郑伊健巡唱伦敦站3度眼湿湿 低潮时感激Wyman《新歌》

郑伊健“HERE & NOW EKIN IN CONCERT 2024 LONDON”当地时间7月6日晚上，在英国伦敦Eventim Apollo举行，两度encore，歌迷反应热烈，伊健感动3度唱到眼湿湿，唱《我的歌》时他强忍泪水继续唱。小师妹黄淑蔓Feanna冧庄随团演出，与伊健师兄合唱《一对对》、《心照》和《For U & Me》等，她同时亦担任乐队和音，多才多艺。

今次巡唱伦敦站仿如“大型K房现场”，因为无论伊健唱《友情岁月》、《一生爱你一个》、《感激我遇见》等冧歌，还是《极速》和《自动胜利Let’s Fight》等快歌，都全场观众大合唱。歌迷更热情地挥动灯牌、手机灯星海，甚至涌到台前握手，非常投入，就连小师妹黄淑蔓Feanna唱伊健出道柠檬茶广告歌时都跟住唱，伊健见状即兴重演广告情节和经典对白，台下尖叫声不断。适逢开骚当日举行欧洲国家杯赛事，伊健说：“我第一次英国开骚，好难得，多谢你哋选择唔睇波，嚟睇我演唱会！”

伊健台上演唱多首经典作品《Beautiful Day》、《吻感》、《心照》、《发现》和《我的歌》等，都出自填词人黄伟文Wyman手笔，当晚他亦是座上客。伊健说：“我做咗歌手好耐，你哋知唔知我有段时间无唱歌？跟住就开咗一次演唱会⋯⋯其实当时我好担心，因为好耐无做过，点算呢？周边啲人同我讲‘唔使惊架’、‘畀心机啦’。陈光荣话写只歌畀我，写咩歌好呢？我好好彩遇到黄伟文Wyman，佢今晚都有嚟！”全场起哄。伊健续说：“其实佢写咗好多畀我，头先我都唱咗好多首都系佢填词。但呢首歌好特别，叫做《新歌》，我唔知大家有无听过，因为𠮶阵时我低低地潮，有新作品都未必咁多人知道。”这是伊健2009年发表的作品，同年年底在红馆举行个唱。

“讲返呢只歌，点解叫《新歌》？当年我睇歌词问点解，点样‘新嘅我’？𠮶阵时理解能力有限。但今日攞返首歌出嚟，我同陈光荣讲：‘哗，原来呢首歌唔系讲我㖞，系讲一个人生。’我唔识讲，不如唱啦！”伊健被歌词感动眼湿湿。唱完他深呼吸，整顿情绪后唱出演唱会最后一首歌《Together》，他说：“做人要开心啲！”舞蹈员带埋几袋crew tee“手信”出场，与伊健一齐抛入观众席，全场兴奋站起来，非常热闹。

完场歌迷不散场，狂叫Encore后伊健再度出场，他唱《动地惊天爱恋过》时看到台下歌迷全部站起来，挥动手机灯，他又再眼湿湿更一度哽咽，观众欢呼声和掌声打气。他说：“所有歌真系唱晒，导演叫我出嚟唱多首歌。点都好，多谢你哋，无离开，Thank You！我演唱会有个特点，就系希望大家开心，所以点都要加多只歌。希望大家开心咁离开呢个地方，记得我哋今日聚过，希望后会有期。”以《你的我》为巡唱伦敦站划上完美句号。接著，本周六（13日）伊健带埋Feanna到马来西亚云顶继续巡唱见歌迷。

而Wyman在IG先后出了3个帖，分别与林珊珊、陈光荣和郑伊健合照，细数与他们认识的点滴。其中他表示好欣赏伊健：“相识接近30年，从来未试过同台食饭，相熟程度自从我冇做DJ嘅1998年开始，一直以‘每5年倾到3分钟偈’嘅速度爬行，但冇压力，因为冇预定要去嘅目的地。亦完全无损‘工作时互相信任、做人时互相尊重’嘅优雅距离，系，即系有距离，但系系优雅嘅。欣赏嘅人，唔使个个都做到好朋友嘅。我欣赏佢咩？佢系我识得嘅人里面，其中一个‘最初心’‘最无被世界改变嘅人’。”至于陈光荣，Wyman公开要求他举行作品展：“陈光荣先生，你快啲搞作品展得唔得？你啲好歌都储够有凸啦！”