保锜发千字文道歉疑退出ERROR︰完成手头上嘅工作后将会暂停

自一月初张沛乐（沙律）被影到跟ERROR成员吴保锜拖手，地下情正式曝光，沙律亦大方认爱，后来保锜被指与赖嘉贤（Carrie）未分手，疑似一脚踏两船，早前又在直播中爆粗，引来网民的狙击。保锜在周二（23日）在IG发长文回应连日来的事件，剖白连日来的心情，又写道︰“喺完成手头上已开始嘅工作之后，所有工作将会暂停。我亦唔会参与任何节目及ERROR歌曲嘅宣传。”疑似退出ERROR。最后又向大家道歉。

保锜IG发文全文如下︰

我知道，最近凡有我出现嘅嘢都会令好多人唔开心，ERROR出首歌嘅MV又好、节目又好，就算肥仔Dee哥193做访问，记者朋友同大家都会追问关于我嘅野。我觉得我影响咗好多人，尤其ERROR同一直钟意我哋嘅人。反思咗好多晚，虽然我讲咗好多次会重新出发，但觉得依然欠大家一个交代。我意识到一方面我之前处理感情嘅事做得唔好，另一方面，当晚直播嘅言行举止系好唔啱，说话亦无尊重过人。呢啲全部都系我嘅过失，我要面对自己嘅错，出嚟同大家再次道歉。

之前嘅我睇大家抨击我嘅comment，第一个反应系会好嬲，但系呢两日睇到凡系有我嘅嘢，MV、节目、访问等等嘅留言，反而觉得好内疚，我觉得因为我嘅错，影响到其他人，制作团队嘅努力、其他同一个节目嘅艺人、ERROR佢哋三个嘅努力全部都因为我受影响。我嘅错，应该由我自己一个去承担。

所以，我已经同公司讲，喺完成手头上已开始嘅工作之后，所有工作将会暂停。我亦唔会参与任何节目及ERROR歌曲嘅宣传。我认为咁样系一个对我应有嘅惩罚，希望唔好累到其他兄弟，亦唔好因为我嘅关系而抹煞左所有人嘅心血。

作为ERROR嘅一份子，觉得自己连累咗三位兄弟，破坏咗ERROR嘅形象，好对唔住，谂返呢两年同三位兄弟嘅经历，同193拍ERROR游嘅时候好冇胆，由咩都唔敢，到最后都敢试；Dee哥系ERROR嘅talk show入面挨更抵夜咁帮我地度稿；肥仔一直都好鼓励我做音乐，主动帮我争取为ERROR写歌；而家回忆返过去同三位兄弟一齐做嘢真系好珍贵，嚟紧ERROR嘅团歌，希望大家继续支持佢哋。

我知道保锜系大家眼中系一个毫无分寸嘅人，但希望下次大家再见到我嘅时候，会见到一个懂得尊重、愿意承担责任嘅人。我希望用行动证明。

再次同大家讲多次对唔住。

点击下图观看沙律和保锜的照片︰

后来ERROR的Dee（何启华）分别在IG story和Facebook转发保锜的帖子，写︰“#Error四位一体”，力撑队友。