【亲子好去处】南丫岛渔民文化村　88蚊摸海星钓鱼喂鱼│Nat妈妈

今日天气唔算好晒，我哋约埋几个朋友仔去咗南丫岛玩，参观左南丫岛渔民文化村 Lamma Fisherfolk's Village，食埋海鲜、豆腐花、茶果，玩足大半日！南丫岛大家去得多，南丫岛渔民文化村大家又听过未？【编按：作者为Nat妈妈】

我哋10点出发，由中环搭船去南丫岛索罟湾，船程大约40分钟。落船转右行几步就到南丫岛渔民文化村嘅售票处。

门票：普通门票成人$80，小童/长者$60

如果想多4张游戏券同一份小食，就可以买成人$128，小童/长者$88

游戏券好有用㗎，可以换鱼仔喂鱼！买完飞之后，工作人员就会安排免费穿梭船去文化村，其实搭一两分钟就到。

一上到岸已经有好多舢舨、两只龙舟畀大家影相！

影完一轮相，睇吓人哋钓鱼，食下鱼蛋；之后就去参加导赏团。

导赏团每个钟都有，唔使特别预约。门票已经包左导赏团嘅费用，成个导赏团都好有趣，大人小朋友好投入。

我哋先参观古渔船，睇吓水上人家点样喺船上生活，同埋认识下一只渔船嘅结构。

之后就逐个喂鱼区睇，工作人员会介绍各种鱼，今日见到沙巴龙趸、魔鬼鱼、各种班、墨鱼等等。 工作人员会示范喂鱼，个个见到啲鱼争住食嘢都好兴奋。

然后就去咗一个池，介绍一啲喺附近水域捉到嘅海洋生物。有海星、马蹄蟹（即系 “ 鲎”）、毛蟹、小鲨鱼等等。工作人员会用网拎起海星同马蹄蟹，大家可以伸手摸下！

导赏团完咗之后，我哋就去咗玩“无钩钓鱼”。一张游戏咭可以换一条鱼来做“无钩钓鱼”。工作人员会将条鱼绑好，跟住拎住支竹竿，就可以去旁边嘅无钩钓鱼区钓鱼啦！

放啲鱼饵落去钓鱼，原来都几刺激，因为啲鱼会好大力咁食咗啲鱼饵。我哋掌握唔到钓鱼嘅技巧，空手而回。不过几个小朋友就睇到哗哗声！工作人员话真系会有人钓到鱼，钓到的话可以免费拎走，仲可以拎返去南丫岛叫餐厅煮嚟食！

Natalie同朋友仔就最钟意喂鱼，两张游戏卡就可以换到一桶鱼仔，基本上个个喂鱼区都可以去喂。经过试验，墨鱼就唔太肚饿、魔鬼鱼就好难喂到佢食、沙巴龙趸同鲈鱼𠮶个池啲鱼最踊跃！平时去到街市又嫌腥又嫌污糟嘅小朋友，嚟到呢度竟然肯戴起手套、拎起一条条嘅死鱼喺度喂，真系一个好好嘅体验！

如果唔想玩啲体力咁消耗嘅活动，你可以用四张游戏卡玩一个材料包做手工，可以整小帆船、风铃、钓鱼游戏等。之后我哋就喺鱼排行嚟行去、荡千秋、影吓相，玩到够就揾工作人员安排我哋搭返接驳船去南丫岛，大约等咗5分钟就有船送我哋出去。

其实南丫岛渔民文化村都有啲简单嘅食物，不过我哋一心去南丫岛食海鲜！之后就去咗富记食海鲜，我哋七个大人四个小朋友，食咗炒蚬、油盐水煮蚬、海鲜汤、白灼虾、清蒸沙巴龙趸、富记炒饭、豉油王炒面、炒左碟菜，最尾仲送鲜甜嘅菠萝，埋单大约$1500，食物都几新鲜好味，性价比唔错！

最尾见未够钟上船，我哋又行多几步去睇咸鱼，去仁记买豆腐花、茶果、糯米糍，终于玩到够钟先上船! 大家都非常尽兴！

备注：

来回中环同索罟湾嘅船班次唔系好密，如果大家唔够脚骨力由索罟湾行去榕树湾，咁就要睇清楚搭船嘅时间啦！南丫岛渔民文化村嘅洗手间好干净，绝对唔系好似平时大家去郊外嘅公厕咁样！南丫岛渔民文化村大部份地方都系露天㗎，天气好嘅时候要做足防晒措施。

有关南丫岛渔民文化村更多嘅资料可以参考官网：http://lammafisherfolks.com.hk/tc/

作者简介：Nat妈妈

Facebook专页：Natmama亲子育儿生活志

大女Natalie细佬Nathan自从做咗Nat妈妈之后忽然发现时间太少但想做的事太多记性太差但想记下的事太多的起心肝开始写低做过的/玩过的/用过的/吃过的/经历过的～

【编按：文章题目为编辑所拟，原题为“$88玩齐摸海星、钓鱼、喂鱼@南丫岛渔民文化村”​】

（以上文章内容均属用户提供，香港01不为任何用户内容而衍生或遭受之任何损失或损害承担责任。）

***作为父母，每逢假日或长假期，都为了谂节目而头痛，如果你有好玩及难忘的本地及外地玩乐推介，欢迎你跟我们分享，请把你想分享的内容、行程、相片及联络方法传至parenting@hk01.com。 ***