专访︱Winka与男友结束六年情 剖白爱情路上致命伤：成日说教
“我怪我责备太多，句句说教如何相爱”，是Winka陈泳伽新歌《一手造成》的歌词，亦是她与前度结束六年情后的自我反省。一段关系的结束，或多或少都由自己一手造成，“说教”的表达方式成为Winka爱情路上的致命伤，强硬的方式和态度将沟通变成指责，纵然自觉所说的没有错，却为对方带来伤害。反省过后，将自身爱情故事作为新歌蓝本，是提醒，亦是释怀。分手后比起互数对方的不是，Winka选择重新审视自己，坦然并毫无保留地向读者剖白内心世界：“感情状态我可以好坦荡荡，有就有，冇就冇，了解中就了解中。”
与圈外男友结束六年情 “说教”成感情致命伤
有别于惨情歌总是围绕分手后哭得死去活来、对前度念念不忘的故事，《一手造成》唱出分手后的自我反省。去年与圈外男友结束六年情，Winka坦言“说教”的表达方式成为这段感情的致命伤：“佢做咗啲嘢令我激气，我讲嘅方式比较强硬、说教，‘你应该点点点、你唔系咁都谂唔到呀嘛’，变咗唔系沟通系一种指责，对方好辛苦，我成日做呢个角色，又觉得好似凑仔咁样，我都觉得好辛苦。”如果时间能够逆转，她最想改变的是说话的表达方式：“有啲说话的确冇错，但对对方嚟讲系一种伤害。”
谈到分手原因，Winka以“很复杂、超复杂”来形容，简单来说就是双方步伐不一致：“愈讲只会愈彰显到个男仔嘅问题，我唔想喺度讲人唔好咁，今日系讲我嘅唔好…概括啲讲系大家步伐好不一致，好多佢嘅人生步伐同我好唔同，我认为你应该要成长，但你冇成长到。我成日说教好辛苦，做咗阿妈咁，佢亦都好辛苦，因为系咁俾我哦。点解我出面做嘢要咁Tough、家庭成长背景又咁Tough，我返到嚟屋企点解唔可以净系小鸟依人呢？点解仲要凑住你咁呢？”
六年感情，有尝试挽回吗？她坦言没有，挽回亦只是心中所想的画面：“因为分手系我讲，唱呢首歌感觉都系可惜多过后悔，我好少为自己做过嘅事后悔，冇以前就冇而家嘅自己。”分手难免伤心，硬净的Winka却没有大哭一场：“一谂到有啲位自己好有问题就会喊，但唔会因为分手好喊，咁个分手系我讲。”
自身爱情故事作蓝本 强调目前单身
将自身爱情故事作为《一手造成》蓝本，Winka直言歌曲是提醒，亦是释怀：“由呢首歌推出嘅𠮶刻，我就放低咗一啲嘢…开心系好多人同我讲，佢哋拎咗呢首歌向前度讲对唔住，亦都因为呢首歌开始有啲对话。”问到有否就歌曲与前度沟通时，Winka摇头笑说：“唔使㗎，推出新歌前已经同佢沟通咗。虽然分咗手，不过仲系好好嘅朋友，屋企人咁。因为一齐咗太耐，所以分开咗都系好熟悉大家。”
爱一个上一课，再拍拖时会是一个怎样的女朋友？Winka笑言不够胆回答，只知道自己不会急于开始一段关系：“我觉得每日都会有啲唔同，而家系我嘅成长期，我都讲唔实再做人女朋友会系一个点样嘅人。只可以讲我感情状态系，有物件如果OK就了解，但亦都唔会好快咁开始一段关系，快嚟快去我唔会啰。”Winka感觉开朗活泼，率直又充满正能量，身边亦不乏异性朋友，外界或许有错觉她蜜运中，但她强调目前单身：“大家唔好咁老土，同朋友单独出去食饭、攀石系好小事，我有好多异性朋友，我唔系𠮶种好唔同异性相处嘅人，其实我都有同女仔出街…而家系有了解中嘅物件，但系冇拍拖。”
舒服做自己拍拖不避忌 与Marf同日出歌互相扶持
入行后成为公众人物，更加是偶像组合COLLAR一员，拍拖会很大压力吗？Winka直言不会，全因有粉丝的支持：“佢哋觉得我开心就好，感情状态可以坦荡荡、舒服。虽然我系偶像组合，但系我嘅外表、性格，畀人感觉系，我有男朋友又好、冇男朋友又好，大家都唔会伤心。如果我系Ivy（苏雅琳），有男朋友大家就会好伤心。”可以舒服地做自己，假如拍拖亦不会避忌：“唔会刻意隐瞒自己系咩状态，我系Enjoy同呢个男仔一齐，喺街度拖紧手唔会刻意缩开，因为对方都会好难受。”
与队友Marf（邱彦筒）同日出歌，比起压力和竞争，Winka笑言开心大于一切：“有少少互相扶持嘅感觉，除咗团嘅嘢，大家各自经历嘅都可以分享，互相都好明大家做紧乜，系一种几特别嘅倚靠。”她坦言曾担心新歌没人听，但队友却为她注下强心针：“佢哋话唔好担心，一定有人听”。
吁要珍惜K歌 做情歌非为争奖
《一手造成》是较为大众化的情歌，亦有人质疑“点解Winka会出一首咁K歌嘅歌？好稳阵㖞”，Winka语带激动说：“千祈唔好睇小K歌，大家由细到大都系听K歌，你会唔会话陈奕迅嘅歌系K歌，所以唔钟意听呀？唔会㗎嘛…要揾到一首Melody超容易入脑、音乐班底系食中晒你想表达嘅嘢，而出到街有回响，做到人人有共鸣嘅情歌、K歌系一啲都唔容易，大家要珍惜K歌同情歌。唔好标榜系唔好嘅嘢，佢始终陪住大家成长”。
她续指外界或许以为做情歌多人听是为了争奖，她澄清并非如此：“我入COLLAR之前已经派过台用Winka呢个名，我今年都冇奖拎，冇得竞逐新人㗎啦，除非我有机会拎最喜欢女歌手，靠大家啦真系，哈哈。”但奖项对Winka来说是Bonus，得到乐迷的喜欢、做歌的过程感到满足才是最大的成功感。
Make up：Percy Shing
Hair：Taurus Lee
Stylist：Exactly the Sam
Outfit：Harvey Nichols Hong Kong，APM Monaco
点撃睇更多专访靓相：