从贺岁片发展看香港的高低起跌

2000年周星驰唔玩，贺岁档可谓最黑暗嘅一年，冇双周亦冇一成，只得郭富城……2008年卒之有周星驰啦，但已经系拥抱大陆市场嘅《长江七号》，讲真，大家都睇得不是味儿。片烂唔烂都其次，系大家都知，属于我哋嘅年代，已经过去。

贺岁片死咗未？睇你点定义。

用“贺岁档华语大片”嘅广义，贺岁片当然冇咁易死。因为贺岁档，依然最容易揾钱。虽然过年气氛越嚟越薄，但戏院在呢个档期，都仲有相当强嘅惯性收视。所以即使华语片好似越嚟越颓都好，贺岁档都仲系兵家必争，拍戏嘅往往投放唔少资源（系咪高质就另一回事）。

证据？贺岁档嘅戏，多数都打入华语片票房十大。旧年《美人鱼》，《赌城风云III》同《西游记之悟空三打白骨精》，我全部有睇。即使只计华语片，呢三套都称唔上系佳作，但一样进占全年华语片票房二三四位。

但如果讲狭义，“喜气洋洋”片先系“贺岁片”，咁去到今年连《赌城风云》系列都冇埋，真系冇人同你恭喜发财了。对，黄栢基导演叶念琛监制𠮶套《我要发达》，我一样有睇，有邵音音同大家拜年添。但你知道唔系𠮶回事了。得罪讲句，换著三十年前，明星使鬼嚟屯门同你拜早年咩。而虽然麦迪文都要同景甜打怪兽，但至少未来几年我都想像唔到Ryan Gosling跳完舞片尾出嚟同你恭喜发财。

归根究底，贺岁片基本上系香港发明。而贺岁片嘅起落，亦同香港电影，甚至香港嘅起落同步。贺岁片就系香港命运嘅写照。作者自觉唔算好老，但都叫做由《最佳拍档》睇到去《赌城风云》，同大家快手回顾下不同年代嘅贺岁片，同埋当年嘅香港系点（当中年代当然有重叠）。

1.《最佳拍档》年代（1982－1986）

够老嘅香港人会话你知，新艺城1982年拍嘅《最佳拍档》，系贺岁片嘅始祖。 King Kong许冠杰拍光头佬麦嘉好多人识。但唔系太多人留意到，导演系曾志伟，编剧系黄百鸣。See？之后几十年，都仲系呢班人主导香港流行文化。

套戏的确无敌，绝对适合大家怀缅，超过200万人入场睇，2600万票房。1982年嘅2600万㖞！计今日票价，等于近1.5亿票房。唔好话港产片，就算计晒所有电影，应该只系得《阿凡达》可以相比。𠮶个当然系香港电影，甚至香港嘅黄金年代。套戏仲会在日本同步上。你想唔想像到而家日本人在东京入场睇《我要发达》睇麦玲玲同阿Bob谈情？

但巴闭嘅背后，当年香港流行文化嘅成功， 唔多唔少多得大陆未开化，全球化又未去得好尽，又冇得上网，大家见识少。事隔咁多年，睇返《最佳拍档》， 唔觉得咁好睇了。许冠杰麦嘉Odd couple嘅设定好多西片都有，而套戏好多桥段亦摆明系抄占士邦片。而家再拍一次，你只会觉得小儿科。

2.《富贵逼人》系列（1987－1989）

对我嚟讲，呢个系列先系真正贺岁片。《富贵逼人》够晒原创，相对地唔算大制作，董骠同肥肥沈殿霞孭飞，称不上粒粒皆星。成套戏就靠当时编导，德宝嘅高志森。同埋胜在够贴地。讲公屋，横财梦，拜年，白鸽眼，移民潮。骠叔义正辞严咁教训大家“移民系不负责任嘅行为”，但同时亦话你知“我哋中国人唔兴（民主）呢套”。想了解九七前香港人精神面貌嘅，记住揾嚟睇。

套戏成功背后，又睇到当年港产片食老本嘅作风。同僵尸片，猛鬼XX，霸王花，古惑仔一样，有人成功，就有人抄，一窝峰去拍，或者自己都不停重复，拍到烂拍到你爆粗为止。对，而家荷里活都系咁，但人地可以卖埠全球，仲有得出公仔。你几时出款Q版大天二？“包皮”英文叫乜？

