日日妈妈声｜叶凯茵怀孕9个月因妊娠毒血流产　拒见BB最后一面

怀孕到生BB经历重挑战，生产就好似去鬼门关走一圈，只要见到BB平安健康一切都值得。叶凯茵2016年初怀孕9个月，正准备第二胎随时降临，点知因为妊娠毒血症痛失胎儿，自己亦有大量后遗症，呢日佢现身由余安安、罗敏庄和陈凯琳主持嘅节目《日日妈妈声》，分享当年流产切肤之痛。

2009年，叶凯茵与圈外商人郭家梁结婚，2年后诞下儿子Orson，到16年初正准备第二胎随时出世，点知传来恶耗：“点估到短短半小时内，希望会变成绝望。早一晚我仲感受到BB心跳，第二朝起身觉得唔系好舒服，坐咗喺永一阵大约半个钟，感觉到下体流紧血，15分钟老公已经车我到医院，去到产房做各样检查，睇BB心跳见到佢地面色一沉，无咗心跳。其实𠮶一刻我好混乱，无谂过呢啲事会发生喺自己身上。打催生针生咗BB出嚟，姑娘有问我想唔想见BB最后一面，当时我系拒绝咗，因为我好惊，好惊𠮶个画面会永远留喺我心入面。”

患上突发性妊娠毒血症除了带走BB生命，亦令叶凯茵差啲无命，身体出现好多后遗症：“高血压、右眼有闪光，惊恐症，情绪都出现好大问题。”每当经过呢间医院，或电视播出有关流产节目都会触动佢嘅痛。大仔正在外地留学，令叶凯茵萌生想再生多个嘅想法，但医生提醒佢要谂清楚：“虽然我曾讲过我一定唔会再生，但呢个想法最近起咗变化，医生同我讲如果我想再要生要小心，因为好大机会再有呢个病。因为我仔仔去咗纽西兰读书一年，同佢分隔两地，系好挂住佢。有时见到街上小朋友，就谂可唔可以生多个，但因为医生建议同年纪唔细，都唔敢冒呢个险。”