李克勤30周年演唱会尾场唱到12点　不舍红馆舞台落泪

《李克勤庆祝成立30周年演唱会》尾场昨夜完满结束。全场几乎毫无冷场，克勤台上落力表演，歌迷台下一样出尽力拍掌欢呼。除了慢歌外，克勤一样有不少快歌能串成medley，《左麟右李》、《一枝花》、《礼拜六冇节目》、《我著10号》等等，唱完medley最后一首，克勤考考大家到底知否是什么歌曲，他表示知道的人也应该“有返咁上下年纪”，不过大部人也答得出是《闪电传真机》。
克勤笑说想不到自己会跟儿歌有关系，更道:“其实我都系一个创作人嚟，虽然冇Wyman三千几首作品咁多，但我哋斗命中率㗎嘛，其实我都唔少歌成为大热㗎!打个比喻，我写两首有一首中，都唔错呀!”接著便送上自己有份创作的Big Hits《深深深》、《高妹》、《情非首尔》、《空中飞人》、《C3PO》、《大会堂演奏厅》等等，唔讲你都未必记得系克勤有份创作！

《大会堂演奏厅》在克勤震撼的歌声中完结，不过掌声却没因此停下来，令克勤在台上兴奋得跳跳扎，并大叫:“好开心呀!”他更感触表示最近几年是自己事业冲刺的时候:“每个人，尤其男人，喺唔同年纪都应该会追求唔同嘅梦想。呢啲梦想唔一定要好大，可以系去奥脱福睇场波。总之今晚你许下呢个梦想，就要做到。呢番话嚟咗几晚嘅朋友应该听过，不过你哋有无听过李克勤嘅梦想呀?有个梦想我忍咗好多晚，终于嚟到今晚忍唔住要讲。我好钟意试唔同嘅嘢，上年我加入英皇嘅第一首歌叫《一个都不能少》，系我第一次尝试做导演去拍MV。2018年，我会第一次尝试做电影导演。”
 

此话一出，轰动全场。克勤亦不忘多谢老板杨受成:“我记得有一日上去老板杨生间房度，我话，杨生我有一个梦想。我想咁咁咁咁咁，我都未讲完，杨生就同我讲，克勤你唔揾我我嬲你。所以当我做完呢个演唱会，我匿埋唔系写歌词，而系电影剧本。”他更即场hard sell:“嗱！如果真系Friend嘅，真系歌迷嘅，你唔好理我拍成点，你到时买张飞入嚟睇得唔得先?呢度我计过㗎啦，有成万几人，如果每个人都入场睇呢，票房就有一百万㗎啦，我今次开咗九场演唱会，杨生应该唔洗点蚀嘅！”

每场演唱会也有介绍乐队的部分，不过热爱足球的克勤则以一个别开生面的方式介绍乐队，便是把他们当作球队成员逐一介绍，还配上蔡育瑜的声音，亲切感十足!为的是带出最后一部分，就是李克勤专属的“足球歌”!《球迷奇遇记》、《Victory》实在听到也似是身处世界杯现场!

这个部分完结后，本应是Encore阶段。不过克勤似乎不舍红馆舞台:“听日星期二，应该唔少人都要返工返学，如果听日要早起嘅就可以随时走㗎啦。不过今晚有样嘢好，就系老板喺度，如果我唱到过晒时间都有人买单，当然啦，如果太过静英英老板买单就买得无咁开心啰。”全场立刻起身拍掌，以示压力。克勤接著道:“等我换轻便啲嘅衫上嚟再同大家唱。

克勤果然没有食言，换上一身睡袍的他，上台立马便唱出多首首本名曲。《旧生会》、《月半小夜曲》、《合久必婚》、《九月中的陌生人》、《我不会唱歌》、《飞花》等。他亦衬机答谢在场的Wyman为他订造睡袍:“你知啦，我同时装一向都无关系㗎嘛，但Wyman咁钟意fashion，佢唔接我呢个job又死，接咗我呢个job就仲死，不过好好彩，著出嚟真系靓。我哋今晚有个dress code㗎，佢哋嚟睇我演唱会要著睡袍。”望清楚，原来今晚到场的Wyman和阿Sa也的确身穿睡袍现身。唱到《纸牌屋》时，他分享了一个故事:“有一日，太极嘅Joey Tang打嚟同我讲，佢话佢睇咗《纸牌屋》份歌词，佢睇完感动到喊。一个咁Rock嘅歌手睇完份词都会喊，所以我真系好钟意呢首歌。”不过话口未完，克勤竟然老猫烧须忘记歌词，即时扮鬼脸打完场。最后克勤一首又一首歌紧接下去，《好戏之人》、《谁愿分手》，唱到《爱不释手》时，克勤泪腺终于失守，虽然多次停顿，不过哽咽著唱歌一样表现完美，演唱会唱到午夜12点，终在带著半点缺陷的完美中落幕。