少林足球｜六师兄弟排序有玄机 田启文︰原有师父一角拍完剪咗
电影《少林足球》昨晚（18/4）举行放映会，更安排“三师兄”田启文出席映后谈。席间田启文连横发放多个关于拍摄《少林足球》时，鲜为人知的花絮，包括赵薇饰演的阿梅，其浓妆原来唔系仿傚梅艳芳。周星驰在戏中点解要排第五做五师兄呢？又原来戏中本来有一个师父角色，亦已经拍下但最终都剪走，到底呢位师父由哪位仁兄饰演呢？
被李力持怂恿去打周星驰
有场戏田启文被人围打，其中有一下误伤到肋骨，事后要去医院检查，证实导致筋膜炎要休息。田启文︰“由于拍摄期间晚晚都要同周星驰食饭倾剧本，当晚我就专登熄咗电话去第二度食饭，点知一坐低周生就入嚟同一间餐厅，仲话︰‘周围咁揾你呀，你去边呀？’我话我睇医生，医生叫我休息几日，然后周星驰就话︰‘啊，休息几日……听日呢，不如我哋拍番围打𠮶场，今日拍得唔好，要再打过。’我心谂，有冇咁嘅人……当下我甚至谂会唔会听日拍拍下，我就死咗呢？”
但故事未完，第二日去到现场，李力持第一时间走到田启文身边，跟他说︰“边有啲咁嘅人呀，明知你去咗医院受咗伤，仲叫你再拍过？嗱咁样，一阵佢嚟到，你只要埋去开佢拖，打佢！我哋所有兄弟即刻冲过去帮手！”结果，田启文当然冇上当，“如果有就冇呢套戏出现啦！我心谂呢啲咁嘅对白，你同我讲把鬼咩！系你就第一个冲出去打佢，你摆明跣我啦！”
酱爆零NG有原因
星爷拍戏向来认真，田启文忆述单单是陈国坤出场一幕“嘭门”，便拍了37 Take，拍到陈国坤都冇晒信心。然后来到酱爆一角，大家当时暗中开盘到底要几多Take，“因为在周星驰世界唔会有一Take过，一定系双位数，我都估要过40，剧组有人讲不会，觉得顶尽20都拍唔好就直头换角。”结果，周生真系一Take便说OK，当时全场呆晒，但心想周生在玩大家，应该是拍完不用的。去到拍第二个镜头，又系一Take过，大家都百思不得其解，直至李力持上前问周生，使唔使拍多个做保险？周星驰︰“唔使喇，你觉得仲可以点拍呢？我又做唔到佢咁样，你改到佢啲乜？”呢件事令田启文佩服周星驰的慧眼可以睇到几远。
阿梅个妆蓝本唔系梅艳芳
由赵薇饰演的阿梅，戏中暗恋周星驰，特意去扮靓结果吓亲街坊。这个妆容一直以为是学当年梅姐梅艳芳，但原来真正蓝本是戚美珍。田启文︰“我哋系跟戚美珍当年喺一部电视剧嘅造型，拎嚟跟住照抄。”至于几位师兄弟见到阿梅呢个戚美珍妆，在戏中各有反应，互爆的贱嘴说话，原来都是各人即场度出来。“咩丢佢落海啦！以后唔食鱼呀？全部都系即场度，结果呢场戏好快就拍完。”
周星驰点解系排第五？
《少林足球》中有6位师兄弟，田启文透露起初度剧本，都是以全队波11个人去度，但后来觉得11个人产生太多支线，才缩减至6个，包揽前锋、 中锋、后卫、龙门位置。而6个师兄，除了知道周星驰一定有份演出外，其余5位当时由边个去演都一无所知，田启文︰“我就点都会有，因为自己人唔使点度期，钱又唔会太计较，所以陈国坤、肥仔聪本身都冇预佢演出，我鼓励佢哋做好啲，表现好啲就有机会。而陈国坤又的确由本身客串古惑仔一角，宁愿重拍，都要将佢变成四师兄。”
至于6位师兄弟的排位次序，原来都是由田启文决定︰“除咗大师兄一定系黄一飞，其余都系我安排，我唔钟意做阿二，我Lucky Number系3，所以就安排自己做三师兄，又因为想将周星驰年纪拉细啲，唔好咁老，于是四就畀陈国坤，但又唔好排佢做最细，就畀佢排第五，肥仔聪第六，所以系咁排出嚟。”
师兄弟原来有个师父冇出场？
早前，林盛斌阿Bob披露自己原来有份演汽车维修员，但因为某些原因要重拍，但阿Bob又要返学未能演出而易角。问到田启文当中仲有冇其他角色已拍好但删掉，田启文就想起原本成班师兄弟系有一位师父角色。“本身有一场戏仲拍埋，但最终都剪走，都系因为支线太多而抽起。而呢位演员就系音乐人黄丹仪爸爸（黄玉麟，艺名︰于粦），都系出名的演员，可惜早年（2017）离世。”
于粦是香港作曲家、指挥和著名的电影配乐，又曾以别名黄国梁及欧金波创作电视剧主题曲。最为人所知的作品包括1962年，香港票房最高的电影《苏小小》和1966年电影《一水隔天涯》的同名主题曲。