李斯特城极速炒领队，打工仔有乜启示？

拎返旧年嘅“分析”睇，包保笑大你个口。除咗陈腔滥调嘅努力可以成功 （踢英超边个唔努力？）外，仲有就系云帅点领导有方，唔畀压力球员又系优点，就连赢波食Pizza又系成功之道（必然激死严控球员饮食嘅真名帅哥迪奥拿）。

放心，呢篇唔系讲波，系讲打工，讲做人。

先嚟个极短篇故事：

两只蜗牛爬独木桥过河，爬左大半日，过到对面岸。忽然条桥就塌咗。蜗牛A就同蜗牛B讲：好彩我哋平时多练习，爬得够快咋。

心灵鸡汤画出肠嘅故事教训：

庸才总系将幸运当系自己嘅才华同努力。

旧年五月，小球会李斯特城（下称“李城”）童话式拎英超冠军，Facebook上洗晒版，报纸唔止体育版讲，连经济版娱乐版政治版都有人讲，个个专栏作家专家上身，事后诸葛亮话你知李城成功有乜启示，云尼亚里有乜过人之处。连我上股票吹水节目，监制都叫我讲两嘴。

就连曾俊华都出嚟讲，李城封王系“香港本色”，只要努力就可以克服到困难，冇嘢唔可能㖞。够晒薯片，即食廉价又冇益。但冇所谓，读者钟意垃圾食物。“香港本色”？够晒大吉利是。因为李城今年踢到一镬泡，执笔之时排紧尾三，分分钟要降班。领队云尼亚里（下称“云帅”）3月都未到就畀人炒鱿， 快过董建华脚痛。

而家样样要快，八点拎冠军九点要分析出街。但我钟意“让子弹飞一会儿”。试下拎返旧年嘅“分析”睇，包保笑大你个口。除咗陈腔滥调嘅努力可以成功 （踢英超边个唔努力？）外，仲有就系云帅点领导有方，唔畀压力球员又系优点，就连赢波食Pizza又系成功之道（必然激死严控球员饮食嘅真名帅哥迪奥拿）。

事实上，李城护惯级啦，之前降班添。对，上年冠军嘛，但冠军系常态，定护级先系常态？1赔5000大冷门，仲唔系云帅神机妙算？但，六合彩都期期有人中啦。1赔5000跑出，就代表个领队好劲？唔系其他因素？

知唔知真劲人同行运超人有乜最大分别？就系稳定同可持续性。费格逊人人称许，因为佢带领曼联皇朝封王N次。摩连奴声望咁高，因为佢带几队波都掂， 唔系一季冠军。你身边大把人话自己股票赚几个开，就算冇吹牛都好，点解毕菲特同彼德林治先系股神？因为人地keep住咁多年都有货卖，唔系一年扑中一只升几倍然后出嚟认叻。

人嘅弱点就系钟意听励志故事，“只要努力就得”，但你再努力都唔会变C朗拿度，努力系必要条件唔系充份条件。云帅唔系球坛素人，佢之前教十几队波，基本上系一无成就。教华伦西亚更加人人皆妈，教希腊国家队教到主场输比法罗群岛（边位读者去过？），外围赛包尾出局。有话今年主将简迪离队所以球队即时走样，如果系真，咁云帅旧年有几大功劳咁大把？

旧年5月本地媒体吹捧李城同云帅“只要有梦想”嘅成功之道，《经济学人》 （Economist）就有篇文，讲Underdogs are overrated。李城夺冠？值得开心，但唔好上纲上线揾启示，更唔好信咩“只要有梦想”。对，一盘冷水淋落嚟， 但苦口良药，呢啲先系值得睇嘅文章。 

篇文讲唔好因为一个百年一遇嘅偶发事件，就以为人人可以唔理自己实力咁去发梦。如果吹大参加者嘅得胜机会，叫人“追梦”系好事，咁拉斯维加斯就功德无量，造福人群。事实系咪呢？

云帅嘅刹那光辉唔值得过度吹捧，反而之后嘅事先值得研究。佢由半红不黑打十几份工冇份长，到忽然扑中冠军获奖无数，到极速被炒，英雄变狗熊一年唔够，对高级打工仔有乜启示？

第一，都系𠮶句，唔好将成功全部归功于自己，记住幸运女神在笑。特别第一次成功嘅，真系唔好将自己放到咁大。外国调查话你知，好多酒店房嘅温度控制系流嘅，好多电梯嘅闩门掣都系流嘅，就连交通灯都未必因为你不停按会快啲转灯。你可以控制到嘅，比你想像中少。世事无常先系真理

第二，一朝得志唔好语无伦次，唔好得罪咁多人。呢样嘢云帅做得几好。佢教咗十几队波都冇掂过，忽然成为大师，可能都有时怀疑自己系咪咁有料。亦因为佢只系一刹那光辉，所以言行举止都唔似“冠军领队”，唔会串串贡——咁至少佢折堕时，都大把人替佢不值，而唔系踩多脚，记者亦手下留情，唔系人人开香槟。

第三，小心你啲下属，特别系冇共患难过嘅。好多嘢你控制唔到，头号马仔要走人你都冇法，球员要加人工大老板（班主）唔肯你都冇法。但唔好当球员真系你忠心子弟。云尼都系2015年先上任，大家萍水相逢之嘛，又唔系你带佢出身。你估啲主将会唔会觉得自己根本有料唔关云帅事？听闻大把人同班主笃佢背脊。同下属打成一片好，但要居安思危。

第四，有得咬大大旧时好咬。时光倒流返两季之前，同你讲李城要护级，班主会好意外？要个领队祭旗？但坏在旧年做得好嘛。就算唔系要你今年都冠军， 期望都唔同啦。而呢样嘢，打工仔边控制到？所以拎到好业绩，记得大大力要加人工出花红，跳埋草裙舞拍埋台在所不惜，“我系冠军领队大把人揾”。因为，你今年做得好，超越目标，下年大老板嘅目标就更高，直到有一日超人都搞唔掂为止。呢啲就系打工仔悲歌。花无百日红，有得咬时当然大大力咬，否则第日你畀人炒之后一定后悔。

最后一点，老生常谈，但患难见真情。富贵时梗系多朋友，但你拎咗冠军先黎分析“云帅哲学”嘅，只系趋炎附势嘅小人，或求其揾嘢写嘅花生客。朋友应该支持你追梦，但唔系到你有成绩先话“我一早睇好你”，反而系应该在你意气风发时提醒你。

古罗马将军凯旋回归接受群众祝贺时，会有个奴隶在佢后面提佢“Respice post te. Hominem te memento”，大意即系“睇住收尾𠮶几年，你都只系个人”。成功时你需要嘅唔只系锦上添花，而系忠言逆耳嘅真朋友。

（文章纯属作者意见，不代表香港01立场。）