【私心预测】2017上位电视男艺员

撰文： 方以文
出版：更新：

2016年有ViuTV出世，鸡年就即将有奇妙电视加入免费电视市场，个人希望香港电视界大战可以一触即发，我哋呢班观众就有好嘢睇。不过要有新气象，除咗幕后创作团队之外，幕前演员有新脸孔都非常重要。女艺员嚟讲，预计2017年同以往一样，大台都力捧港姐华姐咁，反而男演员就无乜推测轨迹。我方以文就同大家估吓2017年有边个男艺员有位上。风水佬呃你十年八年，我哋到年尾再嚟个赛后检讨，睇吓我嘅私心选有冇实现到。

何广沛

由2014年《M Club女人俱乐部》被吴启华指定演自己后生版嘅麦当当王子，何广沛（Matthew）就以高姿态畀观众认识，成为大台上位男艺员之一。2012年由26期艺员训练班毕业加入无线嘅佢，系咁多同期同学仔当中最多嘢拍嘅一个，仲签埋无线经理人合约。喺2015年《楼奴》做麦包、简慕华个囝多多、2016年《律政强人》做方中信徒弟Nick、到近期《财神驾到》做财神托世嘅王招财，嚟紧仲喺解封新剧《亲亲我好妈》做陈敏之嘅细佬，睇落顺风顺水。

呢位被吴启华话“要拣个演自己后生嘅梗系要拣个最靓仔”嘅靓仔，喺唔少人眼中系扶摇直上，但其实佢都经过一段做无对白配角嘅日子（当然呢个日子比起其他人短好多）。包括《僵》里面一出现就畀人队瓜咗、得几个镜头嘅无名僵尸，仲有《巾帼枭雄3谍血长天》里面做行行企企嘅士兵。2012年加入艺训班𠮶时，Matthew话想5年之内有人认得佢，呢个目标已经达到咗喇。当年佢仲有个十年大计，希望十年后可以担正做男主角，睇个走势，似乎可以㖞！

何广沛，吴启华都话佢靓仔。2016年仲拎埋“星和无线电视大奖”最佳新人奖。
何广沛喺《楼奴》做麦包、简慕华个囝，同香香都有对手戏。
即将播出嘅《亲亲我好妈》做中学生，几年前拍落，何广沛童颜够用有突。
贺岁剧《财神驾到》之后，再有《亲亲我好妈》，大台捧何广沛之心好明显。
何广沛、郭子豪，两个都签咗大台亲生仔约。

郭子豪

2014年加入大台之前，郭子豪（Arnold）已经出现喺报纸杂志，因为佢系当年以剥衫壮男做宣传嘅美国服装品牌A&F众多猛男之一，亦系A&F当年唯一嘅华裔模特儿。唔想净系做model，郭子豪选择加入无线。家庭观众可能对佢无乜印象，最眼利嘅可能只系认得佢有份做《廉政行动2016》。不过大台嘅观众就嚟会认得佢，郭子豪喺即将播嘅《亲亲我好妈》有演出，宣传片都有佢开口讲嘢。

而拍咗未排几时上嘅《三个女人一个“因”》，佢就会一口气跳升到做第三男主角，排喺袁伟豪、陈智燊后面，做女主角黄智雯嘅老公！以新人姿态加入大台，签埋经理人合约做埋亲生仔，第三年就有咁嘅机会，真系少数中嘅少数，希望佢会有好表现，乘势而上。

郭子豪红裤仔加肌肉，AF时代。
《廉政行动2016》演员，左下角有郭子豪。
郭子豪唔露肉，着密实啲都有睇头。
做得AF当年唯一华裔模特儿，肌肉唔少得。袁伟豪拍《三个女人一个“因”》时，话露肉以后留返畀郭子豪表演。

袁镇业

第26期艺员训练班班长袁镇业（Kelvin），最令人记得，同埋最多戏份嘅角色，系喺《一屋老友记》饰演胡定欣𠮶间水电舖两个伙记嘅其中一位“凌波”。一路补袜一路同胡定欣分享爱情观嘅一幕戏做得几好，当然一众女观众可能会比较记得佢喺同一套剧里面剥衫show肌肉嘅戏份多啲。2012年入艺训班𠮶时，袁镇业佢希望自己10年之内可以做一个有影响力、教育下一代嘅艺人。5年过去，打好基础向目标进发都咪话无可能。

袁镇业佢除咗系演员，仲系一位舞林高手。读大学时已经成日参加学界舞蹈比赛。加入大台之前，仲跟过唔少歌手做演唱会dancer，包括张学友、叶倩文、林峰、郑伊健。之前大台有条宣传片，佢就有分跳modern dance，都几charm。如果大台喺混战当中开新题材电视剧，又咁啱开歌舞片，就真系开正佢𠮶瓣。不过唔同何广沛、郭子豪，佢无签到亲生仔约。希望大台唔好走宝。

袁镇业跳舞片段《TVB创新经典节目巡礼2015 》：

袁镇业外型系唔错，跳舞劲好睇。
袁镇业喺爱情网剧《好朋诱》嘅演出。
袁镇业与蔡思贝拍摄《踩过界》。
一张图睇晒何广沛、袁镇业、谭永浩、郭子豪，全部喺《亲亲我好妈》。

