【有片】《四叶草》李雨阳自爆欠债40万　萧定一诱拍三级片

做得演员，有边个唔想红？事实上，就算有样都未必可以包你星途成功，还要睇埋命水。就好似2003年以《当四叶草碰上剑尖时》初登荧幕的李雨阳，当时长发的他，骤眼望都几似日本明星吖。不过一套剧之后，他似乎就被埋没，有样又如何，在TVB 9年，李雨阳经常做二打六、不起眼的角色。冇乜工作机会，收入自然不理想，导致生活拮据。2012年，眼见香港电视争取发牌，李雨阳觉得有发展机会，于是头也不回地离开无线，可惜HKTV最终不获发牌，本来生活艰辛的他，更加孤立无援，谂落真系好黑仔。幸好天无绝人之路，机缘巧合下遇到生意伙伴，有意夹份卖原味鸡，望有商机。结果，李雨阳卖鸡生意尚算不错，现时他中港两边走，做下生意又返大陆拍剧。回想过去，洗钱都要计较的日子，37岁李雨阳接受网媒《HongKongCard.com》访问时，最感恩是没有为片酬而拍难洗底的三级片，重蹈覆辙。

李雨阳加入娱圈9年里，自言酬劳少。过去曾讲过TVB合约充满不平等，登台要申请，又不能出现在其他电视台，曝光率间接被控制。李雨阳开始兼职帮补生活，试过做售货员，又试过到处揾嘢捞：“当时会周围咁搲嘢做，除咗拍剧、拍电影之外，仲有商演，去登台。我自问对唱歌几有信心，但会怯场。俾唔到信心人哋嘅时候，就唯有搲烂市去做，无论系几平都做，咁样去keep住去挨。咩Job都接，生活都真系好唔掂。”李雨阳虽然未去到挨面包，但去街要同朋友谂过度过：“见到个银包得返300蚊，今个月仲有两星期，咁梗系唔出去啦。”

不过低处未算低，李雨阳讲到最唔掂的日子，要揾财务公司借钱，一共借了30多40万：“借咁多系为咗过生活，因为当时啲卡数，真系连minium charge都还唔起。借咗钱之后，就咩Job都接，2、3千蚊都接，慢慢挨去还清晒。”其后李雨阳都有讲到，2011年萧定一开拍三级片《3D肉蒲团之极乐宝鉴》，向过他招手，他也坦言片酬很吸引，差点答应接拍。不过，李雨阳经过一番考虑之后，最终悬崖勒马：“当时有同TVB监制王心慰去倾，佢就同我讲，你唔好睇有好多前辈都有拍过三级片，但都要嘥好多嘅时间去洗底，去令观众冇咗个三级片嘅影响。”这番说话都点醒了他：“虽然个片酬可以抵消债务，但拍完之后又影响咗我几年嘅，咁我咪即系重蹈覆辙？呢几年内又冇收入，咁笔数又孭返喺度，所以都系拒绝咗。”还好他没有拍三级片，现在除了做老板，间中返内地工作，在当地都有市场。当初失去，兼本来没有的，现在开始赚回来。所谓天冇绝人之路，慢慢行，总有生机嘅！