一年一套，1989年拍到《富贵再三逼人》，仲系德宝，但换咗导演，票房即时插水。1992年高志森自己拍《富贵黄金屋》，更加仆直。唔止，1989年仲有套疑似“外传”，嘉禾拍嘅《富贵开心鬼》，都系董骠肥肥，成家中头奖但漏煤气死晒但都仲想移民，够晒大吉利是。套戏烂到仆街，建议你揾嚟耻笑下。

讲到尾，𠮶个年代，连戏入面骠叔都去埋加拿大。最紧要就系揾快钱，买楼， 移民。以为“香港人一向好关心政治好爱香港”嘅，不妨揾嚟睇下。

3. 双周一成时期（1990－1999）

之后差不多成个1990年代，系“双周一成”年代——周润发，周星驰同成龙。 如果讲贺岁片，基本上系周星驰主导，《整蛊专家》，《逃学威龙3之龙过鸡年》，《行运一条龙》（对，“年初四咁嘅样”𠮶套），当然仲有好多人最爱嘅《家有囍事》——留意，近年黄百鸣高志森畀人闹到七彩，呢戏正系佢地作品。

周星驰唔靠抄西片，亦唔靠大场面大明星，真系一个人天才波担起成堆戏。但对我嚟讲，呢个年代已经系开到荼蘼了，而周星驰嘅贺岁片亦唔系佢嘅代表作，顶多只有《整蛊专家》算好好睇。正如周润发同成龙嘅代表作都唔系贺岁片。

呢个年代就系香港文化最后光辉岁月，对我嚟讲，“贺岁片”呢样嘢，由1999年开始衰落，关键亦都系周星驰唔玩。当年周星驰拍埋《喜剧之王》，你可以当系佢最后一套“港产片”，之后佢拍嘅系《少林足球》，正式去除“港味”。

4. 黑暗期 （2000－2009）

2000年周星驰唔玩，贺岁档可谓最黑暗嘅一年，冇双周亦冇一成，只得郭富城。《公元2000》票房唔掂。高志森黄百鸣再翻叮许冠杰麦嘉嘅《大赢家》， 票房更差。收得嘅系《东京攻略》同《决战紫禁之巅》，但质素如何大家心照。打后咁多年，顶多得套《呖咕呖咕新年财》多啲人讲。呢个年代亦正系港产片嘅黑暗期。

正式为“贺岁片”划上句号嘅，我认为系2007年嘅《门徒》。一路以嚟贺岁片都系钟意嘻嘻哈哈如意吉祥，唔大团圆结局都唔好死人冧楼。2007年《门徒》打破晒所有禁忌，够晒大吉利是。到2008年卒之有周星驰啦，但已经系拥抱大陆市场嘅《长江七号》，讲真，大家都睇得不是味儿。片烂唔烂都其次，系大家都知，属于我哋嘅年代，已经过去。

5. 回光反照？（2009－）

不过真系柳暗花明又一村，我以为“贺岁片”就咁收档之时，2009年就重生了。而居然系多得黄百鸣。佢拍返《家有囍事2009》。固然唔好睇，但叫做系重新搞起“贺岁片”呢样嘢。之后几年，就有曾志伟拉埋TVB同佢斗。

话我坏品味都好，我都真系仲怀念𠮶几年。到2014年，两个“化敌为友”， 一齐拍《六福喜事》，就更加唔掂。其他选择？亦系同一年，王晶拍第一套《赌城风云》。之后两年一年一套。我无意批评王晶嘅政治取向，言论或人格，但就戏论戏，即使当胡闹喜剧或睇明星都好，三套《赌城风云》都仲系好唔掂，仲要一套比一套差。但冇关系，三套都入华语片票房十大的。又再证明啲观众只系把口话杯葛，实际上大把人都系照睇。

以为王晶好唔掂？今年就王晶都冇得你睇。得返《我要发达》，好难唔话贺岁片已死。卒之开始有人怀念黄百鸣曾志伟了。但又怪谁？黄百鸣2015年破格地拍过套《浮华宴》，绝对系有诚意之作。但收得两百几万票房之余仲要畀人狂妈， 而妈嘅十个有十一个都冇入场睇过。证明贺岁片嘅嘢，观众要垃圾就畀垃圾佢食啦，唔使诚意的。有咁嘅观众，咪有咁嘅电影。

（文章纯属作者意见，不代表香港01立场。）