【冷知识】歌手申请22次红馆开骚全失败　唱片高层爆：批核冇准则

个个歌手都想开红馆骚，但奈何要成功入纸红馆开骚“并唔系咁容易㗎叶师傅”，就连业内人士都唔知红馆方面由咩小组投票决定批期，亦唔知小组成员由何人组成。

黄凯芹早前于微博表示自己入纸红馆22次不果，“暴龙哥”郑中基亦试过入纸7次才能在红馆开骚“还飞债”，当时亦讲过唔知红馆批期有咩准则；就连前辈家燕姐想开红馆骚都要叫后辈杨千嬅、侧田让路，还有其他例子多不胜数。另外，据闻就连港、台都有名气的杜德伟曾以个人名义入纸亦失败，后尾要揾唱片公司出手才可成事。

每位歌手都话要“争期”，到底点先可以“成功争取”？当中又有咩准则呢？
《香港01》访问了几位唱片公司高层，结论是：“冇准则㗎㖞！亦都唔知边个系决呢件事！”

红馆(香港体育馆)属政府康乐及文化事务署辖下的室内多用途表演场馆，而订租表格亦可以康文署香港体育馆网页下载，又有订租指引供参考，所以用公司或团体名义入纸申请“其实唔难”，不过红馆批唔批期俾你就另一件事。

“准则”谁来定？

歌手们经常提到“唔知红馆有咩准则”，据知红馆方面有一个小组投票来决批出档期事宜，但唱片公司高层却透露：“冇准则㗎㖞！从来都冇肯定话俾边个嘅，亦都唔知边个系决呢件事，又冇人出过嚟话我系呢个小组嘅话事人。”该小组如此神秘，难道是“围威喂”投票产生？

红馆的商业考虑？
除咗冇人知负责投票嘅小组如何组成，唱片公司高层更透露其实红馆批期都有商业考虑。

“因为系盘生意嚟㗎嘛！佢(红馆方面)都会知道边啲人开演唱会系得，有边啲人唔得，佢唔可以蚀㗎嘛，你有权可以蚀到开唔成㗎㖞！”

另外，个人名义是无法入纸申请，必须以公司或团体名体申请，但并非普通人开间公司就可以申请到，红馆都要睇该公司往绩决定，唱片公司高层透露：“大公司就一定着数，好似东亚、英皇等等，睇record㗎嘛，会睇你以往有冇啲骚烂尾，又会睇如果你手上多artist，大部份销售都ok嘅，咁攞个期咪容易啲啰，永远都系咁㗎咋。”

如若两位大星同时争期，红馆会批俾边个？唱片公司高层回应：“从来都冇肯定话俾边个嘅，可能佢哋系一个轮流嘅方式，可能张学友两年开过，刘德华4年冇开过，咁咪可能俾刘德华，系冇准则嘅。”

大公司之间密斟倾掂佢？

头先提到红馆要睇往绩，咁系咪代表名气较低嘅歌手永远同红馆无缘？唱片公司高层指公司之间会倾掂佢：“有时你又要compromise(妥协)，如果本身系一啲唔系好红嘅artist，又要自己搭台又要整嘢搞唔掂，咁你用人个台又得㗎㖞，咁就改少少嘢用番人哋个台。但要同第二间公司去deal，例如刘德华本身攞咗12月档期，但系开唔成，咁咪俾杨千嬅、侧田佢哋开，公司之间倾咪俾几场你做咁啰，呢啲嘢好死㗎啫，来来去去咪又系𠮶几间公司。”

讲到尾，唱片公司高层都忍唔住话：“因为佢(红馆方面)唔忧做，基本上佢一年365日都爆硬嘅，大把人入纸，争在佢拣边个之嘛！”