以“放养”模式教儿子训练自理　Coffee林芊妤拣学校只考虑一样嘢

林芊妤（Coffee）近年家庭事业两得意，不但成为炙手可热的瑜伽老师，亦经常在Insatgram分享和家人的相处点滴，一家三口非常幸福。Coffee囝囝翟德彦（伯伯）是最受欢迎的星二代之一，不少网民大赞伯伯自理能力高。Coffee就表示自己用放养的方法教伯伯，
“而家好多家长太过保护小朋友，但我自己就唔太紧张，就算囝囝整亲、跌亲，只要唔系好严重都好少理。”
（摄影：郑子峰）

Coffee经常在Insatgram分享和囝囝的相处点滴，疫情下Coffee经常会和囝囝留在家中，“通常会喺屋企油颜色、水彩印手画画，亦都会整嘢食、睇书、运动、喺露台踩单车等等，其实一啲好简单嘅活动，小朋友已经可以学到好多嘢。”

Coffee亦补充，囝囝非常喜欢睇书“我会拣一啲佢有兴趣嘅书，甚至会畀佢自己拣。其实佢呢个岁数唔系要佢从书本学到好多嘢，最重要反而系培育佢揭书嘅习惯。”除此之外，Coffee亦会同囝囝去行山，“其实情况许可、唔危险嘅环境下我好少拖住佢，佢自己可以行好多路，我亦都鼓励佢周围探索、触摸新事物。”

被问到如何训练伯伯多年自理能力，Coffee就笑言是用“放养”模式教育。“其实我觉得人应该错误中成长，小朋友亦唔例外”，所以访问当日伯伯行楼梯跌亲，Coffee都会要伯伯自己企起身。

“喺屋企我会尽量叫囝囝帮我手做嘢，例如掉垃圾、帮妈妈拎嘢等等，亦都会提佢要有手尾，慢慢伯伯就唔钟意爸爸妈妈帮手，就算赶住出门，佢都会坚持自己著袜。”Coffee认为家长应该要给小朋友多些时间，“好多家长无耐心，会急住帮小朋友著衫、著袜，但系其实小朋友系学习紧专注，父母咁样就阻止咗小朋友学习。”

Coffee亦表示，为伯伯拣学校的唯一要求就是开心：“幼稚园期间最重要系有个地方俾小朋友学习群体生活，有能力嘅，读边间都学到嘢。所以我唔会追求名校，最紧要伯伯有开心嘅童年。”

日前林芊妤（Coffee）带儿子出席“海洋公园Chill级保育计划”活动，了解保育珊瑚、海洋生物的重要性。Coffee事后指，看到死去的海豚感到反思。“保育真系好重要，我会畀囝囝睇好多有关海洋保育嘅书，等佢可以有保育嘅意识。另外家长日常生活应该以身作则，因为家长系一块镜，好多时候小朋友会跟住父母做事。”

Coffee亦提及，保育环境对于下一代的生活息息相关，“小朋友系我哋下一代，作为上一代嘅我哋已经慢慢改变思想，例如唔用饮管、外卖唔要餐具、用环保袋等等，其实系非常好嘅进步。我而家同囝囝行山亦都会带垃圾袋沿途执垃圾，落山后丢喺回收箱，唔好觉得得自己一个做无用，其实多你一个好多！”

相关文章：Coffee林芊妤大赞老公是最强大后盾　张继聪陈豪被誉为圈中好老公