【见习妈妈凑仔经】出差离开屋企十万公里　心里其实不好受

我出咗差啦！有时身边朋友会同我讲：“哗！ 你有得出差咁正！ 咪可以当放假啰！”事实不然， 做人妈妈，身在外地，离开屋企十万公里其实不好受， 感觉似拜神唔见鸡，周身唔聚财。【编按：作者为见习妈妈凑仔经】

虽然一个人喺酒店，可以霸哂成张床，无中断的睡眠， 但都不及半夜听到有人叫妈咪，起身望吓，原来佢发开口梦， 又谂吓自己有份喺佢个梦中出现， 然后甜丝丝地嗦下佢哋阵“除”， 再趟回被窝咁温暖。

喺外地工作， 就算忙极一有时间第一件事就打返屋企望下两只猪， 讲咩都好，见到佢哋开开心心，同我讲吓无谓嘢其实系我嘅原动力～ 放工如果咁好彩有时间买嘢， 打爆喼尽是佢两个啲嘢，我谂⋯ 其实心理上我系想补偿返我唔能够陪系佢哋身边嘅呢段日子吧！

今次出差之前， 哥哥见我带住佢画俾我条颈链佢问我：“系咪好似带埋我地一齐去咁呀？” 我答：“梗系啦！妈妈日日都挂住你哋！”我见佢甜甜地咪咪嘴笑，我鼻酸咗酸！

而家做嘢，有时会摸摸颈链， 同自己讲努力加油，快啲做完快啲返屋企! 有时有supplier 见到会讲：Oh~ I like your necklace! 我会答：yeah~ my son draw it！然后分享吓我个仔做咩要画到我爆炸头⋯ 唔系因为我恶啰～ 因为我长头发啫！ 讲下佢哋平时啲野，就如阿仔话啲斋：好似带埋佢哋去咁！

嗯～ 我而家最想返去嗦吓佢哋阵味！

见习妈妈凑仔经

80后的一对小情人，由14岁开始走在一起，一步一步走进婚姻殿堂。婚后诞下一对宝贝，踏上见习父母之路。 相信为人父母都是从孩子身上每天学习，陪伴他们一起成长，再次经历快乐童年。

延伸阅读：【农历新年玩意】抛开手机自制新年小游戏 环保刺激又训练小手肌