【鹿儿岛亲子游】BB一岁未够有咩玩？Wilma妈 4日3夜行程分享
6月头Wilma妈伟大嘅老细请全公司同事去鹿儿岛4日3夜，因为芊羽系要奶睡嘅BB，我就唯有带埋佢去，丢低心里暗喜嘅爸爸。行程只有Day 1同Day 2嘅晚餐同同事食饭，其余时间都系自由组队活动，带住一个BB嘅我，实在唔想要畅快旅游嘅同事照顾，所以就成为独行侠喇，而且佢哋已经照顾咗我同芊芊好多。鹿儿岛主要系个行山睇景影靓相嘅地方，事前Wilma妈尝试search过亲子游行程，发觉好多地方都唔适合同1岁未够嘅BB去；樱岛睇火山但太多火山灰、雾岛有神社吸灵气但BB冇咩睇、仙岳园适合小朋友去但芊羽太细、屋久岛靓绝，但对于要带住小BB同妈咪袋等装备嘅妈妈们就handle唔倒喇。经过多番考量，Wilma妈组合咗以下行程，顺利完成！大家如果谂住带小B去鹿儿岛育儿行可以参考参考。【撰文及拍摄为Wilma妈】
Day 1：傍晚到达，先作休息坐HK airline往鹿儿岛市嘅11:50a.m.航班，我哋系住中央站附近嘅酒店，由机场去大约一个钟，去到酒店安顿已经傍晚6点。呢日嘅晚餐同同事食串烧，然后去到Aeon扫咗一支大水同杯面以防大食妈妈夜晚肚饿，就返酒店休息。Aeon收9点，如果冇带齐BB食物或执漏用品可以Day 1先嚟补给。而便利店系冇BB嘅即食固体食物㗎～
Day 2：平川动物园一直纠结到底去水族馆定系动物园，最后见tripadvisor 评分系平川动物园较高，就决定咗我哋Day2行程。由中央站撘JR往指宿方向喺五位野站落车，再步行20分钟，就会几经辛苦到达动物园。但要有心理准备步行唔易行，有大暗斜⋯…沿路系马路，得饮品售卖机补给。入到园区，就立即见到足浴池同迎面嘅长颈鹿，园内有141种唔同动物，睇动物嘅距离好近，可以喂兔仔羊仔，有跑埋脚边嘅公鸡，亦有一绳之隔嘅袋鼠。有别于香港同国内，环境干净整洁，就算动物例如鳄鱼，潜入水都可以清晰可见。而且沿路有“顺路”指示牌，唔会有miss咗嘅区域，初时Wilma妈预期用两个钟快行，行足3个几钟先够睇。
呢个动物园嘅性价比好高，除咗动物，仲有摩天轮同碰碰车等小量付费游戏。虽然路途稍远，但都好值得去平川动物园开放时间：9am - 5pm入场费：成人500円 / 中小学生 100円 / 幼儿免费婴幼儿设施：园内婴儿车租赁 300円 大量多用途洗手间及育婴室（每步行五分钟都见到一个！）交通：1）JR鹿儿岛中央站→五位野站（乘坐指宿枕崎线约25分钟）五位野站→步行平川动物公园（步行约20分钟）2）巴士（鹿儿岛交通公司2号线、每隔20分钟一班、车程60分钟）鹿儿岛站前（水族馆前）→天文馆→高见马场→郡元→谷山站前→五位野站前→平川动物公园
去完动物园，下一站系最期待嘅婴儿用品疯狂购物。Akachan同西松屋对妈妈们黎讲未必陌生。未出发鹿儿岛Wilma妈已经search定去哂两间朝圣嘅路线同分店地址。先撘返指宿线去到宇宿，步行10分钟，就会去到西松屋，对面商场2楼就系Akachan，简直一石二鸟！
西松屋系日本知名嘅婴幼儿连锁店，佢亦有做网店，唔少香港嘅妈咪都有喺网上买佢嘅衫仔。佢主打平价路线，质地系冇咁好，但绝对可以接受。而鹿儿岛呢一间分店胜在冇乜人，货品亦算齐全，Wilma妈喺呢度买咗浴衣、衫仔、泳衣、玩具、BB小食俾芊羽同朋友嘅小朋友做手信。呢间分店好似已经算系几细，但系单拖凑住魔王芊行动物园行到筋竭力疲嘅我，依然喺呢度行咗成粒钟……
