢耳，充满新鲜感。其中《今朝有酒》一曲音乐底带点Smooth Trap的味道，而且featuring C君加入Rap部份，成件事即刻型咗。《曌》一曲都系玩电音，净系听个beat都已经够晒“Un”，加上Gin Lee声线有力得嚟又唔会太chok，边个话Gin Lee型唔起？

如果有乐迷觉得一下子跳到咁“电”唔惯嘅话唔紧要，Gin Lee新碟同样照顾到你需要，《好风如水》、《缘．两半》简直可以话系Gin Lee嘅皇牌；值得一提《缘．两半》由潘源良填词，恰巧歌名系他的笔名“袁两半”嘅谐音，歌词写道：“我　得到是一半 ／ 你　得到是一半／爱是缘全”，未知系讲紧边个故事呢？

再睇睇今次《Live In The Moment》嘅制作班底，编曲、监制有Alex Fung、Fergus Chow、Eric Kowk；填词有林夕、梁柏坚、林若宁、周耀辉、C君等等，一睇以上呢几个名，就知系一个“行得前”嘅班底，难怪呢只碟充满惊喜。

其实相册入面仲有好多靓相㗎，系Gin Lee嚟㗎！

对于新碟造型网民话同阿娇撞样，Gin Lee接受《香港01》访问时大方回应指：“ 哈哈，多谢网民朋友都觉得我哋似样，其实似唔似样都唔重要，最紧要唱片封面靓，歌好听。”Gin Lee仲大赞摄影团队专业。另外问到，如果转用iPhone X 怕唔怕同阿娇Face ID捞乱，Gin Lee风趣回应话：“如果真系换电话，我会试下用我出过嘅唔同唱片封面log in，睇下log in到边一部电话。”