谭旻萱演《E先生》MV靓爆弹起　认中学冇同学追：佢哋介意我太高

谭旻萱（Mandy）是MIRROR人气成员吕爵安（Edan）首支单飞作品《E先生 连环不幸事件》的MV女主角，有种邻座同学惹人怜爱的感觉，亦是新一代的“宝矿力女神”，活力十足青春灵动，而眼大大鼻高高的她，凭着接近完美无瑕的形象，在IG储落一堆又一堆粉丝。的确，IG靓相总经精挑细琢，凡人亦可以改头换面变成天仙，但今年20岁的Mandy却是货真价实的靓，理想与现实没有距离，说她是为入娱乐圈做幕前为生也绝不过份。|
撰文：陈栢宇
摄影：梁碧玲

点选下图回顾《E先生 连环不幸事件》MV精选画面：

变瘦后试衫照镜：发现自己冇想像中咁差！

可是，Mandy由始到终都未有想过自己终有一日会入行：“其实我细细个系一个圆咕碌嘅小朋友。（几时意识到自己系一个靓女？）中三𠮶时因为打篮球开始变瘦，之前妈妈都成日话我瘦咗先买靓衫畀我，终于有呢个机会𠮶阵时，就试下唔同嘅品牌，喺Fitting Room照镜先发现自己冇想像中咁差，可以好似其他女仔咁打扮一下。”

变靓咗一定多人追？Mandy坦言在学期间，从来没有男同学追求，不是觉得她打篮球太粗鲁，就是认为177cm的她身形太高䠷：“我问过身边好多朋友，你哋介唔介意女朋友高过自己，好多都话介意，好怕班兄弟同自己讲，‘哗，你女朋友高过自己咁多’。（你自己介唔介意？）其实我唔介意，我都有问过啲女仔朋友，好搞笑，佢哋都系唔介意。对于我哋嚟讲，身高、样貌都不是事情，最重要都系感觉，就算你几靓仔，冇Feel就系冇Feel。”

太平山街易“捕获”

虽然样子平平、身高不突出也可以入围Mandy的“男友候选名单”，但不代表追Mandy是一件容易的事，到底怎样才可以追掂女神？或者养猫养狗是一个速成方法，她说：“其实斋讲Feel、Chemistry系好玄，其实有样嘢会比较具体，我觉得钟意小动物嘅男仔会比较好，因为如果你对小动物好，我至少可以肯定你内心一部份一定系好，呢样嘢系可以畀我可以具体咁了解到你呢个人。”

当然，好多粉丝未必想亲身试试追女神的滋味，毕竟被落闸还是会受伤害，在远处偷偷看偷偷望，已经够开心一个星期。去边度会较易捕获她？Mandy透露上环太平山街是她“打趸”首选：“因为呢度好放松，大家都系慢生活，唔系买完嘢就即刻要走，都系想留喺度脱离一个好绷紧嘅状态，大家都系处于呢个气氛，睇下书、放下狗，个感觉好好。（呢个亦都系你嘅理想生活？）我呢个岁数，又唔想日日都系咁，会闷，系有啲矛盾，又想冲又想Chill，可能个个香港人都系咁。”

20岁这个年纪，按照正常步伐，应该正就读大学二、三年级，但Mandy却没有选择寻常路线，反而拣了一条需要更多勇气才能走下去的路线，她坦言一来是自己未算向往大学校园生活，二来是读书绝非唯一出路，回想起当初说服父母时的情景时，她说：“我同佢哋讲，呢啲机会得一次㗎咋，好多广告一次㗎咋，我嘅人生未必有第二次有呢样嘢，书可以之后读，再揾机会Pick up番，读书系为张沙纸定系知识，获得知识可以有其他唔同嘅渠道，与其唔汤唔水，不如全副心机放落呢个圈度。”趁自己还有条件可以去任性，探索自己的可能性。

多谢Locker带自己入戏

Mandy坦言未有想过自己可以冲到几远，“但有种感觉系，喺呢个行业里面，你系停唔到，你一路行一路行，永远有样嘢不断Push自己做得更好。”而她现时最大兴趣是演戏：“之前一直都有上演技班，但而家因为疫情中断咗，拍《E先生》MV𠮶时，Locker帮咗我好多，佢用咗好多自己嘅手法帮我哋入戏，等我哋更加进入个角色，佢叫我哋多啲望住大家嘅眼睛，因为眼睛系表达嘢嘅地方，可以感受到对方谂紧咩，之后我就愈拍愈Smooth，同时亦进一步令我对演戏有兴趣。”看来，好快便会见到Mandy在剧集、电视里面演出。