谭永浩

谭永浩（Jarryd）又系26期艺训班嘅同学仔，同班长袁镇业一样无签到亲生仔约。不过早喺2004年，已经喺《四叶草2@赤沙印记》里面出现，做女主角之一陈自瑶Yoyo嘅男朋友。点解未加入大台都有个角色做呢，我揾唔到资料呀…不过我知道佢有把好声，仲系2010年度英皇新秀歌唱大赛嘅金咪得主！佢间唔时都会自己post啲唱歌片段出嚟，系好听。另外，佢同另外两位大台演员卢峻峰、董敬文开咗个facebook page叫做《喂 霞姨》，又拍片又唱歌。仲有拍“深夜IQ题”喺通宵开工时间问艺员同事IQ题，挑战佢哋最唔清醒时候嘅头脑。又同袁镇业演出爱情网剧，算系最勤力利用网络力量𠮶批大台艺员。

成日post片，又喺《安乐窝》同埋《Y Angle》做主持，可能因为咁， myTV SUPER嘅facebook好多时都揾佢主持live，节奏控制得唔错。加入艺训班时，Jarryd话希望自己5年后似林峰咁，喺演戏、唱歌、电影都发展得好。十年之后希望喺娱乐圈占重要地位。继续努力，向主持发展又得，签星梦唱歌都唔系无可能。

《2010年度英皇新秀歌唱大赛》部分片段：

谭永浩、袁镇业主演爱情网剧《好朋诱》：

艺人应该用网络平台自行做宣传，谭永浩识玩。
谭永浩（左二）、袁镇业（左三）同样系大台26期艺训班同学仔，两个都无签亲生仔约。希望大台唔好走宝。
谭永浩同另外两位大台艺员卢峻峰（右）同埋董敬文（左）开咗个Facebook page“喂！霞姨”，拍搞笑唱歌片。
谭永浩经常主持myTV SUPER嘅Facebook live。

刘俊谦

刘俊谦（Terrance）同电视界暂时最接近嘅一刻，包括咗拍过嘅唔少电视广告，同埋拍ViuTV开台前疯狂播放嘅宣传片《WEIU》，又或者系佢同视帝黄子华同埋大台前花旦陈法利做嘅𠮶一出舞台剧《前度》。不过好快，佢就会以“新大卫”嘅姿态出现喺ViuTV嘅《玛嘉烈与大卫系列 前度》当中，同廖碧儿、娘娘杜小乔合作。

高大靓仔嘅“刘谦”明显sell暖男形象，原著《玛嘉烈与大卫系列 前度》当中嘅大卫比《绿豆》当中嘅大卫搞鬼，刘谦一定应付自如。香港演艺学院毕业嘅佢，喺舞台剧界已经发展咗一段时间，曾经有传媒话佢系“演艺李治廷”，我就觉得佢仲靓仔过李治廷。刘谦接受访问嘅时候话自己想做一个舞台剧演员，亦都想做一个电视演员，不用分得那么细。我认同呀，好戏就得，黄秋生、苏玉华、潘灿良、刘玉翠，有辨你睇。

刘俊谦演出广告：

《玛嘉烈与大卫 前度》宣传片段：

“前度大卫”刘俊谦、“绿豆年青版赵子龙”游学修、“绿豆玛嘉烈”周家怡。其实系拍紧港台嘅《申诉》。
刘俊谦拍紧ViuTV嘅《玛嘉烈与大卫系列 前度》，靓仔又识做戏，红就指日可待。
都话做有趣搞鬼嘅大卫对刘俊谦系无难度嘅。
呢个笑容，刘俊谦被封为暖男系有原因嘅。
型又得！
舞台剧《前度》，同大台前花旦陈法拉有对手戏。
舞台剧《前度》，其实系同黄子华无乜对戏。

马志威

提到马志威（Edward），除咗演出过一系列广告之外，大家可能会记得佢喺吴雨霏2012年推出嘅歌曲《告白》MV当中嘅出色演绎，或者佢同蒋家旻担正嘅2013年电影《第一次不是你》。佢依家系太阳娱乐旗下艺人，2016年会同刘谦一样，演出《玛嘉烈与大卫系列 前度》，以“大辉”嘅角色同“新玛嘉烈”袁澧林Angela发生一段情。

须知道上一套《玛嘉烈与大卫系列 绿豆》除咗令到几位主角人气急升，亦都令到本来主力喺电戏嘅游学修、林耀声入屋，多咗电视观众认识。今次《前度》，后生嘅主要男演员就只系有马志威同埋刘俊谦。两位有实力又有外型，如果配埋天时地利，上位无难度。

吴雨霏《告白》MV：

我对马志威嘅第一个印象，好似系嚟自吴雨霏《告白》MV嘅呢一幕演出。
马志威，有外型、有戏，争一个畀大家认识嘅好机会。
电影《第一次不是你》做男主角，搭住蒋家旻，可能系马志威畀大家最深印象嘅演出。
《玛嘉烈与大卫系列 前度》男位后生主要男演员，马志威（右）与刘俊谦（左），再加上文青女神Angela同埋娘娘杜小乔，唔知可唔可以接住《绿豆》嘅气势。
（上述相片由作者提供，文章纯属作者意见，不代表香港01立场。）