【春娇救志明．影评】大个仔喇，千祈唔好再拍第四集喇！
所谓事不过三，《Fast and Furious》或者占士邦片就可以长拍长有，但剧情片拍到三集而唔变烂嘅，少之又少。
《志明与春娇》系列拍到第三集《春娇救志明》，身边朋友未致于一面倒负评，但大家都希望唔好拍第四集《志明救春娇》了。
《春娇救志明》好唔好睇？如果你冇睇头两集，或者第一次睇彭浩翔，咁应该觉得好好睇。你当佢系个新导演，就十分好睇添。但问同彭导以及志明春娇一齐成长嘅人（例如我），应该会答你有啲失望。朋友话好似去开啲餐厅咁，其实跌 watt 不少，但始终有感情，亦想其他未食过嘅人去试，所以唔想讲得太尽。
我自觉比好多人更有资格讲彭导，因为我真系佢 fans，甚至佢未拍戏之前已经系。大学时睇佢嘅小说《进攻女生宿舍》同《黄昏动物园》，完全被佢古灵精怪嘅念头，以及对生活细节嘅观察力所征服。
佢导演嘅戏，我全部睇晒，有啲睇两次，《伊莎贝拉》我睇咗三次。我亦认为自己系佢嘅“目标观众”，代入到佢嘅电影。毕竟佢嘅戏主要系拍比 1970s 中至 1980s 头出世嘅人睇（佢，杨千嬅同余文乐亦系呢个年代），呢班人唔会老到唔明咩系“da-me smoke”（唔畀食烟），但亦唔会后生到未听过 Raidas 嘅《传说》。
彭导在《伊莎贝拉》同《香港仔》已经证明咗佢嘅深度，以及拍“正经戏”嘅能力。佢嘅戏唔系只得粗口（特别系女人讲），黄色笑话，怀旧广东歌同小聪明。《志明与春娇》系列最煞食嘅唔系呢啲嘢，而系彭导自己对身边事物，以及男女关系嘅观察。呢点彭导比起杜琪峰叶念琛更加贴地，至少对 70 中 80 头嘅观众嚟讲系。当年嘅杨千嬅同余文乐都系冇乜演技嘅偶像派，撑起成套戏嘅无疑系剧本同彭导本人。但不幸地，去到《春娇救志明》，就好似倒退到靠返粗口，黄色笑话，怀旧广东歌同小聪明呢四大法宝。
第一次睇彭浩翔你就以为睇“屹屹刚”系入错戏院，就会对啲“正经”女仔讲粗口咁流利咁贱好惊奇。但睇过两集嘅，就明知陈逸宁一定会讲粗口，明知成班女会唱《传说》（其实呢幕有乜谓？）。我甚至一见到个 Dali 已经知佢会玩“指公环”，讲“小不忍”我已知下一句系乜，就连“白毛女”呢个 gag 亦知佢实玩。
讲呢啲唔系想讲我有几醒或几了解彭导，而系好多观众同余春娇一样，冇咁好气，一早估到你搞坛咁嘅大龙凤啦。我唔会因为一套戏觉得彭导回晒塘，江郎才尽。佢系香港近十几廿年其中一个最有才华嘅创作人，但在呢个系列，佢应该已经玩无可玩了。
第一集《志明与春娇》，叫好叫座，够创新。原来都市爱情片可以咁拍，在杜琪峰嘅旧式白领男女爱情，同叶念琛嘅你偷食我出轨你再出轨之外，自成一格。第二集《春娇与志明》，爱情同生活嘅“中港融合 + 矛盾”，合拍片味极重，但彭导一样处理得好好，好多人认为系少数成功嘅合拍片。而现实中我呢位目标观众，当年亦有朋友北上揾食，在北京层楼个火炉啪啪声，但亦有感情受到北方佳丽（或小鲜肉）挑战嘅。呢套戏亦有彭导自己嘅个人经验，闻说佢亦系𠮶期开始北上成立创作室，同埋在北京买楼（否则佢唔会识上“床吧”）。
第二集春娇最后击退“北方 + 空姐”两大原罪嘅尚优优，睇到女性观众好开心。彭导甚至将同一条桥拎去玩《撒娇女人最好命》，香港变大陆，大陆变台湾，杨千嬅变咗周迅，余文乐变成黄晓明，杨幂就变成隋棠，系有点懒，但一样好睇。
去到今集《春娇救志明》，理所当然就系讲到“合久必婚”呢个问题，以及要为永远长不大嘅张志明嚟个了断。众所周知张志明有彭导自己嘅影子（都系处女座），余春娇亦都有（父母离异），但现实中彭导其实结咗婚十几年。唔知系咪因为呢个原因，到佢拍今集嘅题材，就明显冇之前两集处理得咁好。张志明一路都长唔大，今集佢嘅“成长”系重点，似乎彭导成长得快过张志明太多，反而拍唔到𠮶种感觉。
今集嘅跌 watt，由戏入面嘅“金句”亦睇到。之前嘅“成世人流流长，总会爱上几个人渣。”“我好努力咁脱摆张志明，但最后我发觉，我变咗另一个张志明。”真系相当有意思。“男人过咗 30 岁出差都未坐商务位系 loser。”“空姐要畀人非礼三次先可以报畀机长。”之类，我坐飞机（无论系坐经济定商务）出差都会同同事讲，有时都见到空姐会忍唔住笑（我坐飞机梗系望空姐，唔通望同事？）。“粉红色乳头，可遇不可求。”“睇相就公主，睇样就蕃薯。”冇乜特别意思，但我同朋友今时今日都仲讲紧。今集呢？你觉得有边句嘢好到肉？会令你十年后仲记得？系以后见到“可儿”你会话佢“好 X 可疑”？定你会改只狗名做“跟住”？
我好相信套戏会收得，而亦好多人笑得好开心，至少我在电影节睇首映时系咁（但到我在台北睇第二次时观众就冇乜反应了）。对，片尾嘅“余春娇打救张志明”我仲笑得出，见到秦沛吴岱融都几开心，但亦仅此而矣。成套戏更加似系彭导为自己而拍，Dali 系佢私伙嘢，surfwheel 都系，我估 Supreme 砖头都系，就连《传说》都系佢自己参加歌唱比赛嘅歌。作为睇咗佢咁多年嘅观众就当知多啲佢嘅嘢，但就戏论戏，就真系追咗咁多年睇埋个结局——而真系千万千万唔好再拍第四集。
但谁知道呢？彭导自己都话最唔想拍续集，但呢个系列依然拍咗三集。可能系商业考虑（上次《香港仔》唔收得），可能只系真系佢好钟意呢两个角色。既然系咁，就唔好玩到烂为止啦。
（本文纯属作者意见，不代表香港01立场。）