专访｜Dark黄明德认被古巨基盛赞后有压力：完全冇谂过佢会咁讲
上年由英皇娱乐举办的《冤枉新秀训练营》，一位以踢馆者身份现身，年仅17岁的男孩在比赛中自弹自唱《Photograph》，得到台下的古巨基盛赞：“我一路听，心里面一路有两个字：黐线！听晒后有五个字：好听到黐线！我好大胆咁讲一句，如果你冇入到……冇俾唱片公司签，你通知我一声得唔得呀？因为我觉得佢哋走宝。”
他是黄明德（Dark），虽然今年踏入18岁，但他只是一位中五学生，皆因他操行不佳，先后在中一、中二留级，出道作《留班同学》所说的正是这段黑历史。本来爱画画的他，在得到哥哥教弹结他后，开始组乐队、参加比赛，当机会来临的时候，他决定放手一搏：“由我开始唱歌𠮶刻开始，我一直都有谂过加入乐坛做歌手，只系冇谂过咁快可以入到，以歌手身份加入演艺圈，当初都系纯粹想试下。”
撰文：刘传谦
摄影：梁碧玲
黄明德发型: @ladolko Ladol Ko
发廊: @mindner.professional
黄明德化妆：Khaki Yan
黄明德造型：Anson Lau
Venue: @xhale.hk
校内歌唱比赛获Alton@MIRROR认同
Dark凭过去画画的天赋，虽然没有过人的战绩，但足以令他获赛马会体艺中学收录。这间中学过去不乏陈苇璇、刘俊谦、余晓彤（Hidy）等投身演艺圈的校友，但数到令Dark印象最深刻的一位，非MIRROR成员Alton（王智德）莫属。一次校内歌唱比赛，令Dark有机会在Alton面前展示唱功：“有一年嘅比赛佢过嚟做评判，𠮶年攞到冠军，之后有个类似研讨会嘅活动，佢就问我‘我觉得你唱歌都几好听，有冇谂过入行？’”因为唱歌在校内技胜一筹，不单听到朋辈笑言“歌手㖞”、“几时出道？”，甚至老师也开始鼓励他参加更大型的歌唱比赛，结果他没有参加电视台的歌场比赛，反而加入当时《冤枉新秀训练营》的踢馆组，11强的表演也令他备受期待。
获古巨基称赞反而有无形压力
虽然在比赛中得到前辈古巨基称赞，但Dark直言在紧接进行的决强赛前有股无形压力：“得到佢呢句咁重量级嘅说话，好似有一支强心针打落嚟，但系我喺决赛反而有压力，好惊佢失望，觉得我原来都只系唱到咁咋。佢唱歌真系好劲，咁啱又系最后一个畀评语，佢咁样讲我系有少少惊讶，完全冇谂过佢会咁样讲。”随后加盟英皇，Dark认为眼前有机会就要把握：“佢哋同我讲有呢个offer，我好少会主动拒绝，除非我真系要去外国发展或者移民。我冇呢方面嘅选择，所以就冇谂过拒绝，反而遇到有机会就顺住去做，只要有平台或者支援畀我继续做创作已经好好。”
年少反叛两度留班
留班，若非成绩未达要求，就是操行不佳的惩罚。Dark形容自己小时候十分反叛，最调皮的一次经历发生在他第三年的中学生涯：“𠮶年有一个夜晚搞咗个rock band show，我同朋友贪玩，决定留喺学生会室过夜，第二朝先偷偷地行返出去，但系我哋畀校长同副校发现咗。因为我哋学校系有员工宿舍，佢哋就系住喺入面，最搞笑喺我哋朝早出去𠮶阵仲攞咗粒波嚟踢，点止嘈醒咗佢哋，于是就畀佢哋发现咗，之后俾佢哋记小过。”虽然反叛，但Dark非常清楚底线，当时未成年固然要远离烟酒，但他至今也尽量避免接触：“食烟饮酒好影响之后嘅生活，唔净止中学生涯犯嘅错咁简单。尤其我唔系一个好自律嘅人，一掂就好难戒到，有啲嘢真系开咗个头就收唔返。”
哥哥经历令自己痛定思痛
自从中二过后，Dark总算没有再留班，他笑说是学校制度下带来的最后通牒：“学校唔容许有学生留班多过两年，所以我已经唔可以再留，如果唔系就会俾学校劝喻离校。”他再说起成为自己音乐路上启蒙的哥哥，直至中三下学期，兄弟间的一段交谈令他下定决心，开始认真对待学业：“我阿哥本身学业都差，甚至系未完成到中学生涯，因为咁佢先知读书有几重要，之后读过好多唔同课程弥补自己过错。加上妈妈本身年纪都比较大，佢同我讲如果迟两年毕业，妈妈就要迟两年先退休。我已经迟两年毕业，如果我畀学校踢出校，我就要揾第二间转校，但系转校通常都要你留一年，变咗咁就留3年学，咁会变咗无止境。我开始惊醒，拣科之后开始畀多好多心机读书。”
要出歌先要读好书
当然，与公司在签约时的约定也是一个主要原因：“类似系一个条件交换，佢哋话会帮我出歌，但系我要应承返佢哋唔可以唔读书，唔可以觉得依家有嘢做就唔读书，无论到时喺呢一行发展成点，我都要完成埋学业，起码要读到大学。公司真系讲到明如果我唔努力读书，可能真系会唔帮我出歌，一定要畀佢哋见到我有进步。”虽然未想到大学的心仪科目，但Dark有意就读历史相关科目，原因不是希望探古寻今，而是方便自己将勤补拙：“就算miss咗呢堂，或者冇听到书，你都可以靠自己睇书弥补，起码都知道做紧咩；但系理科、商科的话，只要你错过咗𠮶堂，就算你上网睇片都追唔返。”
音乐发展以学业为重
说到自己的音乐喜好，Dark说自己爱听经典情歌、K歌，尤其陈奕迅的作品。不过数到最爱的Eason作品，他反而推荐《六月飞霜》：“我听过佢唱Live，真系好癫，先唔讲唱歌技巧，佢畀我觉得系唱得好实在，只能讲系好有感觉。”谈到日后除了继续在音乐路上发展，更需要开始准备公开试，他坦言：“话就话要平衡，但系都冇可能嘅，一定系会有一边多啲一边少啲，只系依家仲未体会到，因为仲放紧暑假，学业上要面对嘅都比较少，只系用zoom补课，做下功课，温书。之后返实体课堂，我会尽量学业行先，完成咗呢方面嘅事先去做呢一行嘅工作，尽量将呢24小时除咗食饭、瞓觉、梳洗之外都会放晒喺呢两方面。”