李施嬅未婚夫除咗系星级健身教练　仲系人生教练Brian Cha细佬？

现年39岁嘅李施嬅，2月8日中午于IG上载一张同男子手拖手，右手中指手戴巨钻戒指嘅相，留言话：“I Said Yes.”施嬅一直以“C君”称呼另一半，其后爆出正正系周润发与郭富城嘅私人健身教练车崇健（Anson Cha），呢日再有突破性消息，Anson疑似系Brian Cha 车志健细佬！

李施嬅未婚夫车崇健（Anson Cha），系圈中出名嘅星级私人健身教练，多年来帮助多位巨星减肥、操肌。由于佢嘅姓氏Cha唔算好普遍，有眼利网友发现佢疑似系Youtuber Brian Cha车志健细佬。事缘去年8月Brian Cha上载家人为佢庆祝生日合照，当时已经有网友留言问：“最左边系咪细佬？同你劲似样啊”睇返个样同施嬅未婚夫Anson好似样，咁啱Anson九月时放过一条健身短片，片段中衣著与Brian Cha张相神秘男子九成似。

除此以外，2019年Brian Cha为爸爸庆祝72岁生日时，一家四口合照中身穿红色T恤𠮶位同Anson有九成似，Anson车崇健同Brian Cha车志健中文名又只差一个字，仲要都系做健身教练，令网友深信二人系兄弟。就呢件事揾过李施嬅，但暂时未有回复。