【职场警讯】张eDM已经去到v16，你地究竟改完未？

Click得入嚟，你知唔知乜嘢系v？V stand for Version！v16即系同一份文件/图已经改到第16次，系尖叫、眼花、想晕、作呕、崩溃的时候！如果你做紧嘅工系唔需要对住同一份嘢改完又改、改完又改，你唔会明白点解个人明明唔眼训但都系好混顿同埋集中唔到精神。望住𠮶幅明明已经将个太阳画咗喺中间嘅图，你唔理解个客／老板点解仲叫你将个太阳“置中”，究竟要放到几“中”先系佢心内的“中间”？除咗叫你改𠮶个人之外，个世界究竟仲有咩人分到个太阳有0.03mm偏了左边？

曾经在PR agency工作，𠮶时我成日都觉得D in house PR系失忆嘅。

version 4𠮶次，个客叫我喺poster写“精致甜品，尽在ABC甜品屋”，佢话个重点系要突出“甜品”二字，令人谂起甜品就谂起ABC甜品屋；version 5，个客又同我讲：“都系唔想一句句子出现两次‘甜品’，感觉好累赘”，结果改成“精致甜点，尽在ABC甜品屋”；version 6，个客谂谂吓都系觉得‘甜点’唔够准确，又改成“精致糕点，尽在ABC甜品屋”

当然，每个version，阿客人都唔会只系改一部份，总会顺手又改吓图，个雪糕试吓拉大2 cm，转头又试吓缩细返4cm，反正改嘢唔洗钱，咩都试吓啰！“数量有限，卖完即止”好D？定系“限量发售，售完即止”好Ｄ？唔知㖞，决定唔到㖞，“试吓啰”。

有Ｄ嘢同毒品一样，唔好乱试

就系呢种试吓唔洗钱嘅心态，到6点都未放得工，仲陪佢玩紧“甜品、甜点、糕点”，最正系往往都会用返最先𠮶个　—　甜品。各位客人呀！老板呀！其实“用人不疑，疑人勿用”呢个道理你明唔明？你揾得我做嘢，就应该相信我一定系呕心沥血将最好嘅嘢做出嚟，往往头三个version都系最用心，已经以最好嘅用字、行文、图画将产品呈现，因为我都想个task尽快完，大家开开心心准时放工，所以喺你“试吓啰”之前，我就已经用专业判断同知识，整出一个最好效果，交到你面前就已经系90分以上嘅功课。偏偏你就要喺version 4-14之间将份嘢由90分变40分，然后到version 15你开始累了，就“算啦，放手比你搞”，结果我又要由version 16开始慢慢将Ｄ嘢变返version 1-3嘅样。

系，我知我收得钱就要陪客人／老板改来改去，但你又知唔知咁样改法，系揾人笨又揾自己笨？好简单，我明知你点都会改十几次先收货，即系头十次心机都会比人当垃圾，长此下去我都无心机喺一开始就将最好嘅嘢比你啦，反正张图画成点，你都系钟意改。我们必须承认人人都有惰性，同埋无人钟意被不信任的，呢种改来改去嘅“训练”，好容易就会令人“求其啦，反正都要改”、“有字就得啦，反正都唔会用”，唔够胆放手、交出信任，咁你其实唔洗比钱揾人做丫？所有嘢自己做哂咪得啰。

毕业后，我们仍是填鸭

到我做in house PR，就更明白点解一份简单嘢都要做到v16，就是那种层层递进的架构。当你交出version 1-3，接收同比意见𠮶个，好多时都系话唔到事𠮶个，例如系officer，officer同你玩到version 5，佢先开始交去比senior officer睇，如是者仲有assistant manager, manager, senior manager……每人改两三个version，唔经唔觉就v16。

点解会咁？因为每一个上级收到份嘢，都会问下级“你comment咗未？”下级为表示自己做咗嘢，就一定会先comment而后交。其实我真系唔明，一个完全话唔到事嘅人，comment有咩用？特别系设计、写作呢类非常主观，完全系讲个人品味，毫无客观准则嘅task，officer觉得靓，唔等于senior manager觉得靓，咁officer个comment究竟有咩意义？讲得好听Ｄ系训练officer做judgment，但最终系训练佢学识judge靓唔靓，定培训佢成为上司肚入边条虫？直到有一日，佢知道老板钟意“甜品、甜点定糕点”，咁就系成功了？

想向上爬，似乎都避唔开要识读老板／客人个心？如果你有类似经历，欢迎到我Facebook page留言交流。

（文章纯属作者意见，不代表香港01立场。）