Soler隔三年再出广东歌　细佬Dino：我哋无离开过乐坛

乐队Soler时隔三年再次推出广东歌，令一众香港歌迷亦大感兴奋，除了看到二人的身影经常在电视上出现外，深信不少人也很想知道他们这几年来在音乐上的发展，到底是变成了一个单纯的兴趣，还是在韬光养晦，等待适合的时机？

Soler成员Dino接受《香港01》访问时表示：“其实我哋作为音乐创作人，一直都有写吓嘢，未必系完整一首歌，比较似系有一旧旧idea放咗喺度。而我哋计划中，就会由今年开始向2018年发展。因为做音乐只系我哋工作其中一部份，我哋一向嘅卖点都会系现场音乐，CD会比较似系我哋演出嘅推广，所以我哋喺中国南部，例如广东，都有好多歌迷支持我哋，钟意我哋唱广东话。之前我哋试过出国语碟、英文碟，反而好多歌迷会话‘OK，我哋都支持你，不过我哋都系最支持你哋嘅广东歌。’所以我哋嚟紧都会喺香港、澳门、广州呢几个地方做宣传，其实好简单，有人支持，我哋就会唱。”新歌的编曲已差不多完成，Dino透露：“音乐部份就搞掂晒，而家争歌词未写好。我哋最近同填词人都倾咗好多计，系关于我哋点睇香港、点睇呢个世界，睇吓佢会点样将呢啲故事写出嚟。”

提起新歌以外的动向，Dino宣布喜讯：“嚟紧我哋九月会去意大利演唱，去到𠮶度我哋就系唱比意大利人听，一样会唱广东话、国语、英文同意大利文。我哋希望行自己一套嘅国际路线，唔系去到美国就唱英文，中国就唱中文。无论去到边度，我哋唱乜，当地人就听乜，都系唱比佢哋听，不过呢个系需要时间去做好跨地嘅关系，所以我哋感觉上做音乐会比较慢。而且我亦放咗好多时间喺家庭上面，Julio都一路搞紧画展嘅事情，所以我觉得我哋出到三首歌其实都好好。”

Soler在2005年出道，但由于合约问题，故此一段时间也较少在香港露面，同期不少歌手如方大同、谢安琪已成为乐坛班霸，他们又会否觉得自己走慢了？Dino回应指：“其实我哋喺香港少露面嘅时候，反而喺广州做多咗嘢，我哋有五年系放咗好多心血喺𠮶个地区，所以点解我话我哋喺中国南部会有唔少人支持。当然我哋亦都认为今年系适当嘅时间返香港发展，好似同一班老朋友分享我哋嘅音乐咁。”

而Soler在香港乐迷心目中最大的印象，应该也离不开咀香园的广告歌，对此Dino开玩笑说：“好多人以为我哋系卖饼，我有时都会觉得好好笑。有啲人睇完个广告以为首歌系我哋写嘅，不过其实首歌系间公司本身就有，我哋只系改编。我觉得无咩所谓嘅，呢个系商业世界好难避免嘅嘢，我哋想推广自己嘅音乐唔代表一定做得到。”