断网︱郭富城难忘与林家栋床下底开拖　“差在未喺天花板打”

香港数码犯罪电影《断网》将于3月9日正式公映，电影由郑保瑞监制、《麦路人》导演黄庆勋执导，三大影帝郭富城、林家栋、任达华联手主演。今日（4日），郭富城与林家栋携同顾定轩、Brian李凯贤@廿四味、监制与导演，一同到戏院谢票，与优先场的观众见面。现场迫满郭富城与一众演员的影迷，群情汹涌。

郭富城与林家栋于谢票后接受访问，Aaron对于不再需要配戴口罩，全院满座的戏院感到震撼 ：“大家咁群情汹涌，我哋做演员更加群情汹涌啦！去多谢观众嘅支持啦！”林家栋亦表示：“我哋所有演员都差唔多出到嚟。”Aaron对观众的表情感到久违与难忘：“睇到大家嘅笑容，好开心，咁我哋就好开心喇！隔住口罩见唔到嘛！”家栋则笑指：“起码呼喊都大声啲啦！”

早前在《断网》首映礼上，郭富城曾透露自己与拍摄时受伤，被关心伤势表示：“我系拍紧戏受伤啰！当然有好多动作场面，有实打嘅、有虚拟世界嘅，我最印象深刻就系我同家栋喺床下底，喺一个㓥房里面，我谂系得60呎到嘅㓥房里面打。监制同导演佢哋就摆咗好多家具、一张床同埋一张台，吉咗一个位就叫我哋两个喺到打。”

家栋亦补充指：“吉咗个床下底咋㖞！周围都有嘢㗎㖞！床上面有我细佬（顾定轩）喺到，侧边又柜又呢样𠮶样。”Aaron随即开玩笑指：“差在未喺天花板打㗎咋㖞！”又续指：“我觉得用心良苦嘅，我拍戏咁耐未试过，未试过呢种打法。”林家栋回忆起也表示：“好痛苦！”Aaron则笑着回应家栋：“但系又好特别啰！特别痛苦！”

郭富城：“我自己拍戏咁多年，拳头交、一招一式嘅就好简单嘅，反而系唔容易受伤嘅。有两样嘅动作戏系好容易受伤嘅，一样系打拳，你唔好以为戴住个拳套就好正，拳拳打你个头，系会震到你晕嘅；另外一种就系我哋而家呢种，肉搏。唔系要你拳头出嚟，而系一直斗力斗力，一样好容易伤到筋腱、筋骨嘅。我拍完之后就伤咗，做咗两个月做物理治疗。”

除了电影宣传，郭富城亦开始做巡回演唱会宣传：“我开始要做世界巡回演唱会啦！呢个系一个新嘅演唱会，叫‘舞林外传’，一个全新嘅Rundown（流程）、全新嘅一个骚嚟嘅。”郭还笑指会带埋林家栋去：“我带佢去法国、美国同英国啰！”林：“但系佢冇话带我去演唱会㖞！带咗我去法国咋㖞！”郭：“我同佢视像啰！我哋上网嘅、唔系断网！千祈唔好断网！”郭：“睇情形啦！要再Plan下嘅。”