【筋肉宝宝养育记】妈妈在身边　BB特别曳？│Kylife

唔知大家有冇发觉小朋友喺自己面前特别曳呢？
我同老公一个系全职爸爸、一个系半职妈妈，平时筋肉宝宝日头会由婆婆照顾，下午收工我返屋企就到我睇住佢，所以好多时婆婆睇到筋肉宝宝由唔同人照顾嘅反应可以相差好大！

我哋凑 vs 婆婆凑

如果婆婆凑佢，拖地时叫佢坐定定喺沙发唔好落地，佢就真系乖乖地等。不过我放假喺屋企叫佢坐定定，佢会周围走，仲要边走边对住我笑！其他人照顾佢（唔常见嘅亲戚），佢直头会变咗第二个BB，系乖到不得了嘅BB！叫佢做咩就做咩！

瞓下午觉嘅情况，婆婆氹5分钟内就会训；我起码要氹接近30分钟。因为好多时一入房佢以为我要同佢玩，所以佢会周围爬周围玩，完全唔瞓！

以往我哋同佢去街街，未到大门佢又要人抱抱，又或者甩开我哋手想自己跑！不过原来婆婆同佢去街系可以慢慢拖住佢行到好远都唔扭计！

我哋教导 vs 老师教导

我哋最近同佢去Playgroup玩嘅时候，筋肉宝宝系完全不受控同唔听指令，拉佢埋去睇老师做咩，佢就会又喊又走！只不过我哋去多几次，发觉原来只要老师单独同佢讲，佢当下真系会听同会跟住做一阵！

虽然曳曳多，但都总发掘到佢嘅乖乖之处！虽然我喺度佢会特别曳，但多数我煮嘢比佢食，佢都会主动叫我抱佢上BB櫈食嘢，又会等我睇住佢慢慢食，呢一样系婆婆好少经历到嘅部分！

你哋嘅小朋友系咪同筋肉宝宝一样，父母喺度就特别曳曳呢？

Kylife与二宝之日常 ​ （Facebook专页，Blog）

亲子 X blogger X 享受每天与囝囝共同成长的日子

【编按：文章题目为编辑所拟，原题为“,【筋肉宝宝养育记21M】BB有一种曳叫妈咪系度特别曳”​】

（以上文章内容均属用户提供，香港01不为任何用户内容而衍生或遭受之任何损失或损害承担责任。）