专访｜赵希洛离巢无线为找回演戏初心：唔想去到滑牙先讲我唔得

有“无线御用癫婆”之称的赵希洛有学历有家底，大学毕业后大可找份高薪厚职，但她却选择投身演艺圈，外人可能会觉得她明星梦，但她不但无用“星二代”身份靠关系走捷径，反而不断默默耕耘用作品说话，终于在2019年台庆颁奖礼上夺得《最佳女配角》，正当挨出头有望上位之际，赵希洛今年9月时突然宣布离巢，令不少观众大跌眼镜。她在接受《香港01》专访时，大谈决心离开娘家的原因，认为现在是Perfect Time，希望找回演戏的兴趣和初心：“唔想去到‘滑牙’先同大家讲我唔得。”

场地：中环迷你酒店

放假寻回演戏初心　唔想做到滑哑先话唔得

赵希洛坦言当初决定离巢，是希望能放一个长期让自己休息一下。过去3年疫情，她自觉幸运，接到不同的剧集，一直有得开工，但同时这3年，她没有好好放过一个假，最夸张更试过同时叠住拍摄三套剧，“作为演员，有监制揾妳系幸福和开心嘅，但当三年都困住喺香港，就算期间有去上唔同嘅训练课程，我都觉得需要唞一唞，去放一个长少少嘅假期，揾返对演戏个初心和乐趣，因为如果我无乐趣，就等于只系交了一个功课，质素唔会好。我希望有一个好嘅performance畀到观众，我唔想‘滑牙’，唔想去到‘滑牙’先同大家讲我唔得、我要放一个好长嘅Break。”

所以离巢后的第一件事，赵希洛并不是心急著找新工作或新公司，而是给自己放了一个长假期，先后去了英国、法国及美加体验，期间她在美国参观了Warner brothers和Paramount studios两间电影公司，认识当地戏剧文化后，令她大开眼界。

跟黄秋生学戏有所领悟

回港后，赵希洛报读了黄秋生一个演艺课程，当中让她有所领悟，“老师讲咗一样嘢，就系有好多嘢可能困住咗自己，呢个时候我突然‘叮’一声，好明白佢嘅意思，因为我有时成长喺一个好舒服、好安稳嘅地方，慢慢变到自己好多嘢好放唔低，例如形象包袱、和创作方面嘅谂法等，于是就一次过放低晒，去揾返自己（对演戏）嘅初心和快乐，和揾返演戏嘅乐趣。”

赵希洛坦言有时都会很迷失，她相信要爱一个角色才能投入，但不断做的时候，就会开始担心演艺方式会否好类近，“可能大家认识的赵希洛，例如《爱回家之开心速递》中的‘无知May’系好傻嘅；《十八年后的终极告白2.0》里面系一个好有型嘅太太；《金宵大厦2》佢系一个好似小丑女沟咗一个怪人诞生出嚟嘅角色；之后去到《隐形战队》佢系一个卧底嘅Big Boss。虽然每个角色都好清晰，但我觉得自己需要多啲嘢，先可以再做得更好。”

对无线只有爱没有恨　娘家曾出动“银弹”攻势挽留她

要跳出效力了15年的舒适圈，赵希洛坦言需要好大勇气。回想这些年，她对无线只有爱，没有恨，因没有无线就没有她：“佢对我嚟讲系非常好嘅平台，我从当时一个唔识睇中文、连一串广东话都讲唔到、又唔识表达嘅女仔，喺香港没有朋友，攞住两个箧就返嚟开始慢慢build up，仲要系没有演戏底子，只有校内音乐舞台剧嘅演出经验，试问有边间公司可这样容纳妳呢？之后仲可以由一个企后面嘅小妹妹，到能企喺颁奖礼台上去多谢曾经给机会我嘅人，去令我实现到自己嘅梦想，我觉得要感恩。”

赵希洛透露公司曾出动“银弹”攻势挽留她，价钱是开心的，但她仍坚持自己选择，“当刻我唔知道我几时ready好去再接任何工作，我好想去报读一个很长嘅课程，咁啱合约又完，系Perfect Timing去自我增值，后来就遇上黄秋生开班了，佢教得好好。”

不觉遭无线冷待　难忘获刘江当面称赞

不少网民替赵希洛不值，觉得她夺得“最佳女配角”后，戏份反而愈来愈少。但她不认同，觉得在《隐形战队》只是角色设定而已，她很喜欢，“有时唔系睇妳戏份多与少，而系睇个impact。”而赵希洛对旧公司也心存感恩，不觉得遭冷待，“其实我已好好，我有奖啦、有认同啦、我有机会啦，我喺疫情期间，仲好幸福地不段咁拍剧。”

赵希洛亦开心在公司认识到一班好朋友，例如黄智雯、林夏薇、黄德斌、林淑敏、郭少芸及徐荣等等，大家在演艺路上互相支持和分享，亦以及遇到不少好前辈，这都是无价的，“例如司棋姐（李司棋）和毛姐（毛舜筠）啦，我哋喺《天天天晴》合作过，佢哋都系非常非常好嘅前辈，两个都好肯帮助后辈。之后还认识到雪妮姐、罗兰姐，尤其是刘老师（刘江），我记得我攞奖𠮶晚，刘老师亲自过嚟：‘我都话系妳㗎啦！’我个心当刻系被融化咗，好窝心，我至今仍记得呢一幕。”

