【迷】何启南原来系暖男　屈Dee哥拍拖4年再婚：结婚有咩好惊？

继鹫哥之后，这阵子最强奸角一定是《迷》入面的屈Dee哥(何启南饰)，杀人不眨眼，在剧中迫到田蕊妮就快黐线，真系看得人心寒，不过现实中的何启南其实是铁汉柔情，最近低调入纸再婚，和拍拖4年的女友杨颖静低调入纸结婚，何启南接受《香港01》访问时说:“其实冇咩特别啫，结婚有咩好惊？遇到啱嘅就使等，我唔识浪漫㗎，但佢都唔介意，送花?有，佢叫咗几次㖞，点可以唔识做㗎。”剧中屈Dee哥霸气十足，冇人敢向他Say No，但现实中的何启南反而女友优先，他说：“两个人嗌交紧有，一齐嘈就冇意思，我唔会，等佢下咗啖火先，之后再慢慢倾，佢都好明白事理㗎，好难得揾到一个啱嘅人，我一定要俾个名份佢，都要为佢谂，等佢同家人有个交待麻。”

何启南感情稳定，反而在无线工作，他就感觉未能掌握，他说：“呢次有屈Dee哥，但下次佢可能派你做其他戏份冇咁重嘅角色，但我都要做，因为你唔做，就可能还唔到骚，所以我哋其实好被动，以前我唔想做奸人㗎，但我入嚟tvb咁耐都好似剩系做奸人，第一次做奸人好似系《陀枪师姐》，当时我做古惑仔，古仔（古天乐）都话：你条友都几似㖞……𠲖家我想要嘅系更多工作机会，继续做奸人冇问题，但如果有其他角色俾我玩就更好啦，最紧要有工开。”

资深的电影迷或会记得何启南曾经是电影的当红小生，拍过《操行0分》《警贼兄弟》，揾钱曾经非常容易，初入来TVB重头做起，其实不容易，他说：“细个唔识谂，拍部戏收５万蚊，当时30零万一层楼，但我攞哂啲钱去玩，买车呀，饮饮食食，如果当时我攞哂嚟买楼？哈哈！我𠵱家就真系屈Dee哥喇！到嚟无线重新嚟过，初头得8，9千蚊，交租都冇咗4500，我好记得，好想返工，因为唔驶驶钱，又有饭食，冇工开嘅日子，自己匿埋系屋企，系咁问自己点解会咁，不过后尾冇谂喇，做好眼前嘅嘢最实制，𠲖家几好呀，keep住有工开，颁奖礼？如果有份梗系开心啦，冇都唔紧要，最梗要有嘢做。”