李芯駖成COLLAR第三位出单曲　间谍造型真空拍MV超性感︰芯门大开

李芯駖（Sumling）昨日（10）推出首支个人单曲《SPYLING》，是继邱彦筒（Marf）、陈泳伽（Winka）后，第三位推出单曲的女团COLLAR成员。作为“单飞”头炮，曲风以她擅长的跳唱快歌为主，再配上间谍故事为题，而日前拍摄MV期间，芯駖以性感的间谍造型上阵，大骚香肩之余，更真空示人，就连她亦笑言是“芯门大开”。

歌曲《SPYLING》讲述生活中每个人都好似一位间谍，为避免被别人看穿心中想法，会作出掩饰，但这样生活却很累，倒不如放低一切人设，爽快、诚实地活着，给自己喘息空间。为迎合故事主题，Sumling在MV中以间谍造型上阵，她说：“一听首歌嘅Demo就想起《职业特工队》汤告鲁斯倒吊个画面，于是我同填词人倾，好奇妙佢都有同感，而且佢谂起一本书《像间谍一样思考》好衬呢首歌，于是用咗呢个题材发展今次首歌，而我又将自己好多想法都交畀MV导演，最开心今次MV加入我最喜欢嘅黑白元素，所以好期待。”

提到MV造型大开中门非常性感，芯駖自言早有心理准备：“知道MV以间谍为主题，造型师早就同我讲啲衫一定好贴身，叫我有心理准备，而我知道后亦第一时间去每日都做体能训练、游水、跑步、踩单车，加上食清淡啲，令自己瘦身啲同Fit少少。”芯駖续说首次出歌，心情既紧张又兴奋，不过来到MV拍摄现场，心情反而比想像中放松：“之前七个人拍MV都咁辛苦，我好惊一个人拍会好辛苦，加上冇队友喺身边，起初都有啲担心，但嚟到见到所有安排都准备得好好，反而心情放松咗。”

芯駖得悉首次“单飞”出歌后，竟不敢第一时间跟妈妈分享消息，她表示：“冇同妈妈分享，惊佢担心，所以专心做好先，作品完成后会同佢讲，但会畀心理准备佢，会有好突出造型。反而第一个问我系咪出歌嘅人系Day（许轶），佢仲问我可唔可以听吓首歌，佢听完话好好听，仲问我可唔可以畀个MV佢睇，我话拍咗先再畀佢；其实我未出歌时，Marf都成日send好多歌畀我，话觉得边首歌啱我，所以出歌我都问大家意见，因为我有选择困难症。”

提到去年Marf与Winka“单飞”都有不俗成绩，芯駖成为第三位“单飞”成员又可有压力？她称：“如果我话冇就假嘅，压力来自做得好唔好，冇谂过奖项，过程中好多人畀咗好多心机、资源、空间，我唔想浪费，希望做一个好作品、大家钟意系最重要。”