太阳现身澳门晒广东话：多谢你哋嚟！ 预告BIGBANG 11月开Show
韩国天团BIGBANG成员GD同太阳今年就密密揾银，分开单独开Show之余，仲世界各地来回飞，上个月太阳先嚟完香港开世巡个唱《TAEYANG 2017 WORLD TOUR WHITE NIGHT》，今日就巡到去澳门延续热潮！
唔讲唔觉原来太阳开咗咁多场演唱会，今次系首度举行记者会！由华华娱乐、袖珍传播联合呈献太阳澳门记者会于下午3点开始，太阳今日现身先以广东话同大家打招呼：“大家好！Nice to meet you！This is Taeyang Thank you for coming today！”又即场再学广东话讲：“大家好！多谢你哋嚟！”仲讲得都几正㗎！太阳随即分享今次世巡嘅感受，又讲到虽然今次唔系以BIGBANG名义，而系以自己个人名义开Show，但可以见到世界各地唔同嘅V.I.P（BIGBANG粉丝名称）心情都相当兴奋！太阳又讲到今次演唱会整体上嘅流程同其他场次一样，不过澳门站就为咗V.I.P，准备咗全新嘅演出服装，又有安排V.I.P入场睇彩排等等福利，佢自己都好期待今晚嘅演出啊！
而讲到BIGBANG成员之间嘅感情时，太阳就表示：“大家聚埋一齐嘅时间已经超过10年，大部份时间都系一齐生活甚至一齐去厕所，又经历过高潮起伏，随住大家年龄增长，其实感情都一直增长紧。”而太阳结束今次个人世巡之后就会回归BIGBANG，嚟紧11月BIGBANG都会喺韩国同埋日本举行演唱会，而太阳本人就因为系2018年平昌冬季奥运会嘅宣传大使，依家已经准备紧有关嘅唱片同埋音乐，嚟紧都仲有机会可以同大家见面！请大家多多期待！
更多太阳记者会图片
我们01韩迷的facebook专页Kpop 01已经开始喇！想知道更多韩国娱乐、饮食、玩乐、时尚资讯，快点去给like吧：https://www.facebook.com/hk01.kpop/