《警讯》坚哥做20年奸人　“御用骗徒”有正职：阿仔唔钟意我呃人

最新一集《警讯》可谓是充满惊喜，本来平平无奇的中年爱情故事，后来骤变拜金父亲想女儿钓得金龟婿，再来一个反高潮，引出切勿高空掷物的讯息，真是意想不到。有不少网民讥笑：“TVB应该要请呢个编剧返嚟写故仔。”与此同时，有导演杜汶泽都有指住条片嚟笑，话制作唔太得。姑勿论制作如何，至少引起大众注意，或者这就是曲线呼吁效果。

除了剧情爆笑，剧中的拜金老窦，自称“警讯坚哥”都非常出色。坚哥，本名吴良荣。基本上是《警讯》御用骗徒，大多数都是担正做男一，究竟他是何方神圣？原来坚哥由1997年开始拍《警讯》系列，做足骗徒20年。讲起当初入行经过，坚哥就轻描淡写：“20年前就认识一位导演，咁我就做佢嘅助手。除咗做戏，都仲要执头执尾，到后来港台转制，我就剩系做演员，做到而家。”除了是“御用骗徒”，坚哥本来有份正职，从事医护行业，主要照顾病人，“骗徒”只是Part time。

入行20年，坚哥的资历与绿叶无异，不过两者最大分别，就是坚哥话：“其实拍《警讯》唔使点挨嘅，相对比较舒服，轻松地拍下案例咁。如果要讲去挨，我未做《警讯》之前，就真系要挨啦。”坚哥做演员之前，原来是龙虎武师，真系估佢唔到。可惜想打听更多坚哥的辛酸，坚哥婉拒：“唔好啦，都系好耐之前嘅事，不如讲返《警讯》好过。”据知坚哥未做《警讯》之前，做过亚视特约演员，在《我和僵尸有个约会III之永恒国度》饰演过僵尸。

做足骗徒咁耐，坚哥笑言做得最多就是电话骗案。做得多会否因此而变得醒目，不轻易受骗？他说：“都系嘅，不过我又觉得好难避免，因为要呃你嘅话，可以有好多手法嘅，所以咪要拍多啲片做《警讯》啰。”但讲到《警讯》的拍摄手法遭到耻笑，坚哥就话：“其实好多都系案件重演，只系表达嘅手法唔同，性质系一样，但细节呈现方法就唔会咁古板，尽量想佻皮啲、轻松啲。”不过坚哥讲讲下，就话：“有时《警讯》出咗街之后，骗徒反而会抄返我哋桥转头，同类型嘅案件会多咗。我见到都会心噏，尤其是见到有啲老人家畀人呃，因为佢哋可能冇睇，所以都要靠大家帮帮忙啦。”

除了是“御用骗徒”，坚哥在现实中已有自己的家庭，有一个正念小学的囝囝及读大学的囡囡。每当《警讯》一出街，坚哥都会同囝囝坐埋一齐收睇。眼见爸爸上电视，囝囝最初都会有疑问，坚哥说：“我喺佢心目中系好人，但佢见到我喺《警讯》又偷嘢，又虾虾霸霸，有时仲要揽住第二个女人，佢就会觉得好尴尬，唔系好钟意，我就要慢慢同佢讲清楚。”至于会如何解释，坚哥：“我会同佢讲，都系拍戏啫，目的都系想啲人唔系受骗，佢听完之后慢慢都接受咗，佢啲同学仔都知道㗎，都觉得冇乜嘢。”