肥仔@TomFatKi宣布退团　揭福正KOL女友肥蛙监控对话搞散光头帮

由福正、肥仔、阿奇组成的TomFatKi（光头帮，简称：TFK），凭住一首《天水围Gang Gang》爆红，去年更唱到上麦花臣舞台，愈来愈多人识。不过他们近月被发现已经冇新动向，令不和传闻浮面。早前福正及阿奇先后发文交代团队动向，指仍然在探索TFK未来可能性，而沉默近一周的肥仔，今日撰长文宣布心痛退出TFK，并将成员间渐行渐远的原因指向福正的YouTuber女友肥蛙，更透露有人监控住团队WhatsApp对话。

TFK是近几年崛起的本地Hip Hop组合，福正、肥仔、阿奇一同在天水围成长、拍YouTube片，再跟Billy Choi、李一丁、东城、何图、Gary等一齐做歌，3年几前凭一曲《天水围Gang Gang》打入大众市场，MV至今已录得逾500万观看。三子除了参加音乐节、上电视、搞年宵等等，去年更于麦花臣举行《光头帮 搏尽无悔 OSH！春茗晚会》等演唱会，可谓愈来愈红。

不过，三子已几个月冇出新片，更遑论新歌，愈来愈多粉丝感到奇怪，一周前福正就率先以个人身份出Post解画，指这段时间大家各自休息，并寻找团队发展可能性，内文提及到团队无法沟通，指：“好可惜唔知咩原因令呢件事无法进行 有时等待讯息嘅回复 一等就系一两个月 或者无回应。”他有为自己急进、不擅表达致歉，但表明：“我只可以讲我绝对系希望Tomfatki继续行落去。”他说TFK对自己而言是一段无比珍重的感情，为TFK无法按期待发展、令支持者失望感抱歉，此文一出已惹来解散揣测。不过，福正其后更正这并非解散文，因自己也在等待回应中。

其后到阿奇开声，他为团队要将事情搬上网讨论而感到惭愧，不讳言：“达成唔到共识一直系我地兄弟之间解决唔到嘅问题”、“理念一致系对团队好重要嘅嘢，如果tfk达唔到一致嘅理念就好难继续运作落去，沟通少咗，磨擦多咗，哩个亦都系我最痛心之处。”他当时说自己都不清楚TFK难以再找到共识的原因，谓：“我唔肯定系我哋三个有问题，定多咗人介入TFK。”他指TFK内部曾争吵过无数次，自己尽可能都选择沉默、避免说了些伤害人与人关系的说话，然而这亦令自己产生情绪问题，不过他对于整个团队7个人难以走下去、辜负观众等感到非常自责，强调：“即使系重新出发，自己都要以一个最好姿态呈现俾大家，愿大家生活愉快。”

事隔一周，终轮到肥仔开声，他的千字文亦是三位中最长。肥仔坦言自己因大受打击、消化需时而消失了一段时间，最终决定退出TFK。他回忆起自己从中学就认识福正，一齐谂桥、团队扩大等都好开心，但自从疫情以及福正与肥蛙开始拍拖后，大家核心思想就渐渐有分歧。肥仔提到肥蛙尝试畀意见TFK，但“肥蛙成功嘅方式同我哋成班Homie成功嘅方式系一定唔同，无办法将佢嘅方法复制落我哋到，但系我尊重，因为福正除咗系tfk之外，都系一个男朋友，我明白点解要提出呢啲方向，所以我同阿奇一样，选择咗回避同沉默，唔讲伤害咗大家关系嘅说话。我好感激你哋嘅付出，我同阿奇因为个人感受拒绝，其实我哋都好惭愧，要你拉住我哋行咁，对唔住。”

另一个分歧，是福正觉得愈多人加入团队就会分薄利润、但肥仔就享受一班人一齐合作。年初团队曾去日本，肥仔以为在旅程中深入倾谈过后，大家关系会得以修补、回复从前，却续说：“但系一返到嚟香港，所有喺日本倾嘅嘢都好快都打回原形，呢一下我真系深受打击，而且我自己屋企都发生咗啲事，真系处理唔到咁多嘢。”他透露两次演唱会都有成员觉得自己意见被漠视而提出退团，令他相当心痛。不过，肥仔表示团队不能再继续走下去的原因，是有人容许女朋友登入WhatsApp，茅头似乎直指肥蛙。

肥仔写道：“当我哋发现原来有自己人一直容许女朋友登入佢嘅WhatsApp. 一直监视住我哋个Group同其他对话，而我哋全不知情，严重侵犯我哋私隐，发现咗之后我哋根本唔够胆再继续沟通，就算见面倾，竟然唔系录音就录影，我见到一个最亲嘅兄弟做到呢一步，我除咗嬲到唔识畀反应，我甚至会反思究竟我哋系咪真系对你咁差令到你会咁，我个人系内向，好多嘢唔识表达，但我好珍惜我哋嘅友谊，我想一班人一齐做歌，一班人一齐拍片，一班人一齐进步，咁先系对观众最好既回馈。TFK无办法再行落去我好心痛，好唔开心，收埋咗自己一段时间，今次应该系我打得最多字嘅一次，我都唔想搞到咁，但我更唔想再继续咁，对唔住各位，希望大家体谅。”

而阿奇都有留言畀肥仔：“一齐跌低，一齐企翻（返）起身，点都一齐。”另外有不少网民标注了肥蛙，叫她作出回应，亦有人留言指福正懦弱等。