东张西望｜港男抽中疫苗机票　为与台妹同行连母亲遗产都被呃清光

今晚嘅《东张西望》揾嚟苦主A先生讲述自己嘅受骗过程，而一切嘅起因只系一张疫苗机票。A先生去年抽到一张去日本嘅疫苗机票，为免一人出发太孤独，于是喺网上揾伴，而咁啱又真系有一名台湾女子表示愿意结伴同行。

台湾女子提议A先生玩加入一个虚拟货币网站以赚取旅费，之不过要买入虚拟货币要先联络平台客服，将港元换成美金，再转成同等值嘅加密货币，平台客服之后将数据交到第三方帐户，赚完钱再由第三方帐户将虚拟货币转回平台，平台将金额转成美金，最后先会返去A先生嘅户口。过程真系复杂过玩迷宫，但A先生不虞有诈，主要系因为第一次赚咗几百元，之后再加码8万，并成功赚取4万多，见有得赚，A先生未有即时提现。平台客服提议A先生将户口升级，但条件系要先补27万，虽然整个套路好明显系骗局，但张先生似乎唔多察觉，仲去求助财务公司，成功借到13万。

与此同时，台湾女子表示愿意帮手，借出余下金额，但笔钱并唔系直接入帐A先生户口，而系透过客服转去第三方再转入A先生户口，过程冇任何记录。就系咁，A先生户口随即被冻结，原因系“有来历不明的资金（14万）”，喺与客服联络嘅同时，呢位台湾女子亦从此消失喺A先生嘅世界。就系咁，A先生除咗欠财务公司28万（成本加利息)，就连妈妈嘅12万遗产，同自己嘅2万积蓄都化为乌有。