波士成日畀蕉皮你踩，可以点算？

你身边总会有啲人，去到边都话同老细唔夹，去边间公司都系小人当道。同事永远仆街，上司永远针对，水机永远冇人换，全公司由CEO至茶水阿姐都系呃饭食，只有佢一个人出力但又严重underpaid……信我，正所谓law of attractions，做到人渣磁石嘅，多数自己都唔好得去边。

近日薯片叔叔嘅“拒答门”，其实关乎打工仔生存之道。小弟而家已经唔算系小薯，但都做过小薯（除咗富二代谁冇做过？），所以都不妨同大家分享下心得。

先讲两件真人真事。

第一件，发生在我中六𠮶年。当时我系小小副社长，Boss当然系社长。社际排球比赛，有人受伤之类，唔够人。我呢类书生手无缚鸡之力，运动嘅嘢，睇同讲就叻，当年我场场都系负责打下气，同埋睇靓女啦啦队，唔够人关我乜事。点知Boss忽然夜晚揾我，要我临危受命。仲“文明地”畀两个选择我：一系我落场打，佢做球证（另一场）。一系佢落场打，我做球证。果然有得拣你至系老板。问题系，当年我勉强识规则，但，点做手势点吹？完全唔晓。我讲我嘅难处，结果Boss黑面发我老脾。最后故事点收科？篇文最尾话你知。不过话定你知社长而家就系大公司的Boss，果然三岁定八十。

第二个故事，发生在我旧公司，反正当事人同我都离开咗𠮶间证券行（严格嚟讲系投资银行，但不必深究），唔怕讲。该人系Sales阿头，典型的金融Alpha Male，明明识中文但永远一口流利美式英语。有次该人心血来潮，想搞个石油天然气嘅投资论坛之类，无啦啦打比我，美式英语连珠炮发叫我负责。咁就哈哈哈，对，我都识股票（唔系点收人工？），但，叫我去搞石油天然气，即系叫个牙医帮你开刀生仔咁上下。最后点收科？一样最尾话你知。

做咗十几年嘢，几十年人，呢两件系我仅有疑似硬食Boss，似乎畀人放蕉皮嘅cases，都好似冇第三单。

波士赠蕉皮　需分清故意定无心

薯片叔叔嘅“拒答门”，有人话冇人跣佢，只系佢自己伸个头出嚟，向北大人表忠，“我都唔介意千夫所指的”。亦有人话佢系比CY之类跣咗一剂应嘅。本文无意做神探，真相可能永远无人知。若系前者，冇乜好讨论。所以我哋讨论后者，即系，职场上被Boss放蕉皮，可以点？

记住，Boss唔一定系直属上司，边个话事未必睇个org chart就睇到。上面故事二，入面嘅Sales阿头一样唔系我直属上司，但就可以将我搓圆揿扁。同样道理，睇宣誓都知，薯片叔叔同CY真正嘅Boss在北面。薯片叔叔既然有意挑战CY选特首，咁佢哋关系又唔完全只系Boss同小薯。

Boss畀蕉皮你踩，可以点？可以分开无意同有心两种情况。跣人都有无意？系有嘅。可能想试你（听落好好笑，但真系有咁嘅人）。可能大家观点不同，佢为你好畀你试多啲嘢，畀机会你立功快啲上位，醒只好牌畀你但你以为佢跣你。可能只系唔小心，唔记得咗。“吖Ivan原来你唔识打排球？原来你唔识天然气？唔记得咗添”。

点分有心无意？无心嘅蕉皮，可能都好跣，好痛，但唔会不停咁重复。我做Boss都有无心跣过人。但好嘅Boss，跣完人应该会知道自己错。当住咁多人面认错就冇乜可能，但佢可能私下同你表达歉意，可能年尾写好你份appraisal，可能下次佢跣都揾块细啲嘅蕉皮，或者跣第二个。

遇到无心嘅蕉皮，唔好放在心，反正到你做Boss，都会无心跣到人。挞低咗惟有当系磨练，正所谓The worst situation is the best training。又，呢句嘢又系社长话我知的。都话三岁定八十。

好，咁如果三日一小跣五日一大跣嘅，就应该系有心了。占士邦片话斋：

Once is happenstance. Twice is coincidence. Three times, it's enemy action.

遇到呢种情况，可以点？唔好揾蕉掟我。答案系，硬食，或者走人。

对，好Boss系唔应该不停咁畀蕉皮人踩的。遇到咁情况，你嘅职场生涯盏红灯红过薯片叔叔。得闲好上多啲求职网站，约下headhunt饮咖啡。你可以闪避，投诉，但十居其九搞到咁情况嘅，最后你都系返番去硬食或走人呢两条路，不如悭番啖气。

成日遇人渣嘅　自己都唔好得去边

话说回头，你身边总会有啲人，去到边都话同老细唔夹，去边间公司都系小人当道。同事永远仆街，上司永远针对，水机永远冇人换，全公司由CEO至茶水阿姐都系呃饭食，只有佢一个人出力但又严重underpaid（有统计显示香港人普遍觉得自己严重underpaid）。正如你身边总有个朋友投诉情场永远遇人不淑，个个都系骗子，好男人唔知死晒去边。争在未好似《美人鱼》嘅张雨绮咁狠狠讲一句：“我副架撑咁齐，你竟然当我臭四？”

信我，正所谓law of attractions，做到人渣磁石嘅，多数自己都唔好得去边。你睇成功嘅人，金融好运动好艺术好，十个有十个都系话work with the winners，欣赏身边人嘅付出，冇人闹上司唔识货下属不知所谓队友拖累我我怀才不遇。

上少啲Facebook，蒲少啲讨论区，反正职场上冇人care你感受。就算你啲网友会，你月尾供楼水电煤气都唔会care你爽唔爽，你不妨叫你啲网友帮你交。

庸才先成日“唔好彩”。平时装备自己，有能力嘅，包你唔会再成日唔好彩畀人跣。就算跣咗都冇咁痛，快啲起到身。毕竟成功上到位嘅，边个冇比人跣过？边个冇食过死猫？你觉得政客CEO系善男信女？年中不知几多人想C朗拿度走样可以耻笑佢。但佢只回应一句Your love makes me strong，your hate makes me unstoppable。型呀可？你都可以咁型，你系C朗拿度咁好波咪得。人哋肯定冇得日日食抹茶蛋糕。

最后讲埋两个故事嘅结局。

故事一，第二日我硬着头皮，谂住走堂去图书馆揾排球规则书。对，我系称职嘅下属。然后社长揾我，当然冇同我道歉，但话揾咗第二个了。当日赛事我继续食花生睇靓女。See？好Boss唔会同你讲对唔住，但会知自己做错。

故事二，都系差不多，我硬着头皮甚至硬着包皮，速成石油天然气知识，就去搞。当然搞到一镬泡，Sales Head都有循例出个电邮多谢我，但之后继续畀蕉皮我踩，玩到谢，最后我就走人。

对，遇到不停跣你嘅衰Boss，除咗装备自己揾工转，都冇乜可以做。毕竟既然你都认定佢系一个贱人，你仲work under佢？ 除非你自认自己冇料到。咁就唔好怨天怨地了。打工唔系睇TVB或睇波，唔会一路闹一路睇好过瘾。

（文章纯属作者意见，不代表香港01立场。）