【片】跳出嚟：平面设计Freelance　有几恶做？

平面设计师Moby毕业后一直返Full Time工作，间中接吓Freelance帮补。呢啲零碎嘅经验已令佢体会到Freelancer面对嘅种种难处。

Moby以佢朋友为例，粗略估计净系接平面设计嘅Job，一个月正常大约揾$10000到$12000，而如果加埋其他媒介例如短片、动态图像等等嘅Job，一个月就起码可以揾多$3000到$5000左右。

至于设计公会，其实唔需要好大规模，有一两个有地位有影响力嘅设计师走出嚟，以顾问身份推动成个行业，一齐制定保障设计师嘅行规、公价，甚至系订法例，进而做一啲监察同埋个别案例跟进，成件事已经会好唔同。可惜，行内比较有代表性、有影响力嘅人都唔会做呢啲嘢。“如果要做就一早做咗啦！”Moby如是说。

倾完一大轮，佢黯然地讲咗句：“其实，我曾经发过誓以后唔再接Freelance嘅。”原因都唔驶多讲，成日遇到啲客都出蛊惑，即使肯出粮、唔走数，都要拖足半年，甚至一年先收到钱。做到心灰意冷，就发誓唔再接Job做啦。

“但系，发完誓之后发觉，有啲Job系推唔到嘅。就系一啲真系无钱收嘅Job，例如朋友结婚，兄弟搭膊头之类啦。”有做吓设计、影吓相嘅朋友睇到呢度都应该心中有数喇。通常朋友、兄弟叫你帮手，就好少会收钱，就算收都系所谓嘅“象征式”、“友情价”，又唔想伤感情，就唯有顶硬上，𠮶一刻真系会觉得好堕落。

“最揼春嘅系唔知点解呢个行业要咁样啰。”呢一句，系Moby嘅总结。

到底Freelance作为一种系时间、选择上自主程度比较高，但同时又要面对好多误会或者受尽无理待遇嘅职业，仲要挨几耐，要点样先可以令自己有餐安乐茶饭？