汤洛雯宣布年底举行婚礼 爆马国明悭家：唐老鸭睡裤穿晒窿都唔掉

准人妻汤洛雯今日（3/4）现身大埔出席商场活动。提到马国明向她求婚成功，有意婚后及早生B，故要求她养好身子，避免不必要的操劳，谢绝拍剧挨夜。汤洛雯接受《香港01》访问时笑言：“我哋出得嚟行，好难推剧㗎，唔好讲笑啦，真系冇㗎。讲真我系冇谂住推嘅，可能咁啱拍上一套《隐门》𠮶阵时，个胃有胃炎，而且个情况都好严重，变咗我就想休养下个胃，始终拍剧系食无定时，瞓无定时，搞到个胃都唔好咁，医生都建议我要调整返好个人生活习惯，所以我就冇接到剧拍。但我完全OK拍剧嘅。”

对于马明向外表明想婚后赶生B，汤洛雯表示：“其实我哋两个系好随缘嘅，就冇话一结咗婚就即刻造人，始终成件事我哋唔系咁赶紧嘅，一切都随缘啦。暂时我都系工作行先。（你哋两个口吻咪唔一致，马明想你婚后相夫教子！）其实佢系一个好嘅准老公，佢系唔想我辛苦，因为佢知我有失眠嘅情况，变咗有时一拍剧，我系会几晚冇瞓过，咁所以佢可能心痛，所以想我唔好做嘢。但我个心依然系想继续做嘢，不过如果有咗BB，就当然要休息啦。之后如果状态系可以嘅话，我都想继续做嘢。（唔怕接咗剧后，发觉有咗要推剧？）咁如果我接咗剧，就唔会不负责任啦，接咗就唔会造人住。（婚期几时？）我哋会预期在今年底，但就唔想公开系边一日，因为未必喺香港搞。（姊妹名单？）暂时未有，因为如果搞得细，就未必会有姊妹团。但我阿妹就一定做伴娘。”

汤洛雯爆马明为人硬颈固执，一条睡衣裤着到穿晒窿都不舍得掉，令她甚为气结：“佢个人好悭，每次我送衫畀佢嘅时候，佢都唔会攞嚟着，佢系要着烂咗头三件其中一件衫。我要起码等3年，佢先会攞件新衫出嚟着，就系咁往往过晒季，加上佢而家有条着紧嘅唐老鸭睡衣裤，着到穿晒窿，叫佢掉佢又唔掉。可能大家平时睇佢，佢系一个好平和嘅人，但其实佢系一个好硬颈嘅人嚟，我系改变唔到佢嘅思维，变咗我唯有揾日等佢唔觉意掉咗佢先得。”