【专访】钟镇涛Hi-Fi碟与囡囡合唱：佢唔钟意听我啲音乐

钟镇涛（B哥哥）曾经推出多首经典之作，但近年多在内地发展的他，数数手指原来已经多年没有推出粤语专辑，对于B哥哥来说，灌录新碟，除非是Hifi靓声，否则宁缺勿滥：“我希望做啲有质感嘅音乐”B哥哥说。摄影：梁碧玲化妆：Omix B

多年没有推出新碟的钟镇涛（B哥哥），最近推出Hifi碟《a better bee》。今次推出Hifi碟，其实已计划多时：“其实把口就讲咗好耐，但系一直都想揾个好时机去执行，咁啱有一次就见到环球唱片嘅老板Duncan，倾计嘅时候佢就问我有无兴趣做，我就答有啦点会无，我自己都想喺香港做番啲嘢，始终都系个香港仔，无理由全线内地发展，所以就今次就做咗呢只《a better bee》。其实我自己都系Hifi发烧友，做咗咁多年音乐，耳仔都尖啲，听音乐自然会好有要求，一般用电脑做嘅音乐已经满足唔到我，所以我依家就算做音乐，我希望做啲有质感嘅音乐。所以既然有人揾我做Hifi碟，我紧系会做啦！”

一向喜欢收藏结他的B哥哥，终于新碟把珍藏大派用场，多首歌曲结合了不少其宝贝的声音：“今次出碟我好紧张，乐手弹嘅每一个音我都好讲究，好有要求。而且同Hifi德（太极乐队吉他手刘贤德）合作，佢仲会设计Hifi方面嘅细节，讲得细致啲，我重新灌录《让一切随风》，今次有别于以往录歌只系用一支木结他或电结他再用技术调教，而系用上好多唔同嘅真结他。而另一首《红叶斜落我心寂寞时》又系，用上好多唔同嘅结他去做，加上Hifi德本身有收藏好多特别嘅结他，而我自己本身又系一个结他发烧友，收收埋埋有好多结他，今次呢只碟可以拎番哂出嚟，满足唔同音乐上嘅要求。”

谈到与叶彤合作拍《要是有缘》MV，“我好开心，我同佢系因为拍电影《表错七日情》而认识。如果大家有睇过呢部戏都会知道入面有两首歌，分别系《一段情》，仲有《要是有缘》。今次《要是有缘》揾番叶彤合作，系因为当年佢凭著《表错七日情》而攞影后，《要是有缘》编曲唱法加上时代感之如，MV揾佢，翻演昔日《表错七日情》男女主角多年后重聚嘅故事，我哋仲系MV都有加插返当年电影片段，今次同佢合作，感觉真系好深刻。其实我同叶彤自从拍咗《表错七日情》之后，我哋好老友记，到最呢几年，我哋系差唔多每一个月都会聚一次，每次都好开心，唔讲公事。今次叫到佢帮忙，佢都话当咗呢首系佢自己嘅歌，所以佢嘅帮手，令到呢首歌嘅MV更完美。”

钟镇涛在新碟《a better bee》把自己的经典重新灌录昔日经典，B哥哥表示自己的演绎方式有别于从前：“其实唔同嘅时间去唱同一首歌，感觉都会唔同，歌手嘅声音会变啦，唱嘅时候感受都会唔同，我依家唱番都觉得有好大嘅分别，好似自己跳咗出嚟睇番歌曲入面嘅故事。”

问到新碟内B哥哥再次与囡囡钟懿合唱，B哥哥马上四万咁口：“阿囡佢一向都钟意音乐，不过佢唔系钟意我𠮶啲，佢读国际学校，所以自然都钟意听新潮啲嘅英文歌，所以我每次想知外国有咩hit歌我都会问佢。讲开钟懿，除咗钟意听歌佢真系好钟意唱歌，所以喺今次嘅《a better bee》入面佢都有参与一首歌叫《闪闪星辰》。呢首歌亦系当年我个人发展嘅第一首粤语歌，对我嚟讲呢首歌好有意义，所以今次就特意重新编曲，同钟懿一齐合唱。”

B哥哥接著大赞钟懿：“同钟懿录音嘅时候佢好乖，无乜意见分歧，我工作嘅时候我个人系会好紧张，会好有要求，同佢录音时我都会对佢有要求，但钟懿喺呢方面同我好唔同，佢会好心情轻松；佢系可以将一样其他人觉得好难嘅嘢，三爬两拨完成，完全系我意料之外。录音𠮶日，佢用咗一个钟就录完，佢只系担心录完音之后我会唔会带佢去食面！哈哈哈！”

B哥哥多次强调他很紧张音乐的成品，原来他对小朋友生活习惯，同样紧张：“佢依家处于成长期，我好关心佢嘅饮食习惯，小朋友唔可以食太多糖份，不过今次录音咁成功，所以我都有奖励佢饮两杯阿华田（吓！好似好惨）其实我都系以佢健康为先，畀佢任食会影响佢成长，你谂吓如果佢唔长高变咗打横发展，成件事系唔系好唔过瘾！？所以小朋友嘅饮食，家长系要帮手注意。”B哥哥说。

B哥哥​：真系女大十八变

钟懿曾接受传媒访问时表示希望做歌手，但B哥哥认为依家囡囡越大想法越多，现时似乎未有想法去当一位歌手：“我觉得佢同以前嘅谂法唔同咗，佢以前系抢住接受访问，记者明明访问我，佢都要帮我答，但系佢依家唔系啦，但依家我叫佢，佢都只系抱住我叫佢做佢先做嘅心态，所以真系女大十八变，佢一直都变紧，所以将来佢会唔会做歌手都未知之数，不过佢钟意音乐系事实，以前我叫佢弹结他都唔肯弹，依家想叫佢放低支结他佢又唔肯，所以女仔真系会一路变。”

唔经唔觉B哥哥已经64岁，睇相又真系少少都唔似，而且仲好Chok得！唔信？睇下你就知！