好声好戏｜陈安莹隔9年重返TVB　专业配音员参赛：拍摄时喊左2次

《大整蛊》播到尾声啦，下星期一同样时段将会播出新节目《好声好戏》，作为曾志伟王祖蓝空降做高层后嘅九大综艺节目，呢个配音比赛真人骚揾嚟唔少旧人回巢，除咗有刘江担任导师，呢日有人喺预告中发现“傻姑”陈安莹踪影﹗佢接受《香港01》访问时话：“系呀我有份参赛。”

预告片出街后有列出12名参赛者，包括冯盈盈、张振朗、陈自瑶、黄翠如等，赫然发现“陈安莹”名字，讨论区有人发文，问系咪同名同姓演员，事关陈安莹早已是专业配音员，足够资格做导师而非参赛者。陈安莹1979年第8期入选无线电视艺员训练班，毕业后曾三度饰演金庸小说笔下嘅儍姑一角。2012年王维基挖角下，离开工作33年嘅TVB。

陈安莹接受《香港01》访问时话：“其实好多朋友知我参加都O晒咀。当日系王祖蓝打嚟邀请，当时佢话自己返去搞嘅第一个节目，关于配音比赛想我参加，不过就唔系导师而系参赛者，我谂当下佢都有少少怕我介意但其实真系无。因为大家一直都知我系个演员，但其实都做咗配音员好多年，内地有《声临其境》但香港真系未试过有同类讲配音嘅节目，可以推动下配音呢一行，畀大家知唔止演员难，配音都需要专业训练，所以我决定参加。”

相隔9年再返TVB电视城，陈安莹话一切都好熟悉，见返好多朋友：“除咗其他参赛者基本上台前幕后都识。前后拍摄三日已经完成工作，其实我屋企无电视又无特别上网睇，有人问我预告喊乜我真系唔知系边幕。记得拍摄时我喊左2次，配音时有喊讲嘢时都有喊，有一个位系面对LISA姐，以前我成日同佢做主仆，𠮶刻谂起以前好多合作点滴，我同佢讲LISA姐你知我演戏时系点，依家终于知埋我配音时系点样。”