世界圆又圆，职场忌随便睇唔起人
被记者问到点睇林郑疑似参选特首？佢（叶刘淑仪）话：“以前佢都做过我下属咁㗎啫，林太好能干……”唔知叶太当年对呢位下属友唔友善呢？转眼阿下属就变成疑似竞争对手，一个唔觉意仲可能……
有句说话叫“见高拜，见低踩”，适量的见高拜其实系无乜问题，对住叻过／高级过自己嘅人卖吓口乖，你开心对方又高兴，合作上嚟更顺畅。但见低踩嘅人就高手极有限，最少系一个短视及心地差嘅人。
小薯要整蛊你，总有佢嘅方法
Jennifer喺一间PR agency做manager，世界女一名，同公司几个高层都好熟，放工会一齐饮嘢，上位上得好快。但同时佢都系一个好心急嘅人，对住“无价值”嘅人，佢懒得浪费时间去social，大半年前佢请咗个Year 4学生做part time，叫亲对方做嘢都呼呼喝喝毫不尊重，个妹妹几次比Jennifer闹到喺厕所喊，最后当然系辞职，辞职𠮶日亦唔系好多同事愿意同一个小part time 食farewell lunch，整体而言，呢间公司带比妹妹嘅回忆都几差。
个世界真系好细的，一年后，妹妹入咗间大机构做小薯，而咁岩呢间公司就系Jennifer间agency嘅其中一个大客！Jennifer send email嚟问间公司“今年续唔续约呀？最近有无咩大型活动要帮手搞呀？”send极都无人覆，因为，负责check email𠮶个就系成日比佢闹𠮶个妹妹，就算Jennifer打电话嚟问，接电话𠮶个都系妹妹，妹妹无表明真身，就只系话：“email我地收到，总之有需要就会覆你。”
与此同时，妹妹亦好努力揾其他agency资料比老板睇，系咁说服老板试新公司，老板一来唔知咁多嘢，二来换间agency咁小事，速战速决啦，价钱岩咪换吓试吓新嘢啰。结果，Jennifer就喺完全唔知自己衰咩嘅情况下无咗个大客。
点解举呢个例呢？我想讲，唔需要谂到话妹妹转头做咗老板个老婆咁极端，佢依然系小薯，但都已经有足够力量教训“见低踩”嘅Jennifer，做人呢，真系要明白世界是圆的，凡事唔好去得咁尽，亦唔好乱咁睇唔起任何人。
唔好轻易觉得一个人“已消失”
再唔系你睇下疑似特首候选人叶刘淑仪，由入境处处长升到保安局局长，喂以为自己继续上架啦，点知差错步就连带个发型一齐比人疯狂攻击，七一50万人游行之后辞职去美国，好啦你以为佢从此消失，当日若有下属为擦鞋埋佢身，应该都会觉得哎呀落错注。点知过几年叶太就返嚟选立法会议员，补选输比陈方安生，以为完了吧如无意外，点知之后直选又比佢选到，仲连任添。
（文章纯属作者意见，不代表香港01立场。）