【同志的胜利】早逝的同志作家，早逝的“鳄鱼”

台湾宪法法庭裁定禁止同性婚姻违宪，换句话讲即系同性婚姻喺台湾即将合法化。有报导指有关法例会喺两年内落实。令人谂起，台湾同志广为流传嘅经典作，台湾作家邱妙津嘅《鳄鱼手记》。

台湾宪法法庭裁定禁止同性婚姻违宪，换句话讲即系同性婚姻喺台湾即将合法化。有报导指有关法例会喺两年内落实。令人谂起，台湾同志广为流传嘅经典作，台湾作家邱妙津嘅《鳄鱼手记》。

邱妙津系台湾有名嘅女同志作家，曾经被台湾女同性恋者选为梦中情人第一位。喺台湾大学读完心理学系后，1994年去法国继续进修，但系喺1995年6月25号，年仅26岁嘅佢喺巴黎屋企自杀。

对于台湾，甚至华人同性恋文化、文学，邱妙津影响重大，台湾女同志到𠵱家都经常用“拉子”、“鳄鱼”等等代名词自称，出处就系《鳄鱼手记》。佢系最早一批公开自己性取向嘅华人同性恋作家，如果华语男同志文学嘅代表作系白先勇嘅《孽子》，女同志代表作就系《鳄鱼手记》。

理所当然地，𠮶个年代嘅思想、社会氛围比起现代封闭得多，同性恋者即使对自己性取向有所觉悟，出柜、揾伴侣等等事情喺当年要比𠵱家更困难，付出更大勇气。《鳄鱼手记》里面，邱妙津喺每一章都穿插一个寓言故事嘅一部份，鳄鱼（比喻同性恋）生活喺普通社会，一般人对鳄鱼有着猎奇式嘅好奇，更有人扬言有一种病症，会令人类变成鳄鱼，所以要灭绝鳄鱼。为咗避免畀人发现自己身份，佢每日都要穿著“人装”生活。但系，鳄鱼心入面其实好寂寞，想被社会大众接纳，更加想揾到其他鳄鱼。

除咗鳄鱼寓言，小说记述主角（拉子）大学生涯几段波折嘅爱情，同埋遇到几个同性恋、双性恋者嘅想法、遭遇。又以第一身视觉，交代当时社会气氛下，同志内心深处嘅压抑、挣扎同痛苦。小说中，有人因为受唔住压力而强迫自己成为异性恋者，亦有人自我沉沦、游走喺生命边缘。

邱妙津嘅早逝，故然系文坛损失，唔知有冇人谂过如果佢今日仲在生，对同性婚姻立法会有咩睇法。同性婚姻立法值得鼓舞，但其实都只系第一步，即使喺𠵱家所谓多元社会里面，都仲会有人下意识地用性取向作为一种玩笑、嘲笑他人嘅方式。除咗立法，要改变到同志受压迫嘅处境，更加重要嘅系冇人会再用歧视、猎奇嘅眼光去看待佢哋。