【新冠肺炎】妈妈唔敢带婴儿出街　医生上门打疫苗：迟打会有危险

受新冠肺炎（COVID-19）疫情影响，大家多了时间留家抗疫，出门也变得人心惶惶。在疫情阴霾下，刚诞下婴儿的新手妈妈更为忧心，甚至不敢带孩子到母婴健康院检查及打疫苗。有见及此，有医生提供亲自上门疫苗接种服务，让婴幼儿依时得到有效防护。
摄影：黄舒慧

延迟接种疫苗　有一定危险

钟伟杰医生毕业后一直在疫苗中心工作，约于三年前开设疫苗诊所，为成人及婴幼儿提供各种疫苗接种服务。“开设诊所是希望宣传全民打流感疫苗。那时候政府未开始到校为学生打流感疫苗，香港亦曾出现流感死亡个案，大部分死亡的儿童都没有接种疫苗。冇可能香港作为一个大都会，有咁多资源，接种率竟比澳门低，这是一件很羞耻的事。因为冇打疫苗，而要令小朋友入ICU（深切治疗部）或者死亡，简直是荒谬。”

钟医生遂为诊所添置各种疫苗专用仪器，如从外国订来专用的疫苗箱，并开拓外展服务，走入社区，到学校、企业，为大众接种疫苗。年初新冠肺炎来袭，他笑言，与同行医生口中得知，大家的工作量也少了，灵机一触，便推出上门服务。

“疫情来到，大家都唔敢出街，好多妈妈惊到连疫苗都唔敢打。有啲人甚至话俾我听，‘其实母婴健康院就喺楼下㗎咋，我都唔敢落去’，又或者出街BB仔又唔肯戴口罩，又要搭交通工具，佢哋都唔想。我心谂，小朋友疫苗，尤其2、4及6个月的初生婴儿，其实很重要。因为疫情而延迟疫苗接种，就即系延迟保护。横掂我哋软件、硬件、经验都齐备，不如试吓推呢个服务出去。”

上门前，钟医生会事先与妈妈沟通，要求她们上传针卡。“要知道BB出生日期、打过乜嘢针、打过边只牌子。口服的轮状病毒疫苗就最tricky（棘手），因为过咗某啲时间就唔食得，食咗会增加肠套叠嘅风险，令条肠塞咗。发生喺BB仔身上都几危险，要做手术。有研究指，如果BB仔太大个食轮状病毒疫苗，风险会更高，所以一定要计得好清楚，佢几时出世、之前有冇食过、食过之后最少要隔四个礼拜再食，计错咗就会有危险。”

医生上门更安心

疫情之下提供上门服务，钟医生也会设法令妈妈感到安心。“妈妈首先忧虑究竟我哋有冇受感染，会话俾佢哋听我同姑娘系会定期做新型冠状病毒抗体快速测试，令佢哋放心啲。”每次出勤，钟医生会与护士同行，入屋前会换上全新口罩，并带备酒精搓手液。“基本上喺佢未开口之前就搓咗手先，再戴手套，先再做其他嘢。有啲妈妈会问‘你上嚟会唔会换衫？’衫就唔会换，不过会预备干净的保护衣，应家庭要求，都会著入去；亦有啲家庭问会否介意喷酒精喺我哋身上，我哋都话冇所谓，明白佢哋嘅忧虑，都会尽量配合。”

他补充，虽然传统上多是护士负责疫苗接种工作，但他笑言，毕业以来也累积不少经验，对自己的技术有一定信心。“打针嘅话，姑娘打同医生打，传统嚟讲可能姑娘打得仲好啲添，但经过我手嘅冇一万都几千，我相信我打针嘅技术都拍得住姑娘！而喺妈妈角度，可能有个医生上去，佢哋更会安心啲。”

面对疫情 不宜过分紧张

打完针后，钟医生会给予家长退烧药及用作纾缓伤口红肿的冰包。他亦会常备急救针，以应对婴儿即时的严重过敏反应。“喺诊所工作当然方便，所有工具都喺哂到。但上门打针，最惊就系带错针、带漏针。每次出去之前，都要反复核对，去到冇针打就好狼狈。”但对孩子而言，在家打针，过程大多更为顺利。“听返啲妈妈讲，小朋友在家打针嘅表现会好啲。始终喺屋企，一个佢哋熟悉嘅环境，打完针，通常妈妈抱返就唔喊，唔同喺诊所喊到拆天。”

疫情之下，他认为新手妈妈也不用过分忧虑。“其实香港人真系做得好好，世界冇乜边个城市，尤其西方国家可以做到全民戴口罩，而其实大家可以睇到戴口罩嘅成效。除了新冠肺炎，今年嘅流感都提早咗完结。以往去到3月才是高峰期，今年2月头已经完咗，只持续了大约一个月，感染数字亦比过去几年低。唔系病毒弱咗，第一原因系戴咗口罩，防疫意识强咗；第二原因系停咗课。面对疫情，基本防御措施系要做，但又唔使真系好紧张，令自己精神压力太大。尤其妈妈整到间屋一尘不染，其实都唔系咁好，因为小朋友始终都要接触过一啲致敏源，日后先无咁容易敏感。点解香港啲小朋友特别多哮喘、湿疹，就系因为细个嘅时候妈妈照顾得太好。”

钟医生分享，部分在疫情下出生的婴儿，自出院后也未曾返回健康院接受检查。“有妈妈要求会唔会可以做埋度高磅重，担心佢哋生长磅数系咪正常，我哋都会拎埋个磅上去，尽量满足佢哋。疫情减退之后，都希望继续上门服务，可能会添加一啲成长发展，例如听力、大小肌肉评估等。”