【亲亲我好妈】何广沛江嘉敏成最佳CP　险成天堂鸟：无线多机会搏

《亲亲我好妈》近来掀起不少话题，除了江美仪、江嘉敏两母女，其实被称为2017年TVB小鲜肉何广沛都是亮点，皆因他外表乖乖仔，今次就要做反叛少年，连佢自己都怕会Handle唔到。剧集出街之后，网民对何广沛的评价正面，更指他与江嘉敏非常登对，表示：“整套戏最好睇系佢哋!”、“两个人望落好清新自然”，还大赞“何广沛愈睇愈靓仔”。回想何广沛过往曾有机会加入俗称MK pop组合“天堂鸟”，但后来因专注拍剧而无下文，如今在TVB形象正面被力捧，可算是无行错路！

提起之前有机会加入天堂鸟成为MKpop大军，何广沛轻描淡写：“其实当时未成军，都系同经理人倾一倾计，之后都有返去问公司，佢哋就话：‘唔好啦，都系专心拍剧啦，大把剧畀你拍啦。’所以见完一次都冇下文。”而天堂鸟有一排都有风光过，曾经到内地上节目揾人仔，都算出过名。何广沛对此就话：“其实大家各有各做啦，始终我唱歌又唔系叻，而喺TVB机会都大啲，加上我而家都有剧拍啦，所以又唔系话冇做（天堂鸟）会唔好。”不过，好多人都唔会好似何广沛咁好彩，他就有一番见解：“系唔会咁好彩嘅，但入TVB有多啲机会去搏，呢套唔得就下一套再努力啰，我都相信成功唔系一日就得嘅。”

何广沛最终选择留在TVB，没有被冠上MK之名，如今在《亲亲我好妈》与江嘉敏的演出，被赞是清新自然的组合，加上现在被公司力捧，可算是“塞翁失马，焉之非福”。何广沛透露事前没有刻意去想与江嘉敏孖住上的化学作用有多大，因为拍此剧充满压力：“之前我拍《律政强人》、《财神驾到》，起码都会有智叔（廖启智）、豹哥（单立文）等等嘅前辈傍住我，但今套我对得最多嘅就系江嘉敏，好似劲快就要学满师咁，加上江嘉敏第一次拍TVB剧，变咗我要全程都要lead住佢，所以都系会有压力，唯有就将前辈教我嘅嘢尽我所能同江嘉敏讲。”结果，现在反应都很正面，何广沛的心机总算没有白费。

不过，何广沛就话自己有隐忧。虽然今次评价不错，但一直以来他的声线都成为网民讨论的话题，一般都指太温柔，会限制何广沛所演的角色类型，他亦承认怕会变“御用乜乜乜”，但目前尽最大努力去改善：“有尝试揾方法，例如啲发声治疗嘅，自己都揾到个方法，就等系《天命》嘅时候发挥下。”希望网民睇到何广沛用心良苦，会讲一句：“何广沛原来都可以好man！”