【TVB．博评】空有演技冇得发挥：在大台的金燕玲与惠英红

今届电影金像奖尘埃落定，电视迷如我，最开心梗系见到林家栋挨出头，凭《树大招风》得到影帝殊荣。林家栋嘅心路历程、喺大台嘅岁月，攞奖之后几日大家都已经不停回带，亦都有报道讲到刘德华点撑佢，真系睇到好感动。不过今次我想讲嘅系影后惠英红，同埋连续拎咗两年最佳女配角嘅金燕玲。

大年纪就要做绿叶

香港电视观众近年对金燕玲嘅印象，要数到佢喺大台嘅处境剧 《同事三分亲》、《毕打自己人》，仲有神剧《天与地》。不过金燕玲喺剧里面一啲都唔亮眼，亦都冇得发挥咁济，全部都系清一式摆起个款嘅强势女人。《天与地》就好啲，做邵美琪家姐Brenda，同林保怡有对手戏，叫做对剧情有大啲嘅影响，但都只系做第三女主角。（1982、83年原来都帮大台拍过两套剧，但我未睇过）

惠英红就由1980年代尾开始，一直都有拍无线剧，但一路都冇女主角做。令我最深刻嘅系《创世纪》做马德钟嘅老婆，已经算系最有发挥嘅一次。直至到王维基嘅香港电视拍剧，惠英红先喺《我阿妈系黑玫瑰》做女一（咁啱同《幸运是我》一样拍住陈家乐）。不过港视失落电视牌照，而《我阿妈系黑玫瑰》唔系当时力谷嘅剧集，我估好多人都未睇过。

有演技冇角色发挥

讲咗咁耐，其实想归纳一句：大台走宝。金燕玲喺2007年返大台拍《同事三分亲》时，已经系两届金像奖最佳女配角、一届金马奖最佳女配角，演技有肯定，但都冇戏分发挥。惠英红系第一届金像影后，虽然当年系凭武打片夺后冠，但净系睇《创世纪》里面求马德钟救返个囝嘅一段戏，其实都有《心魔》、《幸运是我》嘅影子，根本系好戏，但就要去到王维基2015年开剧，佢先可以做到女主角。点解呢？我觉得绝大部分系因为年纪问题。

邀约老戏骨拍戏

2007年金燕玲拍《同事三分亲》时系53岁。惠英红拍1999至2000年《创世纪》差唔多40岁。当年就系冇机会畀呢啲年纪嘅艺人发挥，十个有九个都做绿叶。除非你系超级一线星好似汪明荃、黄淑仪、李司棋咁，先有机会继续担正做女主角。

不过到咗2017年嘅今日，52岁罗霖、47岁陈慧珊、46岁江美仪、46岁陈松伶、44岁蔡少芬、44岁陈炜、40岁田蕊妮，全部都可以做女主角，啲剧排住陆续上。有人话呢啲系电视界老化嘅现象，我又唔完全同意。剧种、演员年龄层愈多愈广，咁先可以满足到唔同嘅观众。当然各种剧都要适量啦，年纪稍长嘅要畀机会，超级资深演员如修哥、罗兰姐一样可以担大旗，春青逼人嘅就开啲青春剧畀佢哋发挥。

讲到尾，都只可以讲句时势做英雄，唔恨得咁多。但系我深信好演员不受年纪所限，有时有人生阅历嘅话，演技会更上一层楼。希望无线、ViuTV、奇妙都可以畀多啲机会一班年纪唔系十八廿二嘅女演员做女主角。人哋Fox已经“慧眼识英红”揾咗惠英红拍剧，本地电视台可唔可以都快手少少呢？

（文章纯属作者意见，不代表香港01立场。）