台湾游客眼中的香港美食：点解同我哋心水差咁远？

游客其实系咩一回事？其实就系冇𠮶样整𠮶样，隔离饭香。你觉得台湾人嚟香港食许留山匪夷所思，台湾人一样好难理解你排队去食阿宗面线然后几十蚊港纸饮杯春水堂，日本人一样好难理解你去到日本都仲要食一兰仲要打卡影相。

作为一个伪文青，我屋企有二三十本Lonely Planet，朋友上嚟都会见到。但新朋友最留意到嘅，唔系古巴或瓦努阿图，而系我有本Hong Kong and Macau嘅Lonely Planet。唔系自用，亦唔系送礼——而系我想知在游客心中香港系点，佢哋钟意乜，觉得香港有乜好睇，结果往往系有惊喜。

就好似早排有台湾旅游网站，选香港最正食店TOP 20，出嚟嘅结果真系震惊几百万人：

讲明先：

1. 我唔系食家，以下只系我相当主观嘅意见。2. 但作为“无饭家庭”嘅成员，我长期出街食饭，呢20间餐厅我全部食过。3. 而我因工作因私事，呢几年成日去台湾，一年十几廿次，甚至而家帮台湾公司打工，接触不少台湾人。

以上就系我要申报嘅。申报完话你知，我都O晒嘴。但我绝对唔会质疑呢个选举嘅结果，因为我嘅台湾朋友嚟香港旅行一样必去澳牛再兴。由社交网络上嘅讨论睇嚟，唔止系我O晒嘴，大把香港人觉得十分奇怪。唔敢讲出口嘅一句就系：台湾人唔系食惯好嘢嘅咩？

品味各有不同，我在港岛返工多年。由朝朝去檀岛食早餐，变到而家贴钱我都唔会食（讲真的）。有人唔同意我，话外卖蛋挞或咖啡之类都仲OK，咁可能系我问题。但有几间，例如澳门茶餐厅许留山或者翠华，可能都仲会食，我都会（我情人节先食完翠华）。但叫香港人选TOP20，应该好难入榜下话？（澳牛再兴就会有人拣嘅）

愈恶愈有人钟意　全因隔离饭香

更有趣嘅系，好唔好食都仲可以几主观，但服务招呼相对地冇咁多争议。我见到嘅系，呢20间餐厅，有几间嘅服务都真系恶名昭彰。开名都唔怕㖞，𠮶几间餐厅好自豪的。你去睇下九记潘生嘅访问，就知点解早排有客食到同佢打交，绝不意外。

本来即系一个愿打一个愿挨，又唔关我呢啲花生友事。反正本人已经唔再去九记，倒唔系因为态度恶劣，而系太多人排队。香港人自细食澳牛食再兴就习以为常。但，我最奇怪嘅系，台湾人平时接触开咁好礼貌嘅同胞，反而走嚟香港钟意畀人“另类招呼”？果然香港餐厅系marketing of de-marketing，愈恶愈有人钟意。唔怪得《格雷》可以拍咁多集，乖乖女学生都要沉迷SM畀人打。

游客其实系咩一回事？其实就系冇𠮶样整𠮶样，隔离饭香。唔只系台湾游客，系全世界都系咁。《大丈夫》入面詹瑞文饰演嘅网吧经理“巴治奥”讲得好，“喺香港我哋贴日本妹，喺日本人哋就贴张柏芝”。呢啲就系隔离饭香，满足游客嘅异色（exotic）想像——虽然我冇见过有人在日本贴张柏芝。你觉得台湾人嚟香港食许留山匪夷所思，台湾人一样好难理解你排队去食阿宗面线然后几十蚊港纸饮杯春水堂，日本人一样好难理解你去到日本都仲要食一兰仲要打卡影相。

的确，游客就系咁嘅一回事。我哋觉得好平常，但鬼佬嚟香港钟意睇庙街，因为佢哋冇咁嘅嘢。日本人劲迷九龙城寨，甚至迷到出咗只叫做《九龙风水传》嘅Game，但李小龙在《猛龙过江》就觉得罗马斗兽场冇乜好睇，“城寨都大把烂屋啦”。日本人亦都迷尖沙嘴铜锣湾嘅“凤楼”。点解？唔止因为咸湿，而系因为日本好少有啲咁杂乱嘅地方。我哋香港人去到其他地方钟意小镇，钟意乡郊，钟意阳光海滩。但我旧公司的东南亚同事完全不能理解，觉得佢哋屋企日日都对住呢啲啦，佢嚟到香港梗系去商场Shopping睇摩天大楼。

延伸读去仲可以讲好多，唔止系游客，好多时外国人对香港嘅喜好我哋好难理解。成龙当年红遍日韩大把女影迷甚至女明星献身，大家略有所闻，但知唔知元彪在日本一样红到发紫？而家香港新一代都未必知边个元彪。“古惑仔”演陈浩南嘅郑伊健在香港都几红，但在台湾更加夸张——二十尾至到三十尾嘅台湾女仔，好似个个都好钟意佢。女士一样，好多鬼佬眼中嘅“东方美人”，我哋都好难认同。除咗隔离饭香，亦有因为真系品味不同。

被游客“异化”的餐厅

不过餐厅同明星有样嘢好唔同。明星未必会好大转变，顶多可能恃宠生骄（但讲真大家都未必会近距离接触），或者好似宇宙GEM咁畀人话只去讨好内地歌迷。但餐厅唔同，游客的确可以“异化”一个地方嘅景点，商铺，特别系餐厅。

唔止我，我谂好多人以前钟意食檀岛同九记。做乜而家唔食？唔多唔少系因为畀游客异化咗。有啲人可能系因为意识形态，游客店（特别系大陆游客）去嘅我就唔去，我要发掘（杂志登晒广告嘅）“隐世小店”。亦未必系去到咁上纲上线，可能纯粹因为有啲餐厅唔忧做就欺客，呼呼喝喝嘅有，食老本不思进取嘅有，讨好游客口味嘅有，不停加价嘅又有。甚至有时根本店主都有心做但真系太多客搞到拖低质素又有。

今次台湾人心中嘅TOP20，其实大家讨论完都系一笑置之——因为都真系好多香港人唔会点再去，而反正香港冇嘢多就系餐厅多。不过不妨去谂下，点解香港人心中嘅TOP20，同游客心中咁大分别？系咪每个地方都系咁？又有冇啲舖头系香港人同游客都唱好？

点解香港人去到台北一定要食阿宗面线同鸭肉扁？点解春水堂咁多人排？真系咁好食？定系旅游书推介？定系人去我又去？我估都系后者居多。我第一次去台北，叫朋友同我去春水堂，佢话“那是游客才去的”。我答“但我就是游客呀”。其实就系咁简单。下次去任何地方任何人质疑你做啲嘢“做乜咁游客”，记住，拎住本闪闪书不停打卡upload相嘅你就系游客嘛，唔通系探险家征服者？

（文章纯属作者意见，不代表香港01立场。）