【专访】《撒娇》《踩过界》Opening制作人：观众值得高质片头

大台终于取消由2015年开始嘅星期一至七2130横线播剧集策略。今个星期开始周一至五播《赌城群英会》，而周六日就播《踩过界》。同之前嘅“电视电影”系列唔同，今次《踩过界》明显系临危受命，见佢都仲系为咗周一至七播放而拍成28集（四个星期 X 7集）。《踩过界》会唔会做炮灰就未知，但系最近网上流出嘅Opening就令人眼前一亮。

剪埋剧中片段当opening

讲起大台剧集嘅opening，可以好肉酸，对我嚟足以摧毁成套剧。啲opening通常都系剧透嚟，将啲剧里面“最精彩”嘅画面剪埋一齐就算，包括咗对骂、掌掴、飞车、爆炸（连声）、嚎哭，睇到腻睇到烦。不过《不懂撒娇的女人》同埋《踩过界》呢两个剧嘅opening就有啲唔同，有啲惊喜，原来系由大台嘅“品牌传播科”（CID）主理，制作期足足成个月咁长。

品牌传播科主理

负责主理《撒娇》同《踩过界》片头opening制作嘅CID高级监制Tom Chan话，几年前其实已经建议过要出力去做片头，《撒娇》嘅片头就系争取几年后上头派落嚟嘅第一个任务，出到嚟各位观众都好impressed，到第二季第15集时有所变化亦都提高咗套剧嘅谈论度，算系打响咗头炮。而《踩过界》就系Tom Chan自己争取去做。

“林志华系我最欣赏嘅监制之一，睇咗几集初剪之后，好想帮套剧出啲力，就自己举手话要做。其实当时仲做紧《撒娇》片头嘅后期，所以要同步构思《踩过界》嘅片头。”

观众识分好与坏

CID负责大台全部宣传片同埋网上短片，而做剧集opening嚟讲以往只限于处境剧，呢两次可以话系“做多咗”。

“我觉得opening对一套剧非常重要，简单嚟讲好似一项形象工程咁，着一件啱场合嘅衫、喷浓淡适宜嘅香水、准备啱timing嘅话题，做得好嘅话可以令套剧升格、add value。我希望可以用片头帮到套剧。”

结果系观众对于《撒娇》嘅片头有赞冇弹。

“成日都有人话大台嘅观众系班盲目嘅师奶，但其实佢哋系一班识分好坏嘅观众，会感受到片头我哋想营造嘅气氛，亦都会留意到detail位同变化。”

睇返日韩美台剧，一早就已经会为剧集拍opening。有观众话呢啲opening质素系基本要求，我都同意，希望无线唔好再将啲片段剪埋一堆就算数，依家啲观众畀《兰花刼》迫一迫，已经识得熄电视或者转台，你估仲好似以前咁逆来顺受咩？

（本文纯属作者意见，不代表香港01立场。）