【武术01】曹星如唔系“第一”㗎啦咩？

曹星如会喺3月11日同日本拳手向井宽史比赛，当然全城注目。我见各大报道都系讲曹星如，但系今次打咩腰带呀、佢对手嘅资料呀都好少提。咁其实好正常，支持自己友嘛。但系，拳击比赛就要两个人先打得到，讲下对手系咩人都好应该。

入正题，曹星如今次对手系咩人?争咩腰带? 

争咩腰带?

今次Rex要争取卫冕WBO超蝇量级国际拳王(WBO International super flyweight title)同WBC超蝇量级亚洲拳王(WBC Asian Boxing Council super flyweight title)，赢咗就可以攞埋对手向井宽史嘅WBO超蝇量级亚太区拳王位(WBO Asia Pacific super flyweight title)。所以系三条腰带。

讲讲咩系WBO先，之前讲过，拳击系有唔同比赛公司嘅，最大嘅有四个: WBC、WBA、WBO同IBF，细嘅单单美国都有近70间。呢四大拳击公司都系世界性，所以都可以出“世界冠军”。

所以，WBO超蝇量级入面最有价值嘅腰带系WBO超蝇量级世界拳王(WBO World super flyweight title)。其他国际拳王、亚洲拳王、欧洲拳王含金量都比唔上世界拳王。

唔系世界“第一”㗎啦咩？

揾返WBO或者排名网，大家可以睇到，喺Rex Tso(即系曹星如啦)上面仲有一位，叫Naoya Inoue，亦即系曹星如之前讲嘅世界冠军井上尚弥。

所以呢到个“第一”有歧义。当我哋一听到“第一”嘅时候，例如小明赛跑跑“第一”，我哋就会知道佢赢咗个比赛，佢系冠军。但喺拳击入面，世界拳王系唔洗再有排名嘅，世界拳王就系世界拳王，排名第一同世界拳王系分开嘅。

拳击排名升跌系睇战绩，做世界拳王就要打返嚟。你要做世界拳王，就必须要打赢现时世界拳王。除非出现空缺，但就算出现空缺，都系要同另一拳手比赛，总之，腰带一定系打返嚟。

情况有少少似猜皇帝，你赢好多人，排队排到第一个，无错你系第一，但唔代表你系皇帝，你要猜赢佢先系皇帝。

但同猜皇帝唔同，世界拳王头衔战唔一定系拳王对排名第一嘅，呢样嘢要睇经理人公司，例如排名WBO第一嘅曹星如今次打嘅系排名14嘅向井宽史(Hirofumi Mukai)。

咁向井宽史咩来头?

讲排名不如直接睇图：

红圈系呀Rex，蓝圈系向井宽史。

喺Boxrec.com嘅世界排名，Rex就22位，向井宽史就25位，顺带一提现时WBO世界拳王井上尚弥排第2:

睇返战积13胜4负3和，13年挑战WBC World super flyweight title失败，14年一胜一和，15年一胜一负，16年两胜一和，唔算特别好。KO率方面亦唔高，13场赢嘅比赛入面有3个KO，KO率唔高，反而输KO率较高，4场败绩入面有3场系输KO。

向井宽史现时持有嘅超蝇量级亚太区拳王腰带，其实曹星如都赢过，不过交还返。所以，今次系曹星如被向井挑战。

咁咪即系向井好唔掂?

咁输同挑战失败有好多原因嘅，呢方面我交返俾专家答你：

几时可以打世界拳王?

打咩人唔系由拳手自己一个可以决定，拳手嘅经理人会考虑唔同因素去揾对手，例如场比赛票房会唔会高呀、两个人几受欢迎呀，两个人风格会唔会好闷之类。但其实讲咁多都系一个字 ：钱，钱𠮶面解决咗，又有收视保证，排名靠前要打就唔大问题。职业拳击你懂的，叫得“职业”当然有商业考虑。

今次系咁多！

（本文纯属作者意见，不代表香港01立场。）