【亲子齐做萝卜糕】做个贺年小厨师　学整零失败萝卜糕

一踏入农历新年月份，就会见到好多朋友仔分享佢地嘅自家制贺年糕点，一见到佢地嘅作品，总系令我都好好想试下自己整，但老公一听到就会话：唔好整啦…买仲方便又好食！（听到佢咁讲真系好想桩佢几下，咩心情都冇晒啦）【作者及摄影为小小猪妈妈】

不过今日终于可以一试自己亲手制作贺年糕点嘅滋味，谢谢奇华邀请我地参加萝卜糕工作坊，原来整糕都系一件好简单嘅事，就连小朋友都可以做到呀！其实小小猪一向都有同我齐齐整嘢食，所以当佢知道可以嚟整亲子班时，佢都不知几兴奋，仲不停问究竟萝卜糕系点整？会唔会好难整？要用啲咩材料？要整几耐？总之又系嚟问题少猪上身般。不过….佢肯问就即系代表佢好期待啦~

系我地开始之前，就当然乖乖听听导师为我地示范，导师真系好详细又有耐性，依个问题少猪不停问，佢就慢慢咁讲解，真系超专业呀~

睇完导师示范，就当然到我地动手做啦！首先就将啲腊肠腊肉切粒粒，导师都好贴心，为小朋友准备左剪刀，咁就可以有得参与之余，又可以顾及安全。将啲腊肠及腊肉切好之后，就可以加埋啲虾米一齐，然后水波炉焗5分钟~

依个时候就要将萝卜切成片状，揸刀其实我都唔太想俾小小猪做（因为佢又真系超级论尽的人嚟），不过佢又主动话会小心慢慢咁去切，加上我亦都要学懂适当时候放手俾佢试，所以就….系我视线范围安全情况下俾佢试一试啦~

系等嘅时候导师仲即场示范整黄金马碲糕，见师传三两下手脚就完成，好似好易咁，搅到我都心思思想整埋一份呀~

说时迟那时快，小小猪牌嘅萝卜糕出炉啦(睇个样都几OK呀) 。睇见自己个完成品，小小猪都不知几有兴奋，不停话自己好叻可以学识整萝卜糕~

开开心心就过左一个又好玩又学到嘢，最重要系睇见个完成品真系劲有满足感呀！今次都真系要俾个叻小小猪，因为佢做得比我仲要多，基本上可以话大部分都系佢自己整，又冇乜论尽事发生，所以都好叻仔啦！

当然，我地返到屋企就有个小朋友急不及待要食自己嘅萝卜糕，咁见佢咁乖就即刻煎嚟奖励下佢。

往年叫佢食萝卜糕，都好勉强咁食半件。但…….今次因为自己整关系，竟然大赞好食，一个人食左半碟，仲叫我快啲去买材料再整过，如果唔系新年冇得食。依只猪都真系…..唔知好嬲定好笑~

经过今次小小猪咁成功整到好味萝卜糕，有个爱猪号DADDY就由反对我系屋企整，到依家都叫我快快手买材料再整过。所以依个百厌猪影响力有几大呀，不过有得再整我又唔介意呀…哈哈哈！

小小猪Kinsey全职傻妈与傻猪仔的亲子生活， 以小小猪为中心，平日一齐整嘢食又周围玩 ，让小小猪拥有一个健康快乐的童年为目标。透过文字、相片及短片记录小小猪的成长生活傻事及汤水食谱，让大家可以陪同小小猪一起成长。