【专访】Supper Moment最钟意乐迷唔守规矩：最好系呢啲观众呀！
乐队Supper Moment近年成绩越来越好，除了成为颁奖礼常客，广告工作亦接踵而来，早前与雪糕品牌合作Häagen-Dazs，推出“期间限定”新歌《完美》。《完美》曲风够Chill，充满夏日感觉，让人一路听一路摇摆身驱，仿佛行路都有Groove。
主音Sunny透露《完美》的创作灵感：“坦白讲个Melody已经创作咗一段时间，本身melody冇歌词，但系我哋都觉得一讲夏日系要同一班朋友过，如果唔系一个人食雪糕好闷咁，或者一个游船河都游唔成㗎嘛！所以喺chorus都加咗句歌词‘My Life Complete with You’。”
Supper Moment乐队名称本身就与“食”有关，而近期亦有参与不同食品广告，Supper Moment会否想过走入电视框，开节目《Supper食平啲》？
鼓手阿达笑言：“早知就改个名去旅行啦！哈哈！”主音Sunny补充说：“如果认真答你，就紧系唔会啦！哈哈！因为我哋呢队band连音乐呢个本行都未做到自己满意嘅时候，又边够胆去做其他嘢呢，所以做好咗自己嘅音乐先！”
那么Supper Moment心目中的目标是甚么？做到哪一步才算“满意”？Sunny表示目标是世界巡演：“我哋嘅vision都系向住我哋嘅世界巡演去行，喺呢个时候去讲好似好遥远，但系慢慢发现，回望番我哋band房入面嘅地图，有啲红色钉住曾经去过嘅地方，最初净系得粒钉喺香港。但系慢慢越来越多，虽然唔系好多，但系总算去过香港以外，甚至境外一啲地方，就好似今年去咗英国演出。好多意想不到嘅嘢系会发生，虽然我哋呢队乐队系第11年，但系我哋都相信keep住咁行，总会有一日行到一个我哋心目中嘅目的地！”
今年5月Supper Moment随服装品牌到英国开骚，为他们累积了外地演出的经验，Sunny表示：“当时跟品牌做event，有2、3日时间，谂住喺𠮶到book间live house细细地玩，个心态系当租个playroom俾自己去玩。不过反应比想像中热烈好多，观众心情都好ready，咩歌都识唱，又冇咩规距呀！最好系呢啲观众呀！哈哈！”
到小型Live House演出让Supper Moment找回最初出show的感觉，但同时Sunny亦慨叹香港缺乏Live House：“唔系队队band，或者每一个音乐单位一开始就可以去一个大场地玩，你要去一个面对3万人嘅场地玩嘅时候，你先要搞掂30人、或者3个人先，香港的确乏呢种细scale嘅场地。(对Live House被打压有何感觉？)唔系纯粹对于音乐产业嘅问题，如果俾一啲守旧嘅条例束缚住个地方嘅可能性系有啲可惜，同埋呢件事本身系应该好自然咁存在㗎嘛！希望大家个思维再进步嘅时候，可以有一日容许到，或者啲条例会有改动、改善。”
Supper Moment陆续推出新歌，音乐类型亦有所改变，加入EDM的元素，到底今次新碟的理念是甚么？结他手阿鸡表示：“今次系想做做一只现场感丰富嘅大碟，就好似一个演出嘅Rundown咁，一场Live要有嘅起承转合，不同情绪嘅歌有。唔止净系玩EDM，有啲歌系好acoustic，acoustic到一o旧EDM都冇。”
阿鸡又讲到：“呢只碟主要系应付参与音乐节去做，因为目前唔够音乐节氛围嘅歌，出show唔可以成日都玩《点滴》、《一样不一样》、《机械人》呢啲歌，需再多啲歌要同观众互动。”
加入EDM是否大势所趋？会否害怕乐迷觉得加入EDM元素有“容易咗”、“唔真材实料”的感觉？就如部份乐迷不喜欢Linkin Park近年风格一样。阿鸡则认为：“认识音乐嘅乐迷听完应该唔会觉得易咗，应该系觉得难咗，chord voicing系越嚟越难。而且点样去操控EDM，去攞声都系一种技术，有人觉得玩EDM易咗可能系因为现场表演时形式唔同，但唔代表易做。”
阿鸡又补充：“EDM只系一个统称，入面包含Synth、Tech、Dubstep等等唔同类型，一样系咁博大精深，对我哋嚟讲都系一个新嘅领域。做过EDM嘅人就会知道，你要攞一只声系要花几个星期，甚至几个月先攞到一只自己满意嘅声，同玩乐器一样需要技术。”
Supper Moment最新派台歌《灵感床》的MV作新尝试，以插画及动画作主题，阿达表示：“近期放多咗心机喺MV度，由上年《一样不一样》开始，尝试喺手头上有嘅资金上面用得尽啲叻啲。以前嘅MV主要都系Band Shot、故事作主题。而《灵感床》就系第一次加入插画同动画，其实做之前已经知道个限制，但都想俾大家都会知道一个画出嚟嘅MV，所花功夫系大过拍真人好多，全CG嘅MV成本可能高过一套低成本真人电影。”
Supper Moment近期一值筹备新碟录音、编曲等工作，希望于年底完成录音，并在今年底又下年初能够推出，各位Supper Moment的乐迷记得密切留意，感受何谓“听碟如睇Live”。