再嚟就系性价比更高嘅Akachan，首先要强烈建议大家认住佢嘅日文写法，因为佢个铺面系完全冇英文，系商场外面如果你唔知佢个日文名你根本唔会认到佢。第二个建议，就系大家最好去咗Akachan先去西松屋。因为Akachan嘅货品比西松屋更靓更多！
宇宿分店系上年11月先开张，店舖面积目测2000呎，由怀孕期需要嘅用品到小朋友3岁嘅衫都一应俱全。自家牌子嘅质地极好，浴衣更加系必买又抵买单品。但因为Day2约咗同事晚餐嘅关系，喺呢度匆匆半小时就要赶车，完成咗我哋Day 2。提外话，同事们两晚都去我哋酒店楼下嘅屋台村，感觉地道，影靓相同饮酒倾计一流，如果冇带小朋友可以一战！
西松屋宇宿店地址：〒890-0073 鹿児岛県鹿児岛市宇宿2丁目2−18 宇宿ショッピングセンター内2阶营业时间：10am - 9pm
Akachan宇宿店地址：〒890-0073 鹿児岛県鹿児岛市宇宿2丁目3番5号 オプシアミスミ2阶营业时间：10am - 9pm
Day 3：指宿疯狂影相、天文馆扫货呢一日我哋嘅行程较为随意，去到原本应该更早嚟嘅指宿。指宿呢个地方有好多景点，例如沙浴、温泉、传说有水怪嘅池田湖、人工嘅花海。一出车站，就有南国小岛嘅感觉，有好高嘅树。原本打算食嘅流水面，但因为要赶上预早订咗嘅特别列车，最后转移阵地，我哋去到日本最南车站—西大山。
由中央站乘撘一个钟嘅车程（注意，去西大山班次唔密），芊羽比爸爸更叻，去到日本至南。呢个车站本身系冇人嘅🛤，得一个写住“日本最南车站”嘅打卡必影牌，一个有好食抹茶软雪糕嘅大型士多，一个代表幸福嘅吊钟，一个黄色嘅邮箱。但因为天色好靓，又有绣球花，喺呢个地方，Wilma妈同芊羽影咗几十张相⋯返到指宿，我哋坐预先订飞嘅不停站特别列车指宿玉手箱号（要喺JR网站登记成为会员再预订）返中央站，沿途可以望到好靓嘅海景，令人脑袋放空呢～
返到中央站，购物狂Wilma妈Day2 Akachan未够喉，又再去多次宇宿akachan补买一堆战利品，满载而归返酒店。
夜晚7点，我哋喺酒店休息咗一阵就撘巿电去天文馆。天文馆系一个商店街，妈妈们要买药妆同手信都可以喺到揾齐。但当然，相比大阪等大城市，天文馆大概只有三分一嘅舖头，系一个一两个钟行哂嘅地方。
Day 4：中央站Amu plaza最后扫货临完结育儿之旅，Wilma妈作最后冲刺，黎到中央站Amu plaza。呢个商场非常好行，有大人嘅衣物、玩具精品，有一层更加系本地儿童服装集中地，如果妈咪系钟意买嘢，呢度可以消磨一个下午。我就同扭眼瞓嘅芊羽，去到商场顶层影贴纸相，完美结束我哋今次飞甩爸爸日本自由行旅程喇！总结呢4日3夜1on1之旅，日本拥有极完善育婴设施，确系带小B去旅行嘅最理想地点。一路上嘅多功能洗手间，卫生嘅街道环境，见Wilma妈一个女人仔抱住扭抱BB又抽住BB车上唔倒有一大级嘅JR忍唔住热心帮忙嘅乘客，令我哋顺利完成旅程。虽然芊羽大个肯定唔会记得呢段回忆，但妈妈唔会忘记呢个属于我哋两个人嘅小历险。
《香港01》App，浏览更多亲子资讯，立即下载： https://hk01.onelink.me/FraY/hk01app