【见习妈妈凑仔经】我的队友
记得我们初相识既时候，我老公系唔喜欢小朋友，咁唔讲得上憎，但就系⋯对小朋友没什么感觉，唔会觉得佢哋得意，又唔会想同佢地玩咁啰！直至我陀住阿仔，我老公系喜悦嘅，但我知佢心目中嘅责任，压力同不安感比期待大。相比我一心一意寄望孩子健康出生的那个份纯粹，做爸爸就系另一层次嘅复杂。【编按：作者及摄影为见习妈妈】
记得当年，我由入院到阿仔真正出生，我哋足足挨了三日三夜，整整60个钟！我固然辛苦，当时我老公都系寸步不离，虽然当时佢唔可以系产房陪伴，但我每一次，无论几多点，咬实牙关步出产房都会见到我老公疲惫又怜惜嘅面孔。虽然佢言语上唔识表达，我亦痛到无话可说，但佢每次用手轻轻扫扫我企唔直嘅背脊，用一个爱莫能助嘅眼神望住我，我都知道，佢系好心痛我，好支持我。
到孩子降生，新手爸爸竟然唔够胆亲手抱抱呢粒软棉棉嘅亲生婴儿! 到爷爷抱过啦⋯⋯再三鼓励支持加教路，爸爸先够胆生硬地抱抱自己个仔，当时佢到底系咩感觉呢？可能要揾日叫佢自己写下。
新手爸爸，开初当然系一位猪队友，但我见到嘅系，佢进步好快，每天都同孩子一齐成长。咁当然啦，我系毫不留情地，每次做出猪行为时都会严重投诉佢⋯就好似，埋台食饭，妈妈梗系负责喂仔，完全忘我， 爸爸自顾自咁食，晚餐完结，返到屋企我叫肚饿，猪队友竟然讲：“头先你做咩唔食？”
有几多妈妈遇过请过来取暖
幸好，而家总算成长啦， 唔单止识得喂食老婆，夹𩠌斟茶递水，仲识自己食完就帮手照顾，等老婆有啖饭食下。如果我喺屋企，当然我仍然系主力啦！陪玩陪食陪瞓，一日嗌三百次妈咪。但每次我离家，我老公都会神队友上身， 自动自觉陪玩，陪捉棋，读图书，睡前故事，睡前按摩，接送兴趣班，全部做足。
睇见两位老细都好满意爸爸表现嘅时候，心入面有一种奇奇怪怪嘅感动。好似“呀⋯⋯唔使妈咪都搞得掂啦？”但系念深一层，队友如此努力，交足功课，其实都系想出门在外嘅妈妈能够安心，可以专心工作，其实系另一种爱，一种支持。而家谂返起以前嘅猪队友，呢位神队友嘅表现实在令人感到难以置信，睇来我可以尝试同契妈plan下去次闺蜜旅行啰～可能有时候，我地做妈妈都应该学习放手，将要求降低，俾爸爸凑吓仔，一来俾自己一个休息机会，二来俾小朋友跟吓爸爸，可以全人发展一下，亦系俾队友一个进化机会，能唔能够成为神队友，可能就系睇呢个机会啦！
#离家妈咪收到相有感而发#爸爸goodjob#我队友
80后的一对小情人，由14岁开始走在一起，一步一步走进婚姻殿堂。婚后诞下一对宝贝，踏上见习父母之路。 相信为人父母都是从孩子身上每天学习，陪伴他们一起成长，再次经历快乐童年。
更多文章：【留住童真】将儿子画作制成颈链永久保存 妈妈：要将幸福戴在身