曾一年无工开　萌生准行念头

眨下眼就15年，赵希洛笑指比她想像中过得快，中间当然也有过气馁的时候，她说：“就系攞‘最佳女配角’前𠮶一年，我本身接咗1套剧，但种种原因几次延期，足足一年真空期，于是就有时间去法国上堂学戏了，当时真的有想过是否要转行呢？亦趁呢段时间去考咗个瑜伽牌先。”而庆幸是，赵希洛跟黄智雯去法国学戏回来便有剧开了，更在之后颁奖礼上夺得“最佳女配角”殊荣，“上天和公司都好锡我，畀咗一个非常好嘅礼物同肯定畀我，就好似打咗支强心针一样，话畀自己听可以做得更好。”

家人曾反对入行　“星二代”身分大压力

本身有学历、有家底的她，大可找份高薪厚职，过著优哉游哉的生活，但赵希洛却选择坚持在演艺事业上打拼，原来这跟家人反对她入行有关，激发她要更加努力，“我16、17岁嘅时候，我偶然考一个试要扮《The Crucible》其中一个角色，仲要系我自己改编嘅，最后成绩非常之高，老师就推荐我考澳大利亚演艺学院，但我当时唔够18岁，要家人签名，咁我填晒表格，有埋推荐书了，就好开心返屋企同屋企人讲，点知佢哋唔肯签，话：‘妳读好啲书先啦，读完书再谂做咩啦！’𠮶时对我打击好大，真系喊咗出嚟，但就同自己讲，佢而家唔畀，我有一日都要做，所以我读完书就决定返嚟香港，我要成为一位演员。”

赵希洛的妈咪正是前TVB艺人梁小玲，问到初入时挟著“星二代”身份会否感到困扰？她直言：“我以前觉得呢个字压力好大，因为我做每一样嘢，外界对我嘅要求和批评都更严，人哋有机会同妳妈咪讲：‘妳个女唔适合做呢行。’其实呢句说话我听过无数次，由我未入行想入行开始，个个已经同我讲‘妳唔适合做呢行。’我都听到惯咗了，后来只能扮听唔到。”虽然经历无数次‘妳唔适合做呢行。’但赵希洛用努力说话，由最基本学写中文字开始，一步一步向大家证明她的进步。

享受自由身状态　望作多方面尝试

回复自由身的赵希洛，不心急签公司，她发觉自己原来是需要一些空间，暂时这个状态都几舒适，最紧要有得选择，认为适合自己才去做。乐观的赵希洛，不认为外闯竞争对手会多了，反觉得可演出的平台和可合作的单位更多，而她亦好有兴趣经营社交平台，正努力学习中：“好似试当真和小薯茄，他们全部都系自己谂、自己度、自己写，我觉得好犀利啊！”至于没有了无线这座“大靠山”，可曾担心会“无嘢捞”？赵希洛抱正面态度面对，希望这段时间装备好自己，未来除了在电视上，电影和舞台剧都可以发展一下，甚至乎唱歌都可尝试，因她本身喜欢音乐舞台剧，所以很喜欢唱歌。

赵希洛又谈到电影是她未来很想尝试的领域，在放假期间，她欣赏了《毒舌大状》、《正义回廊》和《阖家辣》，“多谢戚其义好耐之前畀咗我一个锦囊，佢觉得我当时好鬼妹，同香港嘅距离好远，但做一个演员要乜都知、乜都睇、乜都学、乜都试、乜都了解，需要时随时可以用到。”问到在大萤幕上可接受的性感尺度？赵希洛笑言：“TVB𠮶啲性感，就系我性感（底线）嚟㗎了。（若剧本好呢？）揾替身啦，我惊人哋要洗眼。”

与男友感情稳定　随时闪婚

感情方面，赵希洛有位拍拖多年的圈外男友，二人感情稳定，男友也支持她离巢外闯的决定，好开心见到她够胆跳出自己嘅舒适圈。二人结婚计划可会受影响？赵希洛直言：“我而家系好open去谂呢样嘢嘅，因为我自从离开公司后，成个人真系放松咗，以前不停工作，系无时间谂呢样嘢，但我而家有时间去谂，结婚又唔代表唔做嘢嘅。（闪婚都唔奇？）绝对可能系，我系𠮶种钟意即兴嘅人。”

赵希洛透露男友职业是从商，需要四围飞，因此二人常分隔异地，她之前拍剧为投入角色，加上忙于拍摄连睡觉时间都没有，当时大家真的靠一个电话、一个讯息和一个信字，“其实系一个team work，大家都好信任对方，我哋而家只系互想去追求自己想要嘅嘢，喺事业上有一番成绩，ready嘅时候就可以安定